काठमाडौं– क्लबलाई जानकारी नै नगराइ छुट्टी मनाउन साउदी अरब निस्किएपछि पेरिस सेन्ट जर्मेन (पीएसजी)ले लियोनल मेसीमाथि कठोर नीति नै लियो। करिब एक महिनाअघि बिना जानकारी मेसी साउदी पुगेपछि पीएसजीले उनलाई २ साता प्रतिबन्ध नै लगायो।
क्लबले कारबाही गरेको केही दिनपछि मेसीले आफूबाट गल्ती भएको भन्दै माफी मागेपछि पीएसजीले कारबाही फिर्ता गरेको थियो। अकस्मात बिना जानकारी साउदीको भ्रमणमा निस्कनुलाई निकै संशयपूर्ण तरिकाले लिँलै उनको ट्रान्सफरसँग जोडेर हेरिएको थियो।
अहिले उक्त घटना सत्य साबित हुन लागेको अन्तर्राष्ट्रिय सञ्चार माध्यममले दाबी गर्दै रिपोर्टहरु प्रकाशित गरेका छन्। मिरर न्युज पोर्टलले मेसी साउदीको क्लब अल हिलालमा अनुबन्धन हुने र केही दिनमै यसको घोषणा हुने दाबी गरेको छ।
क्लर्मन्टविरुद्ध अन्तिम खेल खेल्दै शनिबारबाट मेसी पीएसजीबाट औपचारिक रुपमै बिदा भएका छन्। पीएसजीबाट औपचारिक रुपमा मेसीको बिदाइ हुँदा यता साउदी क्लब अल हिलालले केही दिनमै मेसीलाई स्वागत गर्ने तयारी गरेको दाबी मिररको छ।
मेसीले पछिल्लो दुई सिजन फ्रान्सेली जायन्टस् लिग वान विजेता पीएसजीमा आबद्ध रहँदै २ लिग वान टाइटल जितेका छन्। तर पनि पेरिसमा मेसीको प्रशंसाभन्दा बढी विरोध हुने गरेको थियो।
फुटबल फ्यानहरुले मेसीको आलोचना गरिरहे। च्याम्पियन्स लिग जित्ने लक्ष्यसहित कीर्तिमानी मूल्यमा पीएसजीले मेसीलाई अनुबन्धन गरेको थियो। तर च्याम्पियन्स लिगको ट्रफी उचाल्ने पीएसजीको सपना साकार हुन सकेन।
पीएसजीसँगको सम्झौता सकिएसँगै धेरै क्लबहरु अहिले मेसीलाई भित्र्याउन लागिपरेका छन्। जसमध्ये अल हिलाल अग्रस्थानमा छ। साउदी प्रो लिग पक्षले मध्यपूर्वमा आफ्नो करियर समाप्त गर्न कीर्तिमानी सम्झौताको प्रस्ताव गरेको छ।
‘अल हिलालको तयारी हेर्दा यस्तो लाग्छ, उनीहरु अर्जेन्टिनी सुपरस्टारसँगको सम्झौताको नजिक पुगेका छन्। अब उनको आगमनको घोषणा मितिमात्रै तय हुन बाँकी छ,’ मिररले लेखेको छ, ‘अल हिलालले मंगलबार मेसीलाई अनुबन्धनको रुपमा परिचय गराउने छ।’
मेसीको अन्तिम स्वीकृती प्राप्त गर्न र मध्यपूर्वमा बसोबास गर्ने प्रक्रिया सुरु गर्न साउदी पक्षले यो मिति तय गरेको दाबी गरिएको छ। मेसीलाई कसैले ‘हाइज्याक’ नगरोस् भनेर जतिसक्दा चाँडो अनुबन्धनको घोषणा गर्ने अल हिलालको चाहना छ। अल हिलालले मेसीलाई विश्वकै सबैभन्दा बढी कमाउने खेलाडी बनाउने किसिमको अविश्सनीय प्रस्ताव राखेको छ। हरेक वर्षका लागि ४०० मिलियन यूरोको प्रस्ताव हिलालले मेसीलाई गरेको छ।
