काठमाडौं– बुधबार बिहान हुने कांग्रेस संसदीय दलको निर्वाचनका लागि मंगलबार उम्मेदवारी मनोनयन दर्ता भएको छ। पार्टी सभापति शेरबहादुर देउवाविरुद्ध महामन्त्री गगन थापाको उम्मेदवारीले कांग्रेसको संसदीय दलको निर्वाचन रोचक देखिएको छ।
संस्थापन पक्षबाट संसदीय दलमा देउवा सुुरुदेखि एक मात्र आकांक्षी थिए भने संस्थापनइतर पक्षबाट महामन्त्री गगन थापासहित नेता शेखर कोइराला पनि आकांक्षी देखिएका थिए। त्यही भएर होला संस्थापन पक्ष संसदीय निर्वाचनको सुरुदेखि हौसिएको थियो। तर, मंगलबार उम्मेदवारी मनोनयन अगाडि देखिएको परिदृश्यले सभापति देउवाको ‘शक्ति’ माथि प्रहार गर्न खोजेको देखिन्छ।
बुधबार हुने निर्वाचनमा सभापति देउवा संसदीय दलको नेतामा निर्वाचित भएपनि पार्टीमा उनको विगत ७ वर्षदेखिको शक्तिमा ह्रास आउने निश्चित भएको छ। मंगलबार संसदीय दलको उम्मेदवार मनोनयनअघि दुई महामन्त्री एकसाथ देखिए भने १४औं महाधिवेशनमा संस्थापन पक्षबाट महामन्त्रीका लागि चुनाव लडेका प्रदीप पौडेल पनि इतर पक्षमा खुलेका छन्।
२०७४ को निर्वाचनमा देउवाको नेतृत्वमा कांग्रेस पराजित भएपछि उनको प्रतिरक्षा गर्ने उद्देश्यले पार्टी प्रवक्ता बनाइएका अहिलेका महामन्त्री विश्वप्रकाश शर्मा मंगलबार औपचारिक रूपमा संस्थापनइतर समूहमा खुले।
४ मंसिरको निर्वाचनमा पार्टी कमाण्डरको हैसियतले देउवाले उम्मेदवार छान्दा ७० प्रतिशत हराहारीमा आफ्नो पक्षका नेताहरूलाई टिकट दिए। जसकारण उनलाई गणितीय रुपमा संसदीय दलको निर्वाचन धेरै महंगो नपर्न सक्ने आकलन संस्थापन पक्षको छ। तर, १४औं महाधिवेशनमा देउवाले पार्टीभित्र ‘होल्ड गरेको शक्ति’ मा भने क्षयीकरण देखिएको छ।
१४ औं महाअधिवेनमा सभापति देउवासँगै शेखर कोइराला, प्रकाशमान सिंह र विमलेन्द्र निधि नेतृत्वको दौडमा उभिएका थिए। दोस्रो चरणमा देउवा र कोइरालाबीच मात्र प्रतिस्पर्धा भएको थियो। पहिलो चरणका प्रतिस्पर्धीहरू सिंह र निधि देउवातिर खुलेका थिए।
तर, प्रकाशमान सिंहको समूहबाट महामन्त्री जितेका विश्वप्रकाश मात्र होइन, महाधिवेशनको क्रममा आफ्नो समूह देउवातिर विलय गराएका कृष्णप्रसाद सिटौला पक्षका नेता प्रदीप पौडेल पनि इतर पक्षमा खुलेका छन्। पौडेल १४औं महाधिवेशनमा देउवा प्यानलबाटै महामन्त्रीको उम्मेदवार बनेका थिए।
संस्थापन पक्षले इतर समूह संसदीय दलको निर्वाचनमा फुट्न सक्ने र झनै कमजोर हुने आकलन गरेका थिए। तर, त्यसो भएन। मंगलबार संसदीय दलको उम्मेदवारी मनोयन गर्ने क्रममा यो समूह झनै शक्तिशाली भएर आयो। यसले भोलिका दिनमा पार्टी राजनीतिमा असर पर्ने देखिन्छ। जुन कुरा महामन्त्री शर्माले समेत मंगलबार प्रष्ट्याएका छन्।
उनले हालै सम्पन्न निर्वाचनले नागरिकले प्रमुख दलहरूभित्र व्यापक परिर्वतन खोजेको सन्देश दिएको भन्दै त्यो संसदीय दलबाटै सुरु गर्ने आफ्नो मत रहेको बताए। केही दिन अगाडि शर्माले सभापति देउवा र उपसभापति पूर्णबहादुर खड्कालाई पनि पार्टीमा रुपान्तरण र पुस्तान्तरण गर्न सुझाएका थिए।
संसदीय दलको निर्वाचनमा देखिएका अर्का नेता प्रदीप पौडेलले पनि निर्वाचनको परिणामले दलहरूले आफूमा सुधार नगरे अस्तित्व नै संकटमा पर्ने खतरा देखाएको टिप्पणी गरे। काठमाडौं–५ बाट प्रतिनिधि सभामा निर्वाचित भएका पौडेल निर्वाचनबाट राष्ट्रिय स्वतन्त्र पार्टीको उदय सांकेतिक रहेको भन्दै पुराना नेतृत्वहरू अभिभावक बनेर बस्ने बेला आएको बताए।
‘पार्टीमा सुधार र परिवर्तनको व्यापक खाँचो छ’, पौडेलले भने, ‘त्यसको सुरुआत संसदीय दलबाट हुनुपर्छ भनेर म महामन्त्री गगन थापाको सर्मथक बसेको हुँ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
