काठमाडौं- एक लागुऔषध प्रयोगकर्ताको सूचनाबाट सुरु भएको अनुसन्धानले लागुऔषध ब्यूरोले ठूलो मात्रामा लिसर्जिक एसिड डाइएथिलेमाइड (एलएसडी) ड्रक्ससहित पाँच जनालाई पक्राउ गरेको छ।
ती लागुऔषध प्रयोगकर्ताले प्रहरीलाई काठमाडौंमा एलएसडी ड्रक्सको कारोबार हुने गरेको सूचना प्रहरीलाई दिए। त्यसपछि ब्यूरोले एसएसडी ड्रक्सविरुद्ध अपरेसन गर्न प्रहरी टोली परिचालन गरेको थियो।
काठमाडौंका विभिन्न ठाउँहरुमा ट्रान्सपार्टी आयोजना हुने र त्यसमा एलएसडी ड्रग्स प्रयोग हुने गरेको पूर्वसूचना प्रहरीलाई थियो। नेपाली-विदेशी सहितको ट्रान्सपार्टी केही समयअघि बुढानीलकण्ठस्थित नारायणथानमा भयो। अवैध रहेको यो ट्रान्सपार्टीमा ब्यूरोको टोली परिचालन भए पनि भित्रसम्म प्रवेश गर्न सकेन।
यो अपरेसन असफल भयो। त्यसको केही समयपछि फेरि मकवानपुरको चित्लाङमा ट्रान्सपार्टी भएको सूचना आएपछि ब्यूरोको टोली चित्लाङ पुगे पनि कुनै एलएसडी ड्रक्स बरामद गर्न सकेन। त्यसको केही समयपछि काठमाडौंकै एक रात्रि क्लबमा ट्रान्सपार्टी भएको र त्यहाँ नेपालकै उच्च तहका व्यक्तिहरु समेत सामेल भएको सूचना प्रहरीलाई आयो।
ब्यूरोको टोली उक्त क्लबमा पुगे पनि यो अपरेसन पनि सफल हुन सकेन। तीन पटकको अपरसन असफल भएको प्रहरीले असार ५ गते भने एउटा सफलता हात पार्यो।
असार ५ गते काठमाडौंको ठमेलस्थित सातघुम्ती सडकबाट काठमाडौंको चन्द्रागिरि घर भएका २९ वर्षीय सुगम मैनाली ७ पिस एलएसडी ड्रग्ससहित पक्राउ परे। मैनाली पक्राउ परेपछि प्रहरीले थप अपरेसन चलाएर यो प्रकरणमा विदेशी नागरिकसहित पाँच जनालाई पक्राउ गरेको छ।
मैनाली पक्राउ परेपछि सोही दिन उनकै सूचनाको आधारमा प्रहरीले ठमेलबाटै काठमाडौं घर भएका ४२ वर्षीय मुखिया गुरुङलाई पक्राउ गर्यो। मुखियालाई याबा भन्ने ड्रग्समा यसअघि ब्यूरोले नै २०७५ सालमा पक्राउ गरेको थियो। त्यसपछि उनी २७ महिना जेल बसेर निस्केका थिए।
मैनालीले एलएसडी आफूले पोखराबाट ल्याएको सूचना प्रहरीलाई चुहाए। त्यसपछि पोखराबाट प्रहरीले विराटनगर घर भएका २६ वर्षीय बच्चन भनिने राज गौतम र चेक रिपब्लिककी नागरिक ३२ वर्षीया मार्टिना शेरेनालाई एलएसडी २६ पिससहित पक्राउ गरिएको थियो।
उनीहरुबाट एम्फेटामाइन ४०० एमजीको पनि बरामद भएको थियो। उनीहरुलाई पोखराको एक होटलबाट पक्राउ गरिएको थियो। पक्राउ परेका दुवै जनालाई जिल्ला प्रहरी कार्यालय पोखराको जिम्मा लगाइयो।
उनीहरु पक्राउ परेपछि इटालियन नागरिक पनि ठूलो मात्रामा एलएसडीसहित पक्राउ परे। इटालियन नागरिक ३४ वर्षीय डेभिड मिनाडिओ ठमेल सातघुम्तीबाट ६ ग्राम चरेशसहित पक्राउ परेका थिए। उनीमाथि थप अनुसन्धान गर्दा उनी बस्ने होटलबाट एलएसडी स्टिकर १० हजार ९८ थान, एम्फेटामाइन ३८ ग्राम, भारतीय रुपैयाँ १ लाख ३९ हजार, युरो ७००, टर्किस ५३० रुपैयाँ र थाई भाट ५० बरामद भयो।
नेपाल भित्र्याउने डेभिड, बेच्ने बच्चन
एलएसडी नेपाल भित्र्याउने मुख्य व्यक्ति इटालियन नागरिक डेभिड रहेको पाइएको छ। उनले भारतबाट स्थलमार्ग हुँदै एलएसडी ड्रग्स भित्र्याउने गरेको ब्यूरोका एसपी चक्रराज जोशीले बताए।
नेपाल-भारत पटकपटक ओहोरदोहोर गरिररहेको गरेको पनि पाइएको छ। त्यसैगरी हवाई मार्ग हुँदै ५/६ पटक नेपाल आएको पनि अध्यागमनबाट खुलेको देखिएको प्रहरीले जनाएको छ।
डेभिडले एलएसडी नेपाल भित्र्याएपछि बच्चनलाई बेच्ने गरेको पाइएको छ। होलसेलरको रुपमा एलएसडी ल्याएर उनले बच्चनलाई बेच्ने गरेको पाइएको छ। त्यसपछि बच्चन ट्रान्सपार्टीहरुमा कमिसन खाँदै यो ड्रग्स बेच्ने गरेको प्रहरीले जनाएको छ।
के हो एलएसडी ड्रग्स?
यो निकै महँगो हुने र धनाढ्य तथा सेलिब्रेटीहरुले प्रयोग गर्ने भएकाले यसलाई सेलिब्रेटी ड्रग्सको रुपमा समेत चिनिने प्रहरीले जनाएको छ। यो ड्रग्स स्टिकर, ट्याबलेट लगायत विभिन्न अकारमा पाइने गर्छ। नेपाल प्रहरी बरामद भएको ड्रग्स भने स्टिकर आकारको हो।
यसको सानो टुक्रा जिब्रो तथा शरीरको कुनै भागमा टाँस्दा नसा दिन्छ। यो ड्रग्सले एक पटकको ९ घण्टासम्म नसा दिने गर्छ। यो हार्ड ड्रग्सको रुपमा चिनिन्छ।
यो एक प्रकारको कृत्रिम भ्रमात्मक असर दिने लागुऔषध हो। एलएसडी अक्सर गरेर रङ, स्वाद, बास्नारहित झोल पदार्थ हो। यो हल्का सेतो पाउडर वा सेतो रंगीन आकार ट्याबलेट तथा क्याप्सुल तथा स्टिकरको रुपमा पाइन्छ। सानो परिणाममा यसको झोललाई सोस्ने कागज, टिकट वा टाँस्ने कागजमा टाँसेर स्टिकर बनाई प्रयोग गर्ने गरेको पाइन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1732445217.webp)
-1764146706.png)
