काठमाडौं- व्यवसायीको ३५ तोला सुनसहित पक्राउ परेका प्रहरी नायव उपरीक्षक (डीएसपी) ठगहादुर केसीलाई बर्खास्त गर्न प्रहरी प्रधान कार्यालय (हेडक्वाटर)ले गृह मन्त्रालयमा सिफारिस गरेको छ। हेडक्वाटरले गरेको आन्तरिक छानबिनका क्रममा गम्भीर गल्ती गरेको देखिएकाले उनलाई बर्खास्त गर्नुपर्ने भन्दै गृहलाई सिफारिस गरिएको हो।
नेपाल प्रहरीका केन्द्रीय प्रवक्ता तथा प्रहरी नायव महानिरीक्षक (डीआईजी) कुवेर कडायतले डीएसपी केसीलाई बर्खास्त गर्न गृहलाई परिपत्र गरिएको पुष्टि गरे। ‘सेवाबाट हटाउनुपर्ने रायसहित हामीले पत्र लेखेर गृह मन्त्रालयमा पठाइसकेका छौं। सायद केही बुझ्ने काम भइरहेको होला,’ नेपाल लाइभसँग प्रवक्ता कडायतले भने।
प्रहरी प्रधान कार्यालयको कानुन शाखाले डीएसपी केसीलाई बर्खास्त गर्नुपर्ने राय दिएपछि सोही अनुसा बर्खास्तका लागि भन्दै गृह मन्त्रालयलाई प्रहरी हेडक्वाटरले पत्राचार गरेको हो। प्रहरी ऐन तथा नियमावली २०७१ विपरीत कार्य गरेको पाइएको भन्दै डीएसपी केसीलाई बर्खास्त गर्नुपर्ने प्रहरी प्रधान कार्यालयको पत्रमा उल्लेख गरिएको छ।
करिब एक साताअघि नै प्रहरी प्रधान कार्यालयले सेवाबाट हटाउन सिफारिस गरे पनि अहिलेसम्म केसीलाई बर्खास्त भने गरिसकिएको छैन।
आफूलाई बर्खास्त गर्नेबारेको पत्र प्रहरी हेडक्वाटरले गृह मन्त्रालयमा पठाएपछि डीएसपी केसी भने बर्खास्त नगर्न भन्दै गृह मन्त्रालयमा धाएका छन्। शक्तिकेन्द्रमार्फत उनी गृहमा पहुँच लगाएर बर्खास्त हुनबाट रोकिन चलखेल गरिहेको स्रोतले जनाएको छ।
प्रहरी नियमावलीको दफा ११३ मा सेवाबाट हटाउने तथा बर्खास्त गर्न सकिनेबारे उल्लेख गरिएको छ। त्यसमा पनि भविष्यमा सरकारी सेवामा प्रवेश गर्न मिल्ने र नमिल्ने गरी हटाउन सकिने उल्लेख छ। भ्रष्टाचार प्रमाणित भएमा, नैतिक पतन देखिने फौजदारी अभियोग पुष्टि भएमा, कुनै देशको स्थायी आवासीय अनुमतिपत्र लिएमा वा लिनका लागि आवेदन दिएमा लगायतको अवस्थामा भने पुन: सरकारी सेवामा प्रवेश गर्न नमिल्ने गरी बर्खास्त गर्न सकिने नियमावलीले उल्लेख गरेको छ।
अख्तियारले भ्रष्टाचार मुद्दा दायर गर्दै
बर्खास्त हुन लागेका डीएसपी केसीविरुद्ध अख्तियार दुरुपयोग अनुसन्धान आयोगले पनि भ्रष्टाचार मुद्दा दायर गर्न लागेको छ। अनुसन्धान अन्तिम चरणमा पुगेकाले अख्तियारले केही दिनमै उनीविरुद्ध विशेष अदालतमा मुद्दा दायर गर्ने तयारी छ।
डीएसपी केसी अख्तियारलाई नै देखाउँदै अहिले नै बर्खास्त नगर्न भन्दै गृह मन्त्रालय धाइरहेका छन्। आफूविरुद्ध अख्तियारले पनि अनुसन्धान गरिरहेकाले दोषी निर्दोष पत्ता लाग्न वा अदालत गएको अवस्थामा स्वत: फैसला नहुन्जेल निलम्बनमा पर्ने भएकाले अहिले नै बर्खास्त गर्नु आफूमाथि अन्याय हुने भन्दै उनी बर्खास्त नगर्न लविइङमा लागेको स्रोतको भनाइ छ।
