धनगढी– हरेक वर्ष दशैं, तिहार र छठलाई लक्षित गर्दै सरकारले देशभरीका विभिन्न स्थानमा सुपथ मूल्य पसल सञ्चालन गर्छ।
यस वर्ष पनि कैलालीको धनगढीमा साल्ट ट्रेडिङ कर्पोरेसन र खाद्य व्यवस्था तथा व्यापार कम्पनीले छुट्टा–छुट्टै सुपथ मूल्य पसल सञ्चालन गरिरहेका छन्। खाद्यकोमा चामल र साल्ट ट्रेडिङकोमा अन्य खाद्य सामग्री उपलब्ध छन्। तर, उपभोक्ताले चिनी भने पाएका छैनन्।
साल्ट ट्रेडिङले चाड पर्वलाई लक्षित गर्दै सहुलियत मूल्यमा चिनी बिक्री गर्ने गर्थ्यो। तर २ वर्षयता धनगढीका सुपथ मूल्य पसलमा उपभोक्ताले चिनी पाएका छैनन्। ग्राहकले सबैभन्दा बढी चिनी खोज्ने भएपनि सरकारले उपलब्ध नगराएको भन्दै साल्ट ट्रेडिङ कर्पोरेसन लिमिटेडले गत वर्षदेखि नै चिनी बिक्री गर्न छोडेको हो।
‘चिनी भारतबाट ल्याउनुपर्ने भएपनि सरकारले अनुमति दिएको छैन’, साल्ट ट्रेडिङ कर्पोरेसन लिमिटेड धनगढीका सूचना अधिकारी रामचन्द्र जोशीले भने, ‘नेपाली चिनी खरिद गरेर सहुलियतमा दिन सकिने अवस्था छैन। त्यसैले गत वर्षदेखि नै चिनी बिक्री गर्न नसकिएको हो।’
सरकारले चिनी आयातमा कर लगाएपछि अर्थ मन्त्रालयले भारतबाट चिनी खरिदको अनुमति नदिएको उनले बताए।
ग्राहक भने चिनीकै लागि सुपथ मूल्यमा पुग्ने गरेका छन्। ‘चिनी सस्तो पाउँछ भनेर सुपथ मूल्य पसलमा आएकी हुँ,’ धनगढी–५ हसनपुरकी सीता भट्टले भनिन्, ‘तर, यहाँ चिनी रहेनछ। खाली हात फर्कनुपर्यो।’ अब भारतको सीमावर्ती वनगाउँ बजार गएर चिनी खरिद गर्ने उनले सुनाइन्।
‘चाडवाडमा धेरै चिनी चाहिन्छ,’ उनले भनिन्, ‘वनगाउँबाट ल्याउँदा नेपालको भन्दा किलोमा २० रुपैयाँ सस्तो पर्ने भएका कारण धेरै चिनी चाहिँदा त्यतै जाने गरेका छौं।’ वनगाउँ जान बाटोको समस्या हुने भएकाले साल्ट ट्रेडिङमै चिनी पाइए राम्रो हुने उनको भनाइ छ।
साल्ट ट्रेडिङले चिनी नदिएको र धनगढी बजारमा धेरै महंगो पर्ने भएपछि भारतको वनगाउँ जानु परेको उनले सुनाइन्। धनगढी बजारमा चिनीको मूल्य ९० रुपैयाँ प्रतिकिलो छ। वनगाउँमा भने ६८ रुपैयाँमै चिनी पाइने गरेको छ।
सुपथ मूल्य पसलमा चिनी सस्तोमा पाइँदा बजारमा पनि मूल्य केही घट्ने गरेको थियो। साल्ट ट्रेडिङ कर्पोरेसन लिमिटेडले धनगढी र गोदावरीमा सुपथ मूल्य पसल सञ्चालन गरिरहेको छ। सो पसलबाट नुन, चिउरा, खाने तेलमा छुट दिने गरेको छ।
साल्ट ट्रेडिङका सूचना अधिकारी जोशीका अनुसार नुनमा २ रुपैंया छुट दिएर प्रति किलो १८ रुपैयाँमा बिक्री भइरहेको छ। एक जनालाई एक दिनमा बढीमा ६ किलो नुन दिने गरिएको छ।
