काठमाडौं– सरकारले वागमती नदी करिडोर क्षेत्रका घरटहरा भत्काउने अल्टिमेटम दिएको भन्दै बागमती क्षेत्रका सुकुम्बासीहरूले असन्तुष्टि जनाएका छन्। अधिकार सम्पन्न बागमती सभ्यता एकीकृत विकास समितिले शुक्रबार एक सूचना जारी गर्दै १० दिनभित्र वागमती नदी करिडोर क्षेत्र ओगटेर बनाएका घरटहरा भत्काउन अल्टिमेटम दिएपछि उनीहरूले आफूमाथि सरकारले अन्याय गरेको भन्दै गुनासो गरेका हुन्।
सुकुम्बासीको समस्या समाधान नगरी घरटहरा भत्काउने निर्देशन दिइएकोप्रति उनीहरूले सरकारले आफू प्रति अन्याय गरेको भन्दै गुनासो गरे। थापाथलीस्थित सुकुम्बासी बस्तीमा बस्दै आएका भीमबहादुर चेपाङले सरकारले सुकुम्बासी बस्तीमा बसोबास गर्ने वास्तविक सुकुम्बासीको पहिचान गर्नुपर्ने र भूमिहीनहरूलाई बासस्थानको ग्यारेन्टी गर्नुपर्ने माग गरे। सरकारले वास्तविक र नक्कली सुकुम्बासी पत्ता लगाउन छानबिन गर्नुपर्नेमा उनले जोड दिए। सरकारले छानबिन प्रारम्भ गरे नक्कली सुकुम्बासीहरू आफैँ उठेर हिँड्ने उनको भनाइ छ। चेपाङले वास्तविक सुकुम्बासीलाई सरकारले जग्गाको व्यवस्था गरिदिनसमेत आग्रह गरे।
त्यसैगरी, सुकुम्बासी बस्तीमा बसोवास गर्दै आएका गोपाल रनपहेँलीले निर्वाचनको समयमा १० दिने अल्टिमेटम दिइनु उचित नभएको बताए। उनले सरकारले आफूहरूको उचित व्यवस्थापन गर्नुपर्ने र आफ्ना कुराहरू सुनिदिनु पर्ने गुनासो गरे।
त्यस्तै, मनहरा सुकुम्बासी बस्तीमा बसोबास गर्दै आएका नेपाल बसोवास बस्ती संरक्षण भक्तपुर जिल्ला अध्यक्ष पदमबहादुर सिजापतिले सरकारले बसोवासको ग्यारेन्टी गर्नुपर्ने माग गर्दै आफूहरूलाई आजीवन सुकुम्बासी बन्न मन नभएकाले सुकुम्बासीको बिल्ला हटाइदिन सरकारसँग माग गरे।
विगत १७ वर्षदेखि थापाथली सुकुम्बासी बस्तीमा बसोवास गर्दै आएका पदम लामाले पनि घरटहरा भत्काएपछि छानबिन हुन नसक्ने भन्दै पहिले सुकुम्बासी हुन्–होइनन् भन्ने छानबिन गर्नुपर्नेमा जोड दिए। उनले त्यहाँबाट हटाएमा आफूहरूको जाने ठाउँ नभएको गुनासो गरे। उनले आफ्ना मागहरूलाको सुनुवाइ नभए काठमाडौंभरका सुकुम्बासी आन्दोलित हुने चेतावनी दिए।
बागमती नदी ओगटेर बसेका सुकुम्बासीहरूलाई हटाउन सरकारले पटक–पटक प्रयास गर्दै आइरहेको छ। तर, हालसम्म हटाउन सकेको छैन। यसपटक भने अधिकार सम्पन्न बागमती सभ्यता एकीकृत विकास समितिले १० दिने अल्टिमेटम नै दिएपछि सुकुम्बासी बस्तीमा त्रास फैलिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789386153.jpg)
-1786602170.png)
-1789631269.jpg)