यता प्रहरी प्रधान कार्यालय भने अख्तियारले मुद्दा दायर गरेपछि स्वत: निलम्बनमा हुने र बाँकी कुरा अदालतमा टुंगोमा पुर्याउने हुँदा हेडक्वाटरले संरक्षण गरेजस्तो देखिने भएकाले मुद्दा दायरअघि नै बर्खास्त गर्ने रणनीतिमा छ। सोही अनुसार बर्खास्तका लागि पत्राचार गरिएको हेडक्वाटरले स्रोतले जनाएको छ।
इलाका प्रहरी कार्यालय बुटवलका तत्कालीन प्रमुख डीएसपी केसी गत पुस ११ गते ३५ तोला सुनसहित पक्राउ परेका थिए। बर्दीको आडमा व्यवसायीको ३५ तोला सुन ‘लुटेको’ आरोप लागेपछि डीएसपी केसीले सुन फिर्ताका लागि समेत रकम लिएका थिए।
रकम दिँदा समेत सुन फिर्ता नपाएपछि उक्त कुराको जानकारी प्रहरी प्रधान कार्यालयसम्म पुगेको थियो। प्रहरी प्रधान कार्यालय केन्द्रीय अनुसन्धान ब्यूरो (सीआईबी)लाई निर्देशन दिएपछि डीएसपी तपन दाहालको कमाण्डमा खटिएको टोलीले केसीलाई नियन्त्रणमा लिएको थियो।
लुटिएको ३५ तोला सुन र नगद, चेक गरी २५ लाख रुपैयाँ उनको क्वार्टरबाट बरामद भएको थियो। सुन, पैसा र चेकसहित पक्राउ परेका उनलाई प्रहरी प्रधान कार्यालयले निलम्बनका लागि गृह मन्त्रालयलाई सिफारिस गरेको थियो। मन्त्रालयले पुस १४ गते नै उनलाई निलम्बन गरेको थियो।
बर्दीको आडमा लुटिएको सुन र पैसा (प्रमाण तथा दसी) सहित पक्राउ परे पनि उनीमाथि भने प्रहरी प्रधान कार्यालयले विभागीय कारबाही प्रक्रिया मात्रै अघि बढाएको थियो। तत्कालीन एसएसपी (हाल डीआईजी) चन्द्रकुवेर खापुङको नेतृत्वमा छानबिन समिति बनाइएको थियो। खापुङ नेतृत्वको समितिले डीएसपी केसीलाई फौजदारी कसुरमा मुद्दा चलाउनुपर्ने देखिएको भन्दै प्रतिवेदन बुझाएको थियो।
खापुङ नेतृत्वको समितिले डीएसपी केसीले बदनियत राखेको भन्दै फौजदारी कसुरमा मुद्दा चलाउनुपर्ने राय दिएको थियो। ‘व्यवसायीको सुन नियन्त्रणमा लिनु र सुन फिर्ता लिनका लागि रकम समेत लिएकाले भ्रष्टाचारअन्तर्गत कारबाही हुनुपर्ने’ खापुङ नेतृत्वको समितिले बताएपछि छानबिन गरी कारबाही गर्न भन्दै प्रहरी प्रधान कार्यालयले अख्तियारलाई सिफारिस गरेको थियो।
करिब ३ महिना लामो अनुसन्धानका क्रममा डीएसपी केसीले भ्रष्टाचारजन्य काम गरेको प्रमाणहरु देखिएको भन्दै अख्तियारले उनीविरुद्ध मुद्दा दर्ता गर्न लागेको हो।
डीएसपी केसीको सम्पत्तिहरुको विवरण, बैंकिङ स्टेटमेन्टलगायत सबै विवरण अख्तियारले केलाइसकेको छ। सो क्रममा भ्रष्टाचारजन्य काम गरेको पुष्टि हुने आधारहरु भेटिएकाले उनीमाथि मुद्दा दर्ताको तयारी गरिएको हो। अनुसन्धान अन्तिम चरणमा पुगेकाले केही दिनमै मुद्दा दर्ता हुने स्रोतले जानकारी दियो।
डीएसपी ठगबहादुरलाई फौजदारी कसुरमा कारबाही गर्न समितिको सिफारिस
डीएसपी ठगबहादुरमाथि छानबिन गर्न समिति गठन
‘कर्मकाण्ड’ गरेर डीएसपी ठगबहादुरलाई उन्मुक्ति?
बुटवलका डीएसपी ठगबहादुर केसी ३५ तोला सुनसहित पक्राउ
बर्दीको आडमा फौजदारी कसूर: सर्वोच्चले सुरक्षा निकायलाई भन्यो– विभागीय कारबाही गरेर मात्रै पुग्दैन
३५ तोला सुनसहित पक्राउ परेका डीएसपी ठगबहादुरविरुद्ध अख्तियारले मुद्दा दायर गर्दै
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