यसैगरी चिउरामा प्रतिकिलो ७ रुपैयाँ छुट दिएर प्रतिकिलो ८८ रुपैयाँमा बिक्री गर्ने गरिएको छ भने स्वस्तिक तोरीको तेलमा प्रति लिटर ७ रुपैयाँ छुट दिएर प्रतिलिटर ३०५ रुपैंयामा बिक्री गर्ने गरिएको सूचना अधिकारी जोशीले बताए। जोशीका अनुसार १ दिनमा १ जनालाई चिउरा ४ किलो र खानेतेल ४ लिटरसम्म दिइने गरिएको छ।
पहाडमा सञ्चालन भएन
साल्ट ट्रेडिङ कर्पोरेसन लिमिटेडले गत वर्षसम्म सुदूरपश्चिमका पहाडी जिल्लामा पनि सुपथ मुल्य पसल सञ्चालन गर्दै आएकोमा यस वर्ष भने तराईलाई मात्रै केन्द्रित गरेर सुपथ मुल्य पसल सञ्चालन गरेको छ।
साल्ट ट्रेडिङ कर्पोरेसन लिमिटेडको केन्द्रीय नीतिका कारण पहाडी क्षेत्रमा सुपथ मूल्य पसल सञ्चालन गर्न नसकिएको जनाइएको छ।
‘केन्द्रबाट हरेक दिन कम्प्यूटर बिलसहित कारोबारको विवरण माग गरिएको छ,’ साल्ट ट्रेडिङ कर्पोरेसन लिमिटेड प्रदेश कार्यालय धनगढीका सूचना अधिकारी जोशीले भने, ‘पहाडी क्षेत्रमा कम्प्युटरको समस्याका कारण बिलिङ गर्न नसकिने भएपछि यस पटक धनगढी र गोदावरीबाट मात्रै सुपथ मुल्य पसल सञ्चालन गरिएको हो।’
साल्ट ट्रेडिङले गत वर्षसम्म बैतडी, बझाङ र डोटीमा पनि सुपथ मुल्य पसल सञ्चालन गर्दै आएको थियो। तर केन्द्रले सर्भर प्रणाली लागु गरेपछि भने अन्य स्थानमा सुपथ मुल्य पसल सञ्चालन गर्न नसकिएको उनले बताए। केन्द्रसँग धनगढीको सर्भर प्रणाली मात्रै जोडिएको उनले बताए।
खाद्यको चामलमा ७ रुपैयाँ छुट
खाद्य व्यवस्था तथा व्यापार कम्पनी लिमिटेडले चामल प्रतिकिलोमा ७ रुपैयाँ छुट दिएर सुपथ मूल्य पसल सञ्चालन गरेको छ।
धनगढीस्थित खाद्य व्यवस्था तथा व्यापार कम्पनी लिमिटेडको प्रदेश कार्यालय र धनगढी–१३ स्थित मोहनपुरको गोदाममा सुपथ मुल्य पसल सञ्चालन गरेर चामल बिक्री गरिरहेको कम्पनीकी प्रदेश कार्यालय प्रमुख इन्जिला बस्नेतले बताइन्।
उनका अनुसार मोटो चामल सहुलियत सहित ३९ रुपैयाँ प्रतिकिलोका दरले बिक्री भइरहेको छ। त्यसैगरी मसिनो चामल (स्टिम जिरा) ६० रुपैयाँ प्रतिकिलो र बासमती चामल १०३ रुपैयाँ प्रतिकिलोका दरले बिक्री भइरहेको छ। बिहीबारसम्म ३० क्विन्टल चामल बिक्री भइसकेको प्रदेश प्रमुख बस्नेतले बताइन्।
खाद्य व्यवस्था कम्पनीले छठसम्म ५ ०० क्विन्टल चामल बिक्री गर्ने लक्ष्य राखेको छ। कार्यालय प्रमुख बस्नेतका साल्ट ट्रेडिङ कर्पोरेसन लिमिटेडले सञ्चालन गरेको सुपथ मुल्य पसलबाट पनि खाद्यको चामल बिक्री हुने व्यवस्था मिलाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1781591850-1781592603.jpg)
-1764146706.png)
