काठमाडौं– सुकुम्बासी बस्ती हटाउने क्रममा आक्रमणमा उत्रिएकामध्ये दुई जनाविरुद्ध मुद्दा दायर भएको छ। जिल्ला सरकारी वकिल कार्यालय काठमाडौंले काठमाडौं जिल्ला अदालतमा दुई जनाविरुद्ध मुद्दा दायर गरेको हो।
आपराधिक उपद्रोको कसुरमा दुई जनाविरुद्ध मुद्दा दायर भएको छ। काठमाडौं महानगरले जिल्ला प्रहरी परिसर काठमाडौंमा आक्रमणमा उत्रिएकाहरूविरुद्ध उजुरी दिएको थियो। तीमध्ये काठमाडौं महानगरपालिका–३१, का ५८ वर्षीय नारायण परिश्रमी भनिने नारायण परियार र काठमाडौं–१० शंखमुलका ६७ वर्षीय हुकुमबहादुर तामाङ लामालाई प्रहरीले पक्राउ गरेर अनुसन्धान गरेको थियो।
अवैध सुकुम्बासी बस्ती हटाउने क्रममा डोजर लगाउँदा खुडा, खुकुरीलगायत हतियारसहित आक्रमणमा उत्रिएको र उनीहरूको आक्रमण प्रहरी समेत घाइते भएकाले तत्काल पक्राउ गरेर कारबाही गर्न भन्दै महानगरले प्रहरीमा उजुरी दिएको थियो।
बस्ती हटाउने क्रममा प्रहरी जवान शर्मिला बोगटीलाई बन्धक बनाएर आक्रमण गरिएको, नगर प्रहरी राजुपाण्डेसहित १८ जनालाई हतियारले आक्रमण गरेर घाइते बनाएको उल्लेख गरिएको थियो।
आक्रमण गर्नेमाथि मुलुकी फौजदारी अपराध संहिताको दफा ८५, १९६ र २१२ अनुसार कारबाही गर्न माग गरिएको थियो। तर, सरकारी वकिल कार्यालयले भने मुलुकी फौजदारी संहिताको दफा २८५ अन्तर्गतको आपराधिक उपद्रोसम्बन्धी कसुरमा मुद्दा दताए गरेको हो। उक्त कसुरमा ४ वर्षसम्म कैद र ४० हजार रुपैयाँसम्म जरिवाना हुने भएकाले सोही अनुसार कारबाहीको माग गरिएको छ।
त्यसैगरी, उपचार खर्चवापतको रकम पनि पक्राउ परेकाहरूबाट असुलउपर गरिनु पर्ने माग गरिएको छ। पक्राउ परेकासहितका व्यक्तिहरूले आक्रमण गर्दा काठमाडौं महानगरपालिकाको डोजरमा क्षति भएको र मर्मतका लागि ६३ हजार ४८३ रुपैयाँ लागेको, विभिन्न घाइतेहरूको उपचारमा ३ लाख १० हजार ७६९ रुपैयाँ लागेको, काठमाडौं महानगरमा कार्यरत प्रहरी जवान बिष्ना ढुंगानाको उपचारमा २९ हजार ८३० रुपैयाँ लागेको बिल समेत पेस भएकाले कुल रकम ४ लाख ४ हजार ४५ रुपैयाँ पक्राउ परेकाले उपलब्ध गराउनुपर्ने दाबी गरिएको छ।
पक्राउ परेका दुई जनाविरुद्धको मुद्दा काठमाडौं जिल्ला अदालतका न्यायाधीश केशवप्रसाद अधिकारीको इजलासमा मंगलबार बयान भइरहेको छ। बयान सकिएपछि थुनछेक बहस हुनेछ। त्यसपछि पुर्पक्षमा थुनामा पठाउने तथा धरौटी वा साधारण तारेखमा रिहा हुने भन्ने आदेश आउने छ।
अधिकार सम्पन्न बागमती सभ्यता एकीकृत विकास समितिले बागमती करिडोर आसपासका अनधिकृत सुकुम्बासी बस्ती हटाउन भन्दै काठमाडौं महानगरपालिकालाई पत्राचार गरेको थियो। बागमती सभ्यता एकीकृत विकास समितिको पत्राचारपछि महानगरपालिकाको बैठकले बस्ती हटाउने निर्णय गरेको थियो।
बस्ती हटाउने समय समेत दिँदा समेत नहटाएपछि गत मंसिर १२ गते महनगरपालिका प्रहरी टोलीसहित थापाथलीस्थित सकुम्बासी बस्ती पुगेको थियो। सो क्रममा खुकुरीसहित घरेलु हतियार लिएर आक्रमणमा उत्रिएका थिए।
आक्रमणबाट प्रहरी समेत घाइते भएका थिए। उनीहरूले ज्यान लिनेसम्मको अभिव्यक्ति समेत सार्वजनिक रुपमा दिएका थिए। हतियारसहित आक्रमणमा उत्रनेहरूको भिडियो, फोटोसहितको पेन ड्राइभ महानगरले प्रहरीलाई बुझाएको थियो। सोही अनुसार परिश्रमी र लामालाई पक्राउ गरेर मुद्दा चलाइएको हो। यो प्रकरणमा अन्य व्यक्तिहरू फरार रहेकाले उनीहरूको नाममा पक्राउ पूर्जी जारी गर्न समेत माग गरिएको छ।
