काठमाडौं - महिला हिंसासहितका विभिन्न आरोपमा मुछिएका राष्ट्रिय स्वतन्त्र पार्टी (रास्वपा)का केन्द्रीय सदस्य तथा सांसद खगेन्द्र सुनारले आरोप अस्वीकार गरेपछि पार्टीको अनुशासन आयोगलाई अनुसन्धान अघि बढाउन थप प्रमाण जुटाउनुपर्ने भएको छ। सार्वजनिक भएको अडियो आफ्नो नभएको र आफूविरुद्ध षड्यन्त्र भएको दाबी सुनारले गरेपछि आयोगले अडियोको प्राविधिक परीक्षणदेखि सम्बन्धित व्यक्तिहरूसँग थप सोधपुछसम्मका विकल्पमा छलफल थालेको छ।
सुनारमाथि लागेका आरोपबारे अनुसन्धान गर्न पार्टीले पत्र पठाएपछि अनुशासन आयोगले उपप्रमुख एवं प्रवक्ता अधिवक्ता हरिचन्द्र भट्टराईको संयोजकत्वमा छ सदस्यीय छानबिन समिति गठन गरेको थियो। समितिले सार्वजनिक रूपमा उठेका प्रश्न र आरोपबारे लिखित जवाफ माग्दा सुनारले आरोप अस्वीकार गर्दै प्रतिक्रिया दिएका हुन्।
समितिका संयोजक भट्टराईका अनुसार सुनारले आरोप स्वीकार नगरेपछि अब सार्वजनिक सामग्रीको सत्यता परीक्षण र थप प्रमाण संकलनमा केन्द्रित हुनुपर्ने भएको छ।
‘अडियोका सन्दर्भमा पत्राचार गरेका थियौं। यस्तो खालको अडियो आयो, यस्ता किसिमका प्रश्न उठेका छन्, यस विषयमा के कस्तो हो भनेर उहाँको प्रतिक्रिया मागेका थियौं,’ भट्टराईले भने, ‘उहाँको इन्कारी प्रतिक्रिया आयो। अब अन्य प्रमाण खोज्नुपर्ने भयो। यो विषयमा अनुसन्धान थप गहिराइमा जानुपर्ने अवस्था छ।’
सुनारसम्बन्धी विवाद जनआस्थाले अडियो र बैंकिङ कारोबारको विवरणसहित समाचार प्रकाशित गरेपछि सार्वजनिक भएको थियो। समाचारमा सुनारले एक महिलालाई अश्लील गालीगलौज गरेको, पैसा मागेको र ज्यान मार्ने धम्की दिएको सुनिने अडियो सार्वजनिक गरिएको थियो। त्यस्तै, बिहे गर्ने प्रलोभनमा पारी अश्लील भिडियो तथा तस्बिर बनाएर ब्ल्याकमेल गरेको आरोप पनि समाचारमा उल्लेख थियो। यी आरोपको स्वतन्त्र पुष्टि भने अनुसन्धानबाट हुन बाँकी छ।
विवाद सार्वजनिक भएपछि रास्वपा महामन्त्री विपिन आचार्यले विषयलाई गम्भीर र संवेदनशील भन्दै अनुसन्धानको जिम्मेवारी अनुशासन आयोगलाई दिएका थिए। महिलाको मर्यादा र सम्मानमा आँच पुर्याउने कार्य, अनुचित दबाब, धम्की तथा शंकास्पद आर्थिक कारोबारसम्बन्धी आरोपलाई पार्टीले सामान्य रूपमा नलिने उनको भनाइ थियो।
पार्टीले अनुसन्धान प्रक्रिया अघि बढाउँदै सुनारलाई केन्द्रीय सदस्य र सांसदको हैसियतमा कुनै पनि कार्यक्रममा सहभागी नहुन निर्देशनसमेत दिएको थियो।
महिलाको अन्तर्वार्ता र अडियो परीक्षणमा चासो
अनुसन्धानका क्रममा समितिले सुनारको भनिएको अडियोसहितका सामग्री बुझ्न जनआस्थाको कार्यालयमा पुगेर आवश्यक विवरण लिएको थियो। त्यसैगरी, पीडित भनिएकी महिलाले न्यूज २४ टेलिभिजनको ‘सिधा कुरा’ कार्यक्रममा दिएको अन्तर्वार्ताको अडियो उपलब्ध गराउन पत्राचार गरेको छ। तर, समितिले उक्त अडियो प्राप्त गरिसकेको छैन।
सुनारले आरोप अस्वीकार गर्नु र महिलाले टेलिभिजन अन्तर्वार्तामा हिंसा नभएको बताएको विषयलाई समेत समितिले अनुसन्धानको दायरामा राखेको छ। त्यसैले सार्वजनिक अडियो, सम्बन्धित व्यक्तिका भनाइ र उपलब्ध अन्य प्रमाणबीचको सम्बन्ध पहिल्याउनु समितिका लागि महत्त्वपूर्ण हुने देखिएको छ।
समितिका एक सदस्यले इन्कारी बयान र महिलाको अन्तर्वार्तापछि अनुसन्धान थप गहिराइमा लैजानुपर्ने अवस्था आएको बताए। यद्यपि, उपलब्ध सामग्रीका आधारमा महिलाले पहिले दिएको भनाइबाट पछि हटेको वा कुनै दबाबमा परेको निष्कर्ष निकाल्न नसकिने समितिको अनुसन्धान प्रक्रियाले स्पष्ट पार्नुपर्ने हुन्छ।
संयोजक भट्टराईले सुनारले आरोप लगाइएअनुसारका काम नगरेको भए उनको मानमर्दन र छविमा क्षति पुगेको हुन सक्ने पक्षलाई पनि अनुसन्धानमा ध्यान दिइने बताए।
‘उहाँले भनेको होइन भने त उहाँको मानमर्दन भयो, छविको क्षयीकरण हुन्छ। त्यसैले पनि यो विषय गहिरोसँग हेर्नुपर्ने जिम्मेवारी समिति समक्ष छ,’ भट्टराईले भने।
प्राविधिक परीक्षणपछि अनुसन्धानले दिशा लिने
सुनारको भनिएको अडियोको प्रामाणिकता यकिन गर्न प्राविधिक परीक्षण गर्ने विषयमा समितिभित्र छलफल भइरहेको छ। तर, परीक्षण गर्ने वा नगर्ने भन्नेबारे औपचारिक निर्णय भइसकेको छैन।
न्यूज २४ बाट महिलाको अन्तर्वार्ताको अडियो प्राप्त भएपछि समितिको बैठक बसेर परीक्षणलगायतका थप अनुसन्धान प्रक्रियाबारे निर्णय लिइने भट्टराईले बताए। सुनारसँग अडियोको विषयमा थप सोधपुछ गर्ने तयारी पनि समितिको छ।
समितिमा संयोजक भट्टराईसहित रामचन्द्र कार्की, सुशीला सिम्खडा, सन्तोष आचार्य, सन्तोष विशुंके र उपेन्द्र नन्दन तिमिल्सिना सदस्य छन्।
सुनारले आरोप अस्वीकार गरिसकेको अवस्थामा सार्वजनिक अडियोको स्रोत, त्यसको प्रामाणिकता, सम्बन्धित व्यक्तिका बयान र अन्य उपलब्ध प्रमाणको परीक्षण अनुसन्धानका मुख्य विषय बन्नेछन्। आयोगले संकलित प्रमाणका आधारमा निष्कर्ष निकाल्नुपर्ने भएकाले तत्कालै आरोप पुष्टि भएको वा निराधार रहेको निष्कर्षमा पुग्ने अवस्था छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
