काठमाडौं– संविधान दिवसका अवसरमा व्यक्ति हत्याका आरोपी योगराज ढकाल रिगललाई राष्ट्रपतिबाट आममाफी दिने निर्णयविरुद्ध पीडित परिवार अदालत पुगेको छ। सत्तारुढ दल नेपाली कांग्रेसको कार्यकर्ता भएकै कारण खुँडा प्रहार गरी हत्या गरेको अभियोगमा सजाय भोगिरहेका नेपालगञ्जका रिगललाई आममाफी दिने निर्णय भएको भन्दै उक्त निर्णय बदर गर्नुपर्ने मागसहित पीडित परिवारले सर्वोच्च अदालतमा रिट दायर गरेको हो।
मन्त्रिपरिषद्को सिफारिसमा राष्ट्रपति रामचन्द्र पौडेलले दिएको माफी गैरकानुनी भएकाले उक्त निर्णय बदर गरी अभियुक्तलाई पुन: थुनामा राख्नुपर्ने अन्तरिम आदेश माग गर्दै नेपालगञ्जका चेतन मानन्धरकी पत्नी भारती शेर्पाले रिट दायर गरेकी हुन्। शेर्पाले गत आइतबार रिट दायर गरेकी हुन्।
आफ्ना पतिको जघन्य हत्यामा संलग्न ढकालको कैद सजाय माफी मिनाहा गर्ने राष्ट्रपतिको निर्णय बदर गरेर उनलाई फेरि कैदमा पठाउन शेर्पाले माग गरेकी छन्। उनले ढकालको कैद मिनाहाको सिफारिस गर्ने जिल्ला कारागार र जिल्ला प्रशासन कार्यालय दाङ, गृह मन्त्रालय, महान्यायाधीवक्ता कार्यालय र कैद मिनाहाको सिफारिस गर्ने मन्त्रिपरिषद्लाई विपक्षी बनाएर रिट दायर गरेकी छन्।
पेसी तोकियो तर हेर्न नभ्याउने हुँदै सर्यो
शेर्पाले असोज १४ गते रिट दायर गरेकी थिइन्। असोज १५ गते प्रधानन्यायाधीश विश्वम्भरप्रसाद श्रेष्ठको इजलासमा पेसी पर्यो। गोलाप्रथाद्वारा परेको पेसी हेर्न नभ्याउने हुँदै स्थगित भयो।
मंगलबार पनि उक्त मुद्दामा पेसी तोकियो। मंगलवार फ नम्बरमा पेसी रहेको थियो। तर हेर्न नभ्याउने हुँदै फेरि पनि स्थगित भयो। अब अर्को पेसी बुधबारका लागि तोकिएको छ।
ढकालको खुकुरी प्रहारबाट २०७२ असाार २९ चेतन मानन्धरको मृत्यु भएको थियो। घटनापछि भागेर भारत लुकेका उनलाई प्रहरीले पक्राउ गरेर नेपाल ल्याइ मुद्दा दायर गरेको थियो। जिल्ला अदालतल बाँकेले उनलाई दोषी ठहर गरेको थियो। अदालतको फैसला अनुसार उनी सजाय काटिरहेका थिए।
तर सरकारले असोज ३ गते संविधान दिवसको अवसरमामा उनको असल चाल चलन भएको र माफी दिन मिल्ने भन्दै उन्मुक्ती दिएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