यता यो प्रकरणमा पक्राउ परेका व्यक्ति परिश्रमी नेकपा एमालेको सुकुम्बासी संगठनको संस्थापक महासचिव समेत रहेको खुलेको छ। परिश्रमीले भने आफूले कुनै आक्रमण नै नगरेको भन्दै इन्कारी बयान दिएका छन्। सुकुम्बासी बस्तीमा भीमबहादुर राई र भक्तबहादुर पहेलीको निधन भएकाले कोरा बसेका मान्छेलाई भेट्न गएको र त्यतिबेला सुकुम्बासी र महानगरको टोलीबीच झडप भएकाले आफूले छुट्याउन खोजेको उनको दाबी छ।
अर्का प्रतिवादी लामाले पनि आफू सुकुम्बासी मोर्चामा आबद्ध भएकाले बस्ती खाली नगराउन भन्नका लागि थापाथली पुगेको दाबी गर्दै कसैमाथि कुटपिट नगरेको दाबी गरेका छन्।
मार्ने थिए, भागेर ज्यान जोगाएँ : प्रहरी जवान शर्मिला बोगटी
बस्ती हटाउने क्रममा म भाग्ने ठाउँ समेत नपाई नजिकै रहेको पर्खालको आडमा गई आफ्नो ज्यान जोगाउन भनि लुकेको थिएँ। तर, सोही ठाउँमा भेला भएका मैले नचिनेका व्यक्तिहरूले मलाई पर्खालको आडमा भित्तामा लडाई भाटाले पटक–पटक मेरो शरीरमा प्रहार गरे। मैले नचिनेको महिला तथा कोट लगाएको, गलामा मखलर बाँधेको बुढो बुढो पुरुष व्यक्तिले समेत भूँइमा भएको ढुङ्गा टिपेर यसलाई आगो लगाएर जलाउनु पर्छ, मार्नु पर्छ भभ्दै प्रहार गरे।
म त्यहाँबाट जेनतेन उठी आफ्नो ज्यान जोगाउन भनेर केही पर रहेको थापाथली पुलतिर भाग्दै गर्दा पुन: ३/४ जना अपरिचित व्यक्तिहरू हातमा तरबार तथा खुकुरी समेत लिई मलाई मार्ने भनी लखेट्दै आए। म ज्यान जोगाउन भनि सोही ठाउँमा रहेको एउटा घरभित्र छिरेको थिएँ। घरमा समेत तरबार र खुकुरी लिई आएका व्यक्तिहरूले मलाई मार्न लागेको कारण म उनीहरूको पञ्जाबाट फुत्किई भाग्दै नजिकै रहेको पुलमा पुगेको थिएँ। त्यस ठाउँमा अन्य सर्वसाधारण मानिसहरू समेत भएको कारण उनीहरूले मलाई पिछा गर्न छोडेकाले म बाँचेको हुँ।
म भागेर पुलमा नपुगेको भए उनीहरूले मलाई आगो लगाई जलाउने थिए वा धारिलो हतियारले प्रहार गरी मार्ने थिए। मेरो ज्यान मार्ने मनसाय लिई इट्टा तथा ढुङ्गा र धारिलो हतियारले प्रहार गर्ने व्यक्तिहरू को को हुन् भन्ने यकिन गर्न मैले नसकेता पनि विभिन्न सञ्चार माध्यमहरूले लिएको फोटो तथा भिडियोहरूबाट मलाई पर्खालको छेउमा ज्यान मार्ने मनसाय लिई कुटपिट गर्ने र आगोमा जलाई मार्नु पर्छ भन्ने व्यक्ति नारायण परिश्रमी र हुकुमबहादुर लामा समेतको नेतृत्वमा रहेका व्यक्तिहरू हुन्।
उनीहरूको कुटाईबाट मेरो शरीरको टाउको, ढाड र खुट्टामा समेत गहिरो चोट लागेको हुँदा मलाई मेरा साथीहरूले तत्काल उपचारको लागि नर्भिक अस्पताल लगी उपचार गराएका थिए।
[प्रहरी जवान शर्मिला बोगटीले दिएको बयान]
सम्बन्धित समाचार :
सुकुम्बासी बस्ती प्रकरण : आक्रमणमा उत्रने चार जनालाई पक्राउ गरेर कारबाही गर्न प्रहरीलाई पत्राचार
किन पटक–पटक तारो बन्छ सुकुम्बासी बस्ती ?
सुकुम्बासीको आवाज– सरकारले वास्तविक र नक्कली सुकुम्बासी छुट्याओस्
थापाथलीको सुकुम्बासी बस्तीमा पाइन्छ कोठा भाडामा!
सुकुम्बासी बस्ती हटाउने महानगरको कार्यमा भूमि आयोगले रोक लगायो
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
