सुदूरपश्चिमको सभामुखमा माओवादीका ३ आकांक्षी, रावलको सम्भावना प्रबल!

राजनीति

शेरबहादुर ऐर मंगलबार, पुस २६, २०७९ २१:५५

धनगढी– आफ्नो भागमा परेको सुदूरपश्चिम प्रदेशकाे सभामुख पदमा नेकपा (माओवादी केन्द्र)ले अक्कलबहादुर रावललाई अघि सार्ने चर्चा सुरु भएको छ।

पुस २८ गते हुने सभामुखको निर्वाचनका लागि रावलको नाममा माओवादी केन्द्रका नेताहरुबीच अनौपचारिक सहमति जुटेको सुदूरपश्चिम प्रदेश कमिटिका एक नेताले बताए।

‘आकांक्षी अरु पनि हुनुहुन्थ्यो, तर उहाँको नाममा सबै सकरात्मक देखिएका छन्। अन्य कुनै विशेष परिस्थिति नआएमा उहाँ नै अबको सभामुख हो,’ माओवादी केन्द्रका ती नेताले भने।

रावलसँगै माओवादी केन्द्रबाट सभामुखमा रमेश धामी र भीमबहादुर भण्डारीपनि आकांक्षी थिए। धामीले आफू पनि आकांक्षी रहेको तर रावलअघि बढे छोड्न तयार रहेको बताए।

‘हामी आन्तरिक छलफलमै छौं। म पनि आकांक्षी हुँ, तर रावल अघि बढे, उहाँलाई छोड्न सकिन्छ,’ धामीले भने।

प्रदेश सभामा दोस्रो कार्यकालको अनुभव लिने तयारीमा रहेका रावल माओवादी केन्द्रबाट सर्वसम्मत सभामुख हुने सम्भावना देखिएको छ। २०७४ सालमा प्रदेश सभा सदस्यमा निर्वाचित रावल संसदीय समितिको सदस्य बने पनि कुनै मन्त्रालयको मन्त्री तथा राज्यमन्त्री बनेनन्।

प्रदेश संसदीय प्रणालीमा दोस्रो पटक भाग लिन पाएका रावल यसपटक सभामुखको दौडमा रहेको स्वयम् बताउँछन्।

‘दलको बैठकमा सभामुख पदका आकांक्षी सबैसँग छलफल गरेर सर्वसम्मत ढंगले अघि बढाइने छ,’ उनले भने, ‘पार्टीले र साथीहरुले जिम्मेवारी दिए म त्यो लिन तयार छु।’

यद्यपि, दलका नेता खगराज भट्टसहित केही प्रदेश सभा सदस्य काठमाडौं भएकाले अन्तिम नाममा भने अझै टुंग्गो लागेको छैन।

केन्द्रबाट सुदूरपश्चिममा नेकपा (एमाले) र माओवादी केन्द्रबीच आलोपालो मुख्यमन्त्री र सभामुख पदमा सहमति भइसकेको छ।

उक्त सहमतिअनुसार पहिलो कार्यकाल मुख्यमन्त्री एमाले र सभामुख माओवादी केन्द्रले लिने सहमति भएको थियो। उक्त सहमतिबमोजिम प्रदेशको मुख्यमन्त्रीमा एमाले संसदीय दलका नेता राजेन्द्रसिंह रावल बन्ने निश्चित देखिएको छ।

बुधबारदेखि सभामुख चयन प्रक्रिया सुरु

सुदूरपश्चिम प्रदेशको सभामुख चयन प्रक्रिया बुधबार दिउँसोदेखि सुरु हुँदैछ। प्रदेश सभा सचिवालयले पुस २७ गते दिनको १ बजेदेखि सभामुख चयन प्रक्रिया शुरु गर्ने गरी सचिवालयले कार्यतालिका तयार गरेको हो।

प्रदेश सभाको दोस्रो कार्यकालको पहिलो बैठकमा ज्येष्ठ सदस्य मानबहादुर रावलले सभामुख चयन प्रक्रियाका लागि पुस २७ गते दिनको १ बजेदेखि शुरु हुने गरी निर्वाचन कार्यतालिका बनाउन सचिव देवबहादुर बोगटीलाई निर्देशन दिएका थिए।

प्रदेश सभा सचिवालयले सभामुखको निर्वाचन पुस २८ गते गर्ने गरी कार्यतालिका तय गरेको छ। प्रदेश सभा सचिव बोगटीले सभामुखको चयनका लागि पुस २८ गते दिउसो १ः०० बजे प्रदेशसभा भवनमा मतदान कार्यतालिका रहेको बताए।

सचिवालयका अनुसार पुस २७ गते बिहान साढे १० बजेदेखि दिउँसो साढे २ बजेसम्म सभामुख पदका लागि उम्मेदवारी दर्ताको समय तोकिएको छ।

यस्तै, दिउँसो ३ बजे उम्मेदवारको नामावली प्रकाशन तथा ४ बजेसम्म दाबी बिरोध र बेलुकी ५ बजेभित्र उम्मेदवारी फिर्ताको समय निर्धारण गरिएको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।