काठमाडौं - नेपाल प्रिमियर लिग (एनपीएल)मा सहभागी हुने पाकिस्तानी खेलाडीको सहभागिता अन्योलमा परेको छ। पाकिस्तान क्रिकेट बोर्ड (पीसीबी)ले खेलाडीलाई नेपालमा खेल्न आवश्यक एनओसी दिने प्रक्रिया रोकेपछि उनीहरूको सहभागितामा अनिश्चितता बढेको हो।
क्रिकइन्फोका अनुसार एनपीएलसँग सम्बन्धित विभिन्न व्यक्तिले यसअघि एनओसी पाइसकेका खेलाडीलाई समेत प्रतियोगितामा सहभागी हुने अनुमति तत्कालका लागि रोकिएको जानकारी दिइएको बताएका छन्।
पीसीबीले पाकिस्तानी खेलाडीलाई एनओसी उपलब्ध गराउन शुल्क मागेको हुन सक्ने पनि एनपीएलसँग सम्बन्धित व्यक्तिहरूले बताएका छन्। प्रत्येक खेलाडीका लागि करिब २५ हजार अमेरिकी डलर शुल्क मागिएको हुन सक्ने उनीहरूको भनाइ छ। यद्यपि, पीसीबीले यस्तो शुल्क माग गरेको लिखित प्रमाण भने क्रिकइन्फोले पुष्टि गर्न सकेको छैन।
यस वर्षको एनपीएल अक्टोबर २६ देखि नोभेम्बर २१ सम्म सञ्चालन हुँदैछ। आठ टोली सहभागी हुने प्रतियोगिताका खेल काठमाडौंमा आयोजना हुनेछन्।
प्रतियोगितामा खेल्नुपर्ने केही पाकिस्तानी खेलाडी काठमाडौं आइसकेका छन्। नेपाल आउन तयारीमा रहेका अन्य खेलाडीले भने समस्या समाधान नभएसम्म आफ्नो यात्रा स्थगित गरेको बुझिएको छ।
एनओसी रोक्नुको कारण शुल्कसम्बन्धी विवाद हो वा अन्य कुनै विषय, त्यसबारे स्पष्ट भइसकेको छैन। यस विषयमा प्रतिक्रिया माग्दै क्रिकइन्फोले गरेको आग्रहमा पीसीबीले तत्काल जवाफ नदिएको समाचारमा उल्लेख छ।
पाकिस्तानका टी–२० कप्तानसहितका खेलाडी प्रभावित
एनपीएलमा सहभागी हुने पाकिस्तानी खेलाडीमा राष्ट्रिय टी–२० टोलीका कप्तान साहिबजादा फरहानसहित हैदर अली, हुनैन शाह, हुसेन तलत, इफ्तिखार अहमद, हसन अली र उसामा मिर छन्।
क्रिकइन्फोका अनुसार यीमध्ये कुनै पनि खेलाडी एनपीएलसँग मिति जुध्ने पाकिस्तानको राष्ट्रिय टोलीमा समावेश छैनन्। त्यसैले अन्तर्राष्ट्रिय खेलको समयतालिका नै उनीहरूको सहभागितामा अवरोधको कारण देखिएको छैन।
टी–२० विशेषज्ञलाई विदेशी लिग खेल्न सहज बनाउने नीति
पीसीबीले यसै वर्ष खेलाडीको केन्द्रीय सम्झौतासम्बन्धी नयाँ संरचना घोषणा गरेको थियो। उक्त संरचनामा सीमित ओभरको क्रिकेट र टेस्ट क्रिकेट खेल्ने खेलाडीलाई छुट्टाछुट्टै वर्गीकरण गरिएको थियो।
त्यसमा ‘फर्म्याट ट्र्याक डी’ नामको वर्ग पनि समावेश थियो, जसअन्तर्गतका खेलाडीलाई टी–२० विशेषज्ञका रूपमा राख्ने अवधारणा अघि सारिएको थियो। यस्तो वर्गीकरणमा पर्ने खेलाडीले पीसीबीले तोकेको अन्तर्राष्ट्रिय जिम्मेवारीसँग खेल नजुध्ने अवस्थामा आफूले चाहेका विभिन्न टी–२० लिगमा खेल्न पाउने व्यवस्था रहेको बताइएको छ।
तर, पीसीबीले कुन खेलाडी कुन वर्गमा पर्छन् भन्ने सार्वजनिक गरेको छैन। नयाँ सम्झौता संरचना कार्यान्वयनमा आइसकेको छ वा छैन भन्ने विषय पनि स्पष्ट छैन।
एनपीएलमा सहभागी हुन लागेका पाकिस्तानी खेलाडी हाल पाकिस्तानको एकदिवसीय अन्तर्राष्ट्रिय (ओडीआई) वा टेस्ट टोलीको योजनामा नरहेको क्रिकइन्फोले उल्लेख गरेको छ।
एनओसीसम्बन्धी अन्योल कायमै रहेकाले प्रतियोगितामा पाकिस्तानी खेलाडीको सहभागिता सुनिश्चित हुन सकेको छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
