काठमाडौं– चार महिनाअघि काठमाडौंमा १३ वर्षीया मिटरब्याज पीडित बालिका गरिमा रायले गृहमन्त्री नारायणकाजी श्रेष्ठलाई गम्भीर सवाल गरेकी थिइन्।
सिराह मिर्चैयाकी गरिमाले मिटरब्याजी सुजाता साहबाट आफ्नो परिवार निकै समयदेखि प्रताडित भइरहेको सुनाएकी थिइन्। निरन्तरको धम्की र चेतावनीका कारण गरिमाले पढाइ छाड्न बाध्य थिइन्।
११ दिन पैदल हिँडेर आमासँग काठमाडौं आएकी गरिमाले हामीसँग भनेकी थिइन्, ‘न्याय नपाइन्जेल फर्कनेछैनौँ। न्याय पाइनँ भने मैले पढ्न पनि पाउने छैन।’
सुजाता पक्राउ परेपछि उनले उनी छुटेर फेरि दु:ख दिने हुन् कि भन्ने डर लागेको बताइन्।
४ महिनापछि गत बुधबार मिटरब्याजी ३६ वर्षीया सुजतालाई प्रहरीले पक्राउ गरेको छ।
मिर्चैया नगरपालिका–६ कि साहलाई ममता देवी रायले प्रहरीमा दर्ता गराएको अनुचित लेनदेनसम्बन्धी जाहेरीका आधारमा उनलाई पक्राउ गरिएको सिरहाका एसपी टेकुनन्द इवा लिम्बूले बताए।
२ लाख ऋणको ३० लाख बढी लिएर पनि घरजग्गा हडपेको भन्दै उनीविरुद्ध उजुरी परेको थियो।
पक्राउ परेकी साहविरुद्ध प्रहरी र जिल्ला प्रशासनमा गरी १० वटा भन्दा बढी उजुरी दर्ता भएका छन्।
डर अझै सकिएको छैन
सुजता पक्राउ परेपछि गरिमा र उनकी आमा ममतादेवी रायलाई डर र खुसी दुवै लागिरहेको छ। ‘यत्रो संघर्षपछि बल्ल पक्राउ गरेको खबर सुनियो खुसी लागेको छ। तर उसका मान्छेहरूले घरमा केही गरिदिने हुन् कि। फेरि छुटेर आउने हो कि भन्ने डर छ,’ ममतादेवी र गरिमाले नेपाललाइभसँग भने।
ममतादेवी छोरीसहित चार महिनाअघि ११ दिन पैदल हिँडेर अन्य मिटरब्याजीपीडितसँगै काठमाडौं पुगेकी थिइन्। त्यतिबेला मिटरब्याजीलाई कारबाही हुन्छ भन्दै उनीहरूलाई सरकारले फर्कन आग्रह गरेको थियो।
मिर्चैया फर्केर पनि उनी तीन पटक न्यायकै लागि काठमाडौं आइपुगिन्। २ दिनअघि पनि उनी छोरी गरिमालाई साथ लिएर काठमाडौं आएकी थिइन्। हिजो फर्केर जनकपुर पुग्दा फोन आयो, ‘सुजतालाई प्रहरीले पक्राउ गर्यो।’
सुरुमा त विश्वास लागेन। किनकि शक्तिशाली मान्छेहरूले सुजताको बचाउमा थिए। ठूला नेताहरूको संरक्षणमा थिइन् उनी। उता प्रशासनले पनि उनैको कुरा मात्र सुन्थ्यो। ‘पछि बुझ्दा थाहा भयो गृहमन्त्रालयबाट सीडीओ (प्रमुख जिल्ला अधिकारी) लाई फोन गर्नुभएको रहेछ। अनि पक्राउ गरिएको रहेछ,’ममताले भनिन्।
बिहानदेखि ममतालाई एक्कासि डर लाग्न थालेको छ। ‘घरमा छोरा एक्लै छाडेर आएका छौँ। त्य त्रो धम्की दिएको छ पहिला। केही हुने पो हो कि,’ उनी भन्छिन्।
स्कुल जान थालेकी छन् गरिमा
गरिमाले पैसाको अभाव र मिटरब्याजीको धम्कीका कारण पढाइ छाडेकी थिइन्। अहिले उनी पुन: स्कुल जान थालेकी छन्। यसपालिको शैक्षिक सत्रबाट ममताले छोरीलाई स्कुल पठाइन्।
‘गरिमाले बोलेको र उसको कामबाट धेरै प्रशंसा पायौँ। छोरीले धेरै प्रगति गर्छे। उसको पढाइ छुटाउनु हुँदैन भन्ने लाग्यो। सरहरूलाई पनि आग्रह गरेँ। उसको पढाइ राम्रो छ। नानी अहिले पढिरहेकी छ। तर भर्नाचाहिँ गर्न सकेको छैन,’ ममता भन्छिन्।
गरिमा पनि अब पढाइ नछाड्ने बताउँछिन्।
४ महिनाअघिको भेटमा गरिमाले आफूलाई डाक्टर बन्न मन भएको बताएकी थिइन्। दु:खीहरूको इलाज गर्ने सपना रहेको बताएकी थिइन्।
तर कानमा आमालाई सुजताले दिएको धम्की बाटोभर बजिरहन्थ्यो, ‘तेरो छोरीलाई मारेर खोलामा बगाइदिन्छु।’ कक्षामा पनि उही त्रासले पढाइमा मन अडिन्न थियो। घरमा खानका लागि अन्नधरी सकिएको थियो। ‘भोकभोकै स्कुल कसरी पठाउने छोराछोरीलाई,’ आमा ममताले भनेकी थिइन्।
डेराको भाडा र स्कुलको शुल्क तिर्ने सामर्थ्य पनि थिएन।
अहिले पनि त्यो सामर्थ्य छैन ममतामा। उनलाई यति थाहा छ, ‘छोरीलाई पढाउनै पर्छ।’
मिटरब्याजीलाई सजाय भएर आतंकबाट मुक्त भएदेखिन् छोरीलाई जसरी पनि पढाइन्थ्यो भन्ने ममताको मनमा छ।
यो पनि पढ्नुहोस्:
१२ वर्षीया बालिकाले गृहमन्त्रीलाई सुनाएकी थिइन् सुजाताको मिटरब्याज आतंक, अन्तत: परिन् पक्राउ
नारायणकाजीसँग सवाल गरेकी गरिमा, जसले मिटरब्याजीको धम्कीले स्कुल छाडेकी थिइन्
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
