काठमाडौं– विश्वकप फुटबलको ट्रफी उचालेपछि लियोनल मेसीले पेरिस सेन्ट जर्मेन (पीएसजी)सँगको सम्झौता थप गर्ने मनस्थिति बनाएका थिए। जारी सिजनको अन्त्य अर्थात् आगामी जुन ३० मा फ्रेन्च लिग वान क्लब पीएसजीसँगको सम्झौता सकिँदै गर्दा सम्झौता लम्ब्याउन चाहेको खबर विश्वकपको ट्रफी उचालेपछि बाहिरिएको थियो।
तर, अहिले एकाएक परिस्थिति फरक बनेको छ। मेसीले पीएसजीसँगको सम्झौता लम्ब्याउन नचाहेको खबर बाहिरिएका छन्। स्पेनको चर्चित स्पोर्टस् पत्रिका मार्कादेखि अन्य मिडियाहरुले मेसीले पीएसजीसँगको सम्झौता लम्ब्याउन नचाहेको समाचार प्रकाशित गरेका छन्। मार्काले चर्चित स्पोर्टस् पत्रकार जेरार्ड रोमेरोलाई उदृत गर्दै मेसीले पीएसजीसँग थप सम्झौता नगर्ने र बार्सिलोना फर्किन सक्नेबारे समाचार सम्प्रेषण गरेको छ।
विश्वकप सकिएलगत्तै पीएसजीका अध्यक्ष नासेर अल खेलाइफीले मेसीको निरन्तरताबारे छलफल गरेका थिए। पहिलो सिजन त्यति जम्न नसकेका मेसीले दोस्रो सिजन पीएसजीमा उत्कृष्ट प्रदर्शन गरिरहेका छन्। च्याम्पियन्स लिग जित्ने लक्ष्यसहित पीएसजी भित्रिएका मेसी अर्को सिजन समेत रहन सक्ने अनुमान गरिएको थियो। तर, अहिले परिस्थिति फेरिएको दाबी गरिएको छ।
जसकारण अहिलेसम्म ३५ वर्षीय स्टार अर्जेन्टाइन स्ट्राइकर मेसीको भविष्य अन्योल रहेको बताइन्छ। सन् २०२१ मा स्पेनिस क्लब बार्सिलोनबाट फ्रि ट्रान्सफरमा मेसी आफ्ना मिल्ने साथी नेयमार रहेको क्लब पीएसजी पुगेका थिए। स्पोर्टस् पत्रकार रोमेरोले मेसीको बारेमा खुलाएका छन्, ‘आजसम्म मेसीको मनसाय पीएसजीसँगको सम्झौता लम्ब्याउने छैन। त्यसैले पेरिसमा रहेको टोलीसँग सम्झौता नवीकरण गर्ने छैनन्।’
वर्ल्डकप ट्रफी उचालेपछि फेरिएको मेसीको मानसिकता
कतार विश्वकप जितकै कारण मेसीको मानसकितामा परिवर्तन आएको दाबी गरिएको छ। पटक–पटकको प्रयासमा असफल भएर पेन्डिङ भएको उपाधी उचालेपछि मेसीको खेलकुदका लागि मात्रै आफ्नो करिअरमा ध्यान नदिएर त्योसँगै अन्य कुराहरु पनि जोडिएर आउने मार्काले उल्लेख गरेको छ।
जसकारण मेसीले अन्य कारणहरुलाई पनि ध्यानमा राखेर नयाँ सम्झौता गर्ने बताइएको छ। विश्वकप ट्रफी उचालिसकेपछि फ्रान्स वा च्याम्पिन्स लिगमा अर्को उपाधी जित्दा समेत उनी त्यति धेरै उत्प्रेरित हुने छैनन्। किनकी मेसीले फुटबल जगतमा जित्न बाँकी अब कुनै उपाधी छैन।
ट्रफीले घेरिएका मेसीका लागि विश्वकप उपाधी एउटा सपना थियो। त्यो पनि पूरा भएपछि अबका जित्ने ट्रफीहरु उनका लागि गौण हुन स्वाभाविक हो।
बार्सिलोना फिर्तीको सम्भावना
मेसीले विश्वकपको ट्रफी उचाल्नासाथ बार्सिलोनाका अध्यक्ष जोन लापोर्टाले ट्वीटरमा मेसीलाई धन्यवाद दिएका थिए। ‘बधाई छ लियो! यसका लागि तिमी योग्य थियौ। यो क्षणका लागि फुटबल ऋणी छ’, उनले लेखेका थिए।
