नुवाकोट- संस्कृति, पर्यटन तथा नागरिक उड्डयन राज्यमन्त्री सुशीला सिर्पाली ठकुरीले रोपाइँले कृषिलाई पर्यटनसँग जोड्न पहल गरेको बताएकी छन्। नुवाकोटमा आयोजित रोपाई महोत्सवको उद्घाटन गर्दै सिर्पालीले कृषि पर्यटनका लागि पहल भएको बताएकी हुन्।
सिर्पालीले कृषकको पक्षमा सरकार रहेको, राज्यले नेपाली कृषकको उपजमा कर नलगाएको र कृषिलाई पर्यटनसँग जोड्न सके समग्र देशको र किसानको आर्थिक समृद्धि सम्भव भएको बताइन्।
पर्यटन देशको आर्थिक मेरुदण्ड भएकोले कृषिलाई पर्यटनसँग जोड्नुपर्ने बताउँदै उनले कृषिमा आत्मनिर्भरताका लागि समेत प्रेरित गर्न आफू धान रोपाईं कार्यक्रममा सहभागी भएको बताइन्।
‘रोपाइँ हाम्रो संस्कृति हो। धानमा नेपाललाई आत्मनिर्भर बनाउन लाग्नुपर्छ। पर्यटनलाई स्थानीय कृषि उपजसँग जोड्नुपर्छ। हाम्रो संस्कृति, सम्पदा, प्रकृतिसँगै कृषिलाई पनि पर्यटनसँग समेट्नुपर्छ,’ उनले भनिन्।
राष्ट्रिय धान दिवस तथा रोपाइँ महोत्सवको उपलक्ष्यमा नुवाकोटको बेलकोटगढीमा राष्ट्रिय रोपाइँ महोत्सव आयोजना गरिएको थियो। बेलकोटगढी नगरपालिका र गाउँ पर्यटन प्रवर्धन मञ्च नेपाल, प्रधानमन्त्री कृषि आधुनिक परियोजनाको आयोजना र नेपाल पर्यटन बोर्डले प्रायोजन गरेको रोपाइँ महोत्सवमा नुवाकोटका प्रमुख जिल्ला अधिकारी, बेलकोटगढी नगरपालिकाका मेयर लगायत विभिन्न पर्यटन व्यवसायी संगठनका प्रतिनिधि र व्यवसायी, स्थानीय नागरिकको सहभागिता थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778080750-1778115325.jpg)
-1764146706.png)
