काठमाडौं- खानेपानी, सरसफाइ र स्वच्छताका विषयमा बन्न लागेका कानुनमा देखिएका कमजोरी सच्याउनुपर्ने सरोकारवालाले बताएका छन्। युनिसेफ तथा यूके एडको सहयोगमा लुमन्ती आवासको लागि सहयोग समूहको तर्फबाट ललितपुरमा आयोजित कार्यक्रमका सहभागीहरुले खानेपानी, सरसफाइ र स्वच्छतासँग सम्बन्धित कानुन बनाउने सरकारको अग्रसरता राम्रो भए पनि कानुन पर्याप्त नहुनु दुखद भएको बताएका हुन्।
कार्यक्रममा बाग्मती, कोशी र लुम्बिनी प्रदेशका ‘वास महिला सञ्जाल’का संयोजक तथा सदस्यहरू, विकास साझेदार, सरकारी तथा गैरसरकारी संस्था, यूएन एजेन्सीहरू, लैङ्गिक समता तथा सामाजिक समावेशीकरण कार्य समूहका सदस्य लगायतको सहभागिता थियो।
खानेपानी र सरसफाइ तथा स्वच्छता सम्बन्धी नीतिमा लैङ्गिक समता र सामाजिक समावेशीकरणको अवस्थाको अध्ययन प्रतिवेदनमाथिको छलफलका सहभागीले सङ्घीय सरकार र प्रदेश सरकारहरूले बनाउन लागेका नीति र प्रस्तावित विधेयकमा परिमार्जन आवश्यक रहेको उनीहरूको भनाइ छ।
सरकारी प्रस्तावित विधेयकको समीक्षा प्रतिवेदन सार्वजनिक गर्दै उपप्राध्यापक रविन बास्तोलाले नेपालमा खानेपानी, सरसफाइ र स्वच्छतासम्बन्धी नीति नियममा लैङ्गिक समता र सामाजिक समावेशीकरणका प्रावधान अपर्याप्त रहेको बताए। सङ्घीय सरकारले बनाउन लागेको नियमावली र प्रदेश सरकारले तयार पारिरहेको विधेयकमा लैङ्गिक समता र सामाजिक समावेशीकरण (जेसी)प्रति प्रतिबद्धता जनाए पनि प्रावधानहरू अपर्याप्त रहेकाले संशोधन गर्न सुझाव दिइएको उनले बताए।
लुमन्तीका प्रोग्राम म्यानेजर उद्धव भट्टराईले लैङ्गिक समता र सामाजिक समावेशीकरणको दृष्टिकोणबाट उपयुक्त सिफारिसहरू गर्ने हेतुले राष्ट्रिय र प्रादेशिक नीति तथा कानुनको समीक्षा गरिएको बताए। उनले समीक्षाबाट कोशी, वाग्मती र लुम्बिनी प्रदेशका खानेपानी, सरसफाइ तथा स्वच्छता विधेयकलाई अन्तिम रूप दिन प्राविधिक सहयोग पुग्ने उल्लेख गरे।
कार्यक्रममा युनिसेफका वास प्रमुख मोहम्मद इरफान सइद अलराइले युनिसेफ सबै प्रकारका विभेदविरुद्ध क्रियाशील रहेको र यसका लागि सबैसँग हातेमालो गर्दै अघि बढ्ने बताए।
बागमती प्रदेश सरकारका सिनियर डिभिजनल इन्जिनियर लोकबहादुर चापागाईँले खुला दिशामुक्त घोषणा कार्यक्रम पछि खानेपानी, सरसफाइ र स्वच्छताको अभियान सुस्ताएको जस्तो महसुस भएको भन्दै यो विषयमा सबै जना सक्रियतापूर्वक लाग्नुपर्ने धारणा राखे।
महिला वास सञ्जाल लुम्बिनी प्रदेश संयोजक भगवती अधिकारी, बागमती प्रदेश संयोजक टीका उप्रेती र कोशी प्रदेश संयोजक गीता अधिकारीले महिला वास सञ्जालको गठन पश्चात् खानेपानी, सरसफाइ र स्वच्छताको बुझाई बढेको र हाल भोगेका समस्यालाई सशक्त रूपमा पैरवी गर्न हौसला मिलेको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789386153.jpg)
-1786602170.png)