यसले लापोर्टा र मेसीबीचको सम्बन्ध सुमधुर रहेको देखाउँछ। जसकारण मेसी बार्सिलोना फर्कन सक्ने सम्भावना जीवितै रहेको बताइन्छ। बार्सिलोना क्लबले आफ्नो अफिसियल सामाजिक सञ्जालहरुबाट पनि मेसीलाई बधाई दिइरहेको थियो।
लापोर्टा बार्सिलोनाका अध्यक्षमा निर्वाचित भएपछि मेसीलाई बार्सिलोनामै राख्नका लागि हर प्रयास गरेका थिए। बार्सिलोना छाड्नुपर्दा मेसी पनि भावुक भएका थिए। मेसीलाई पनि यो थाहा छ कि बार्सिलोनामा रहँदा उनले सबथोक क्लबबाट पाएका थिए भने उनले पनि क्लबका लागि सबैथोक दिएका थिए।
बार्सिलोनामा रहँदा ४ वटा च्याम्पियन्स लिग, १० ला लिगा, ७ कोपा डेल रे, ३ क्लब वर्ल्डकप, ३ युरोपियन्स सुपर कप र ८ स्पेनिस सुपर कपको उपाधी मेसीले जितेका थिए। मेसीकै सहकर्मी खेलाडी जाभी हर्नान्डेज अहिले बार्सिलोनाको मुख्य प्रशिक्षक छन्। जाभीसँग पनि मेसीको समधुर सम्बन्ध रहेको छ।
यीनै कुरालाई आधार बनाउँदै रोमेरोले भनेका छन्, ‘बार्सिलोना मेसीलाई अनुबन्ध गर्ने मुख्य उम्मेदवार मानिन्छ। मेसीले अन्य कुराहरुको पनि अहिले मूल्यांकन गरिरहेका छन्। यसको अर्थ हो कि उनी आफ्नो पूर्वक्लब बार्सिलोना फर्कने र वा अन्यत्र कतै जाने।’
यद्यपि, बार्सिलोना फर्कनका लागि पूरा गर्नुपर्ने केही शर्तहरुमध्ये एक मेसीले क्याटलान पक्षको वर्तमान अवस्था र उनीहरुको तलबलाई अनकूल बनाउनका लागि आफ्नो तलबको ठूलो हिस्सा त्याग्नुपर्छ।
बार्सिलोना बाहेक इन्टर मियामीमा पनि जान सक्ने सम्भावना मार्काले उल्लेख गरेको छ। आफ्नो सुनौलो अवकाशका लागि मेसी मियामी पुग्नसक्ने आकलन पनि गरिएको छ।
डेभिड बेक्ह्यामको समेत लगानी रहेको मियामीले मेसीलाई अनुबन्ध गर्न चाहेको विषय यसअघि नै सार्वजनिक भएको थियो। जुन कुरा बेक्ह्यामले समेत लुकाएका छैनन्। मेसीले समेत केही लगानी मियामी शहरमा गरेका छन्। बेक्ह्यामको प्रस्ताव स्वीकारेको अवस्थामा उनलाई वार्षिक १४ मिलियन तिर्न मियामी तयार छ। मियामी मेसीका नजिकका साथी सर्जियो बुस्केट्स र लुईस स्वारेजसँग पनि जोडिएको छ।
यो बाहेक अर्जेन्टिाकै क्लब न्युवेल वर्ल्ड ब्वाईज र साउदीको अल हिलाल क्लबले पनि मेसीलाई अनुबन्ध गर्न चाहिरहेका छन्। उता इंग्लिस क्लब म्यानचेस्टर सिटीले पनि मेसीलाई आँखा लगाउँदै आएको छ।
बार्सिलोनाका पूर्वप्रशिक्षक पेप ग्वार्डिवालाले सिटीको प्रशिक्षकको जिम्मेवारी सम्हालेदेखि नै सिटीले मेसीलाई आँखा लगाएको हो। सन् २०२१ मा बार्सिलोना छाडेका बेला पनि मेसीको अबको गन्तव्य सिटी रहेको भन्ने समाचार बाहिरिएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751267101.jpg)
-1751273553.jpg)
-1749826086.png)
