पोखरा– नवौं राष्ट्रिय खेलकुद अन्तर्गत प्याराग्लाइडिङका खेलहरु शनिबारबाट सुरु भएको थिए। आइतबार पनि शनिबारजस्तै प्रतिस्पर्धा गर्न २५ जना खेलाडी अफिसियल, रेफ्री पोखरा महानगरपालिका २५, सराङकोट पुगे। सराङकोट पुगेपछि प्याराग्लाइडिङ प्रशिक्षक तथा रेफ्री सुरेन गुरुङले सहभागी सबै खेलाडीलाई प्याराग्लाइडिङ टेक अफ गर्ने ठाउँमा लगे।
खेलाडीहरुलाई नियम र ध्यान दिनुपर्ने कुराहरु जानकारी गराउँदै आवश्यक तयारी पूरा गरे। हावाको चाप र मौसमको अवस्था बुझ्न रेफ्री सुरेन सबैभन्दा पहिले प्याराग्लाइडिङमा उडे। हावाको चाप सामान्य भएपछि खेलाडीहरुलाई उड्ने अनुमति दिए। २५ जना खेलाडीमध्ये पहिले उडेका खेलाडी थिए निसिम थापा। तर, उड्नासाथै प्याराग्लाइडिङले आकाशको सट्टा भुइँको बाटो समायो।
ग्लाइडर निर्माणधीन घरमाथि खस्यो र खस्यो निसिमको जीवन पनि। निसिमले आइतबारै अन्तिम श्वास फेरे। ग्लाइडर खसेपछि उनलाई तत्काल स्वास्थ्यकर्मीसहितको टोलीले उद्धार गरी उपचारका लागि मेट्रोसिटी अस्पताल लगियो। तर, त्यहाँ पुगेपछि चिकित्सकले मृत घोषणा गरे।
‘उडानलगत्तै उनको प्याराग्लाइडिङ ‘कोल्याप्स’ भयो,’ एक प्रत्यक्षदर्शीले भने, ‘उनी सोझै पोखरा १८ सराङकोटस्थित एक निर्माणधीन भवनमा खस्न पुगे। जहाँ उनको निधन भयो।’ प्याराग्लाइडिङमा दखल राख्ने निसिमसँग देश तथा विदेशमा प्याराग्लाइडिङ प्रतियोगितामा भाग लिएको र जितेको अनुभव पनि थियो।
उनले नेपाल च्याम्पियन लिगमा पटक–पटक प्याराग्लाइडिङको उपाधि जितेका थिए। उनले भारत, कोरिया, इन्डोनेसियालगायतका देशमा प्याराग्लाइडिङ इभेन्टमा पनि सहभागिता जनाइसकेका थिए। उनी प्याराग्लाइडिङ खेलाडीहरुको छाता संस्था एफएआईका कम्पिटिसन वरीयता प्राप्त खेलाडीसमेत हुन्।
गोरखा पालुङटार स्थायी घर भएका २६ वर्षे निसिम परिवारसँगै पोखराको हस्पिटल चोक बस्थे। त्रिभुवन आर्मी क्लबमा नवौं राष्ट्रिय खेलकुदका लागि करारमा अनुबन्ध भएका निसिम राष्ट्रिय खेलकुदमा स्वर्ण पदक जित्न चाहन्थे।
स्वर्ण पदकका लागि मिहेनत गरेका उनी कहिल्यै नफर्किने गरी सधैंका लागि संसारबाट बिदा भएका छन्। पोखराका आकाशमा निसिमको प्रतिस्पर्धात्मक प्याराग्लाइडिङ उडान यो दोस्रो थियो। त्यही नै अन्तिम बन्यो। प्याराग्लाइडिङ खेलको प्रसंगमा सबैभन्दा अगाडि पोखराको नाम लिइन्छ। अधिकांश प्याराग्लाइडिङ उडान पोखराकै आकाशमा हुन्छन्।
लुम्बिनी प्रदेशमा भएको आठौं राष्ट्रिय खेलकुद प्याराग्लाइडिङलाई समावेश गरिएको थियो। जुन बेला प्याराग्लाइडिङ पोखराकै आकाशमा भएको थियो। जसमा निसिमले आर्मीबाटै खेलेका थिए र त्यो बेला आर्मीले रजत पदक जितेको थियो।
दिवंगत निसिम उनका आमाबाबुका एक्लो सन्तान हुन्। प्याराग्लाइडिङ प्रतियोगितामा त्रिभुवन आर्मी, एपीएफ, गण्डकी, कर्णाली र प्रदेश नम्बर १ का २५ खेलाडी सहभागी थिए। खेलका क्रममा खसेर खेलाडीको मृत्यु भएपछि नवौं खेलकुद अन्तर्गत प्याराग्लाइडिङ खेल स्थगित भएको छ।
खेलाडीको मृत्युपछि प्याराग्लाइडिङ खेलहरु अनिश्चितकालका लागि स्थगित गरिएको नेपाल प्याराग्लाइडिङ तथा ह्याङग्लाइडिङ संघले जनाएको छ। जसले गर्दा प्रतियोगिता अनिश्चित बनेको छ।
देशभर सञ्चालनमा रहेका प्याराग्लाइडिङ उडान बन्द गर्न नागरिक उड्डयन प्राधिकरणले निर्देशन दिएको छ। प्राधिकरणबाट अर्काे सूचना जारी नभएसम्म प्याराग्लाइडिङ देशैभर बन्द गराउन निर्देशन दिएको हो। हवाई क्षेत्रसँग सम्बन्धित यो खेललाई थप व्यवस्थित बनाउन तत्काल बन्द गर्ने निर्णय भएको प्राधिकरणले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778551198-1778552039.jpeg)
-1786602170.png)
