काठमाडौं– स्टार खेलाडी लियोनेल मेसी बार्सिलोना फर्किने अफवाह पछिल्ला हप्ताहरूमा यति तीव्र हुँदै गएका छन् कि बार्सिलोनाका अध्यक्ष जोन लापोर्टा आफैं र उनलाई पीएसजी जान दिने व्यक्तिले पनि अर्जेन्टिनाका स्टारलाई सम्पर्क गरेका छन्। ‘मेसीलाई थाहा छ कि बार्सिलोनाले उनका सधैं लागि ढोका खुल्ला राख्छ भनेर’ लापोर्टाले आश्वासन दिँदै भनेका छन्।
यद्यपि, गत शनिबार ला–लिगाका अध्यक्ष जाभियर टेबासले स्पेनिस फुटबल पत्रिका मार्का स्पोर्ट वीकेन्ड २०२३ मा आफ्नो धारणा स्पष्ट पारेका छन्, ‘बार्सिलोना अहिले जुन आर्थिक अवस्थाबाट गुज्रिरहेको छ, मेसीले आफ्नो पारिश्रमिक धेरै कम नगरेमा क्लबमा फर्कन सक्दैनन्।’
टेबासले भनेका छन्, ‘बार्सिलोना एउटा यस्तो क्लब हो जसले मेसीका लागि केही गर्न सक्छ। म व्यक्तिगत रुपमा उनी फिर्ता आएको हेर्न चाहन्छु। मेसीले बार्सिलोनामा आफ्नो करियर समाप्त गरुन् भन्ने कामना गर्दछु, तर यो हामीमा भर पर्दैन, हामी ला–लिगाको नियम परिवर्तन गर्ने पक्षमा छैनौं।’
तर, बार्सिलोनाले मेसीलाई ल्याउन चाहेको अवस्थामा विभिन्न विकल्पहरू भने खुला रहेको बताइएको छ। मेसीले बार्सिलोना आउनका लागि आफ्नो पारिश्रमिक घटनाउन सक्नेदेखि बार्सिलोनाले पनि आर्थिक पाटोलाई मध्यनजर गरेर विभिन्न विकल्पहरू प्रस्ताव गर्न सक्ने बताइएको छ।
स्पेनिस पत्रिका मुन्डो डिपोर्टिभोका अनुसार बार्सिलोनाले मेसीलाई भित्र्याउनका लागि धेरै पारिश्रमिकको प्रस्ताव नगर्ने र मेसीको बार्सिलोना फिर्तीबाट आउने आम्दानीको केही प्रतिशत र अन्य विभिन्न व्यावसायिक स्तरबाट आउने आम्दानी मेसीलाई उपलब्ध गराउने गरी ल्याउन सकिने उल्लेख गरिएको छ।
यसरी मेसीलाई फिर्ता ल्याउने सपना पूरा गर्ने योजनाअनुसार बार्सिलोनाले काम गरिरहेको दाबी गर्दै मार्काले समाचार प्रकाशित गरेको छ। मेसी पनि आफ्नो घर बार्सिलोना फर्कन इच्छुक देखिएकाले उनी बार्सिलोना फर्कने सम्भावना अझै बढ्दै गएको दाबी गरिएको छ।
विश्वकप फुटबलको ट्रफी उचालेपछि मेसीले पेरिस सेन्ट जर्मेन (पीएसजी)सँगको सम्झौता थप गर्ने मनस्थिति बनाएका थिए। जारी सिजनको अन्त्य अर्थात् आगामी जुन ३० मा फ्रेन्च लिग वान क्लब पीएसजीसँगको सम्झौता सकिँदै गर्दा सम्झौता लम्ब्याउन चाहेको खबर विश्वकपको ट्रफी उचालेपछि बाहिरिएको थियो।
तर, अहिले एकाएक परिस्थिति फरक बनेको छ। मेसीले पीएसजीसँगको सम्झौता लम्ब्याउन नचाहेको खबर बाहिरिएका छन्। यसअघि पनि स्पेनको चर्चित स्पोर्टस् पत्रिका मार्कादेखि अन्य मिडियाहरूले मेसीले पीएसजीसँगको सम्झौता लम्ब्याउन नचाहेको समाचार प्रकाशित गरेका थिए।
मार्काले चर्चित स्पोर्टस् पत्रकार जेरार्ड रोमेरोलाई उदृत गर्दै मेसीले पीएसजीसँग थप सम्झौता नगर्ने र बार्सिलोना फर्किन सक्नेबारे भन्दै समाचार सम्प्रेषण गरेको थियो।
विश्वकप सकिएलगत्तै पीएसजीका अध्यक्ष नासेर अल खेलाइफीले मेसीको निरन्तरताबारे छलफल गरेका थिए। पहिलो सिजन त्यति जम्न नसकेका मेसीले दोस्रो सिजन पीएसजीमा उत्कृष्ट प्रदर्शन गरिरहेका छन्। तर, च्याम्पियन्स लिग जित्ने लक्ष्यसहित पीएसजी भित्रिएका मेसी दुई सिजनमै निराश भएका छन्। जारी सिजन जर्मन क्लब बायर्न म्युनिखसँग लज्जास्पद हार व्यहोर्दै पीएसजी बाहिरिसकेको छ। जसकारण मेसी पीएसजीमै रहन सक्ने सम्भावना कम हुँदै गएको छ।
जसकारण अहिलेसम्म ३५ वर्षीय स्टार अर्जेन्टाइन स्ट्राइकर मेसीको भविष्य अन्योल रहेको बताइन्छ। सन् २०२१ मा स्पेनिस क्लब बार्सिलोनबाट फ्रि ट्रान्सफरमा मेसी आफ्ना मिल्ने साथी नेयमार रहेको क्लब पीएसजी पुगेका थिए।
मेसीले विश्वकपको ट्रफी उचाल्नासाथ बार्सिलोनाका अध्यक्ष जोन लापोर्टाले ट्विटरमा मेसीलाई धन्यवाद दिएका थिए। ‘बधाई छ लियो! यसका लागि तिमी योग्य थियौ। यो क्षणका लागि फुटबल ऋणी छ’, उनले लेखेका थिए।
यसले लापोर्टा र मेसीबीचको सम्बन्ध सुमधुर रहेको देखाउँछ। जसकारण मेसी बार्सिलोना फर्कन सक्ने सम्भावना झनै बढी रहेको दाबी गरिएको छ। त्यतिबेला बार्सिलोना क्लबले आफ्नो अफिसियल सामाजिक सञ्जालहरूबाट पनि मेसीलाई बधाई दिएको थियो।
लापोर्टा बार्सिलोनाका अध्यक्षमा निर्वाचित भएपछि मेसीलाई बार्सिलोनामै राख्नका लागि हर प्रयास गरेका थिए। बार्सिलोना छाड्नुपर्दा मेसी पनि भावुक भएका थिए। मेसीलाई पनि यो थाहा छ कि बार्सिलोनामा रहँदा उनले सबथोक क्लबबाट पाएका थिए भने उनले पनि क्लबका लागि सबैथोक दिएका थिए।
बार्सिलोनामा रहँदा ४ वटा च्याम्पियन्स लिग, १० ला लिगा, ७ कोपा डेल रे, ३ क्लब वर्ल्डकप, ३ युरोपियन्स सुपर कप र ८ स्पेनिस सुपर कपको उपाधि मेसीले जितेका थिए। मेसीकै सहकर्मी खेलाडी जाभी हर्नान्डेज अहिले बार्सिलोनाको मुख्य प्रशिक्षक छन्। जाभीसँग पनि मेसीको समधुर सम्बन्ध रहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
