बिर्तामोड। एक्स्ट्रिम दोस्रो झापा महिला गोल्डकप २०८३ अन्तर्राष्ट्रिय आमन्त्रण नकआउट फुटबल प्रतियोगिताको उद्घाटन खेलमा आयोजकको झापा ११ फुटबल क्लबको महिला टिम र आरएस पोखरा फुटबल क्लब भिड्ने भएका छन्।
प्रतियोगिता मंसिर ५ गतेदेखि हुने छ। त्यस्तै, दोस्रो खेल मंसिर ६ गते त्रिभुवन आर्मी फुटबल क्लबविरुद्ध भारत नयाँ दिल्लीको एभी फुटबल क्लबले खेल्नेछ । झापा महिला गोल्डकपको तेस्रो खेल मंसिर ७ गते एपिएफ फुटबल क्लबसँग भुटानको थिम्पु राभेन वुमेन्स फुटबल क्लबले प्रतिस्पर्धा गर्नेछ ।
चौथो खेल मंसिर ८ गते नेपाल पुलिस फुटबल क्लबले बागमती युथ क्लबविरुद्ध प्रतिस्पर्धा गर्नेछ । प्रतियोगिताको पहिलो सेमिफाइनल खेल मंसिर ९ गते हुनेछ भने अन्तिम सेमिफाइनल खेल मंसिर १० गते हुनेछ । झापा महिला गोल्डकपको फाइनल खेल मंसिर १२ गते हुनेछ ।
प्रतियोगिताको विजेताले नगद ११ लाख रुपैयाँ, ट्रफी र मेडल तथा उपविजेताले नगद ५ लाख ५० हजार रुपैयाँ, ट्रफी र मेडल प्राप्त गर्नेछन् । गत संस्करणको तुलनामा यसपटक विजेताको पुरस्कार राशि ९० हजार र उपविजेताको ५० हजार रुपैयाँले वृद्धि गरिएको अध्यक्ष सन्तोष थोप्रा लिम्बूले बताए ।
प्रतियोगिताको सर्वोत्कृष्ट खेलाडीले एक लाख ५० हजार रुपैयाँसहित ट्रफी प्राप्त गर्नेछन् । त्यस्तै, उत्कृष्ट प्रशिक्षक, गोलकिपर, डिफेन्डर, मिडफिल्डर, सर्वाधिक गोलकर्ता र उदीयमान खेलाडीलाई जनही २५ हजार रुपैयाँ प्रदान गरिने आयोजकले जनाएको छ । प्रत्येक दिनको प्लेयर अफ द म्याचले नगद १५ हजाार र ट्रफी पाउनेछ ।
प्रतियोगिताको पहिलो संस्करणको उपाधि नेपाल पुलिस फुटबल क्लबले जितेको थियो ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।