धनगढी– नेपाली कांग्रेस सुदूरपश्चिम प्रदेश सभा संसदीय दलको नेताको टुंगो एकाएक निर्विरोधमा प्रक्रियाबाट लागेको छ।
दलको नेताका लागि आकांक्षा राखेका ६ जना प्रदेश सभा सदस्यहरु आ–आफ्नै अडानमा कायम रहेपछि बुधबार संसदीय दलको नेता चयन गर्न निर्वाचन कार्यतालिका सार्वजनिक भएको थियो। तर, बिहानसम्म एक–अर्काप्रति सहमत नभएका आंकाक्षीहरुले एकाएक मनोनयन प्रक्रियामा भाग नलिँदा कमलबहादुर शाह निर्विरोध रुपमा दलको नेता चयन भए।
बुधबार विहान १० बजेसम्म आकांक्षीहरु सहमत नभए पनि मनोनयन दर्ता प्रक्रियामा भाग नलिनुलाई पार्टीभित्र केन्द्रको हस्तक्षेप भएको देखिन्छ। निर्वाचन तालिकाअनुसार साढे २ बजेसम्म मनोनयन दर्ता गर्नुपर्ने थियो। तर, मनोनयन दर्तामा कमलबहादुर शाहबाहेक अन्य आकांक्षी सहभागी भएनन्।
संसदीय दलको नेताका लागि प्रदेशमा कञ्चनपुरका दिवानसिंह विष्ट, बहादुरसिंह थापा, कैलालीका प्रकाश देउवा, कमलबहादुर शाह, अछामका मेघराज खड्का र बैतडीका शिवराज भट्ट आकांक्षी थिए। यसमध्ये संस्थापन इतरमा विष्ट, थापा र शाह हुन् भने संस्थापनका देउवा, खडका र भट्ट हुन्। ‘केन्द्रको हस्तक्षेप नभई निर्वाचन भएमा प्रकाश देउवाले निर्वाचित हुने देखिएको थियो,’ एक प्रदेश सभा सदस्यले भने।
संसदीय दलका आकांक्षी प्रकाश देउवा नै शाहको समर्थक र प्रस्तावक बहादुरसिंह थापा रहनुले पनि केन्द्रको हस्तक्षेप दलको नेता चयनमा बढेको देखिन्छ।
‘शाहले पार्टीको कैलाली जिल्लाको १४ औं महाधिवेशनमा संस्थापन पक्षका सभापति पदका उम्मेदवारलाई सहयोग गरेका थिए। त्यो योगदानको प्रभाव पनि यसमा देखिएको छ,’ ती सदस्य भन्छन्।
कांग्रेस कैलालीको १४ औं महाधिवेशनमा जिल्ला सभापतिमा इतर पक्षबाट उम्मेदवार थिए रामबहादुर कलेल। उनलाई पहिलो चरणको निर्वाचनमा कमलबहादुर शाहको साथ र समर्थन थियो तर, मतान्तरमा उनी तेस्रो बनेका थिए। सभापति पदमा निर्णायक बनेका शाहले संस्थापन पक्षका उम्मेदवार नारायण भट्टलाई सहयोग गर्दै विजयी गराए।
कुल दुई हजार पाँच सय ८६ जना मतदाता रहेको जिल्लामा दुई हजार पाँच सय ७६ मत खसेको थियो। सो मतपरिणाम अनुसार सभापतिमा संस्थापन पक्षका मानिएका प्रकाश बमले एक हजार एक सय ६९ मत प्राप्त गरे भने पार्टीको आधिकारिक सभापति घोषणा गरिएका नारायण भट्टले एक हजार ७२ मत प्राप्त गरेका थिए। उता संस्थापनइतरका सभापतिका उम्मेदवार रामबहादुर कलेलले एक सय ९७ मत प्राप्त गरेका थिए। कुल मतमध्ये ४८ मत बदर भएको छ।
पहिलो चरणमा बमभन्दा ९७ मतले पछि परेका भट्टले दोस्रो चरणमा बमलाई २ सय ६३ मतले पराजित गर्दै सभापतमिा विजयी भएका थिए।
सोही योगदानका आधारमा सत्ता गठबन्धन दलले कैलाली निर्वाचन क्षेत्र नम्बर २ प्रदेश सभा १ बाट शाहलाई उम्मेदवार बनाएको थियो। उनी विजयी भएसँगै अहिले दलले संसदीय दलको नेता बनाइ न्याय गरेको प्रदेश सभा सदस्यहरुको बुझाइ रहेको छ।
दलको नेतामा चयन भएपछि उनले भने, ‘पार्टीले मलाई दलको नेता बनाएर न्याय गरेको छ। सत्तापक्ष वा प्रतिपक्ष नभइ प्रदेशको समग्र हितका लागि मेरो भूमिका रहने छ।’
शाह नेपाल तरुण दलका पूर्वकेन्द्रीय उपाध्यक्ष तथा महासमिति सदस्य हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749200817.png)
