धनगढी– सुदूरपश्चिम प्रदेशमा नागरिक उन्मुक्तिले मुख्यमन्त्री दाबी गरेसँगै प्रदेशको सत्ता समीकरणमा उतार–चढाब सुरु भएको छ।
सत्ता समीकरणमा बहुमत रहेको यस प्रदेशमा उन्मुक्तिले ले जुन दलले मुख्यमन्त्री दिन्छ सोही दलको समर्थन गरेर अघि बढ्ने प्रतिक्रिया दिएसँगै उतार–चढाब सुरु भएको हो।
उन्मुक्तिमा संसदीय दलका नेता बनेका रामेश्वर चौधरीले प्रदेशको मुख्यमन्त्रीको दौडमा आफू रहेको प्रतिक्रिया दिए।
प्रदेश सभामा चौथो दल रहेको उन्मुक्तिले केन्द्रमा रेश्म चौधरीसहित टीकापुर घटनामा पक्राउ परेकाको रिहाइको सर्त अघि बढाउँदै सत्ता समीकरणलाई समर्थन गरेको छ भने यस प्रदेशमा मुख्यमन्त्रीको दाबी गरेको छ।
‘यहाँको सत्ता समीकरण जस्तो पनि बन्न सक्छ। मुख्यमन्त्रीको प्रमुख दाबेदार म पनि रहेको छु,’ उनले भने।
दलका नेतासहित निर्वाचित सो पार्टीका अन्य प्रदेश सभा सदस्यले पनि मुख्यमन्त्री उन्मुक्तिले पाउनुपर्ने दाबी गरेका छन्।
‘हामी सत्ताको लोभमा नभइ एजेण्डामा अघि बढेका छौं,ं’ सो पार्टीका नेता रामेश्वरले प्रश्न गरे, ‘जहाँ पनि समर्थन गर्ने तर, केही नपाउने भएपछि अहिलेको समीकरणलाई सहयोग कति गरी राख्ने हो?’ उनले यस प्रदेशमा आफनो पार्टीले मुख्यमन्त्री पाउनुपर्ने प्रमुख दाबी रहेको बताए।
५३ सदस्यीय सुदूरपश्चिम प्रदेश सभामा प्रत्यक्षबाट ३२ र समानुपातिकतर्फबाट २१ जना निर्वाचित छन्। केन्द्रको समिकरणका आधारमा यस प्रदेशमा बहुमत भए पनि उन्मुक्तिले समर्थन नगरे मुख्यमन्त्रीका आकांक्षीलाई विश्वासको मत पाउन कठिन हुने देखिएको छ।
यस प्रदेशमा नेकपा (माओवादी केन्द्र)का ११, नेकपा (एमाले)का १०, उन्मुक्तिका सात र राष्ट्रिय प्रजातन्त्रका एक गरी २९ जना रहेका छन्। यद्यपि, उन्मुक्तिले मुख्यमन्त्री नपाएपछि सत्ता समीकरणमा सहयोग नगर्ने सा पार्टीबाट निर्वाचित प्रदेश सभा सदस्य लक्ष्मणकिशोर चौधरीले बताए।
प्रदेशमा कांग्रेसका १९, नेकपा (एकीकृत समाजवादी)का चार र एक स्वतन्त्र गरी २४ जना सत्ता समीकरणबाहिर रहेका छन्।
उन्मुक्ति निर्णायक रहेको यस प्रदेशमा एमाले, माओवादी केन्द्र, एकीकृत समाजवादी र राष्ट्रिय प्रजातन्त्र पार्टीको समीकरण बने पनि उनीहरूले बहुमत प्राप्त गर्न सक्दैनन्।
कांग्रेस, उन्मुक्ति र स्वतन्त्रलाई समेटेर प्रदेशमा सत्ता समीकरण गराउँदा बहुमत पुग्ने देखिन्छ। यता, कांग्रेसको भने सुदूरपश्चिम प्रदेशको संसदीय दलको नेता छान्न बाँकी छ। पाँचजना आकांक्षी छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