यता बार्सिलोना पनि मेसीलाई भित्र्याउन जोडतोडले लागेको छ। भित्री रुपमा बार्सिलोना मेसी ल्याउन लागि परे पनि औपचारिक प्रस्ताव गर्न बार्सिलोनाले सकेको छैन।
बार्सिलोनाले स्पेनिस र युरोपेली फुटबलमा आफ्नो दबदबा राख्दा मेसीका सहयात्री रहेका जाभी अहिले बार्सिलोनाको मुख्य प्रशिक्षक छन्। जाभी र मेसीको सम्बन्ध पनि राम्रो रहेको छ।
मेसीलाई फर्काउन जाभी लागि परेका छन्। त्यसका लागि जाभीले क्बलका अध्यक्ष जोन लापोर्टालाई पनि आग्रह गरेका छन्।
त्यसो त मेसी र लापोर्टाको सम्बन्ध पनि राम्रो छ। मेसीले विश्वकपको ट्रफी उचाल्नासाथ लापोर्टाले ट्वीटरमा मेसीलाई बधाई दिएका थिए। ‘बधाई छ लियो! यसका लागि तिमी योग्य थियाौ। यो क्षणका लागि फुटबल ऋणी छ’, उनले लेखेका थिए।
बार्सिलोनाको अध्यक्षमा निर्वाचित भएपछि लापोर्टाले मेसीलाई बार्सिलोनामै राख्नका लागि हर प्रयास गरेका थिए। बार्सिलोना छाड्नुपर्दा मेसी पनि भावुक भएका थिए। मेसीलाई पनि यो थाहा छ कि बार्सिलोनामा रहँदा उनले सबथोक क्लबबाट पाएका थिए भने उनले पनि क्लबका लागि सबैथोक दिएका थिए।
बार्सिलोनामा रहँदा ४ वटा च्याम्पियन्स लिग, १० ला लिगा, ७ कोपा डेल रे, ३ क्लब वर्ल्डकप, ३ युरोपियन्स सुपर कप र ८ स्पेनिस सुपर कपको उपाधि मेसीले जितेका थिए।
‘मलाई कुनै संका छैन कि यदि मेसी फर्कने हो भने उसले हामीलाई हाम्रो फुटबलबाट हाँसिल गर्न चाहेको कुरामा मद्दत गर्नेछ। मलाई कुनै संका छैन र मैले अध्यक्षलाई यो कुरा भनेको छु। उहाँ पनि दृढ हुनुहुन्छ। मेसीमा अझै उपाधीको भोक देखिन्छ,’ जाभीले भनेका छन्।
जाभीले थपेका छन्, ‘उनी अझै पनि एक विजेता हुन्। खेलाडीका नेता पनि हुन्। बार्सिलोनामा हामी २०१० को बेला शिखरमा थियौं। त्यसपछि भने हामीसँग समान स्तर छैन। यसमा कुनै शंका छैन कि उहाँले हामीलाई अझै धेरै मद्दत गर्नुहुनेछ। तर अन्तमा यो सबै उहाँ (मेसी)मा निर्भर गर्दछ।’
‘उहाँका बिचार के छ मलाई थाहा छैन। तर म उहाँसँगको मेरा सम्बन्धको बारेमा धेरै स्पष्ट छु। हामीसँग ढोका खुल्ला छ। यदि यहाँ आउन चाहानुहन्छ भने मलाई कुनै शंका छैन कि उहाँबाट टिमलाई धेरै मद्दत हुनेछ। तर यो सबै उहाँमा निर्भर छ। यो उहाँको व्यक्तिगत छनोट हो,’ मेसीको बार्सिलोना र्फितीबारे जाभीले भनेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1766648928.png)
