दाङ - शिक्षक छनोटमा भागबन्डाको प्रयास भएपछि दाङको राप्ती गाउँपालिकामा विवाद उत्पन्न भएको छ। पालिकाले रातारात उत्तर पुस्तिका जाँचेर नतिजा प्रकाशन गर्न खोजेपछि विवाद चर्किएको हो। विवादकै कारण गाउँपालिकाको कार्यालयमा प्रहरीले सुरक्षा दिनुपर्ने अवस्था आएको छ।
राप्ती गाउँपालिका भित्रका सामुदायिक विद्यालयहरूमा बाल शिक्षादेखि १० कक्षासम्म नि:शुल्क शिक्षा कार्यान्वयनका लागि विद्यालयमा शिक्षक अपुग छन्। त्यसका लागि अनुदान शिक्षक करारमा पदपूर्ति गर्न प्राथमिक, आधारभूत र माध्यमिक शिक्षातर्फ विभिन्न विषयमा ५० जना शिक्षकका लागि आवेदन खुला गरी शनिबार तीन चरणमा नमूना आर्दश मावि लालमटियामा परीक्षा लिइ गाउँपालिका कार्यालयमा उत्तर पुस्तिका जाँच भइरहेको थियो। त्यस क्रममा माओवादी र राष्ट्रिय जनमोर्चाबीच शिक्षक छनोटमा भागबन्डा गर्ने तयारी भइरहेको खबर पाएपछि नेपाली काँग्रेसका कार्यकर्ताहरू पनि विद्यालयमा पुगेपछि विवाद उत्पन्न भएको थियो।
भागबन्डा नै गर्ने भए कांग्रेसलाई पनि भाग चाहिने अडान राखेपछि विवादले उग्ररूप लिएको बताइएको छ।
यता कांग्रेसले भने शिक्षक छनोटमा माओवादीले आफ्ना कार्यकर्ता मात्र भर्ती गर्न खोजेको भन्दै आइतबार पालिकाको कार्यालयमा तालाबन्दी गर्नेसम्मको चेतावनी दिएको छ।
कांग्रेसका महाधिवेशन प्रतिनिधि हरि भुसालले पालिकाको शिक्षक छनोट प्रक्रिया निष्पक्ष नभएको वा आफूखुसी भागबन्डा गरे तालाबन्दी गर्ने चेतावनी दिए। नेकपा एमालेले भने शिक्षा समिति गठनदेखि शिक्षक छनोट प्रक्रियासम्म पालिका अध्यक्षले आफूखुसी बल मिचाइ गरेको भन्दै आपत्ति प्रकट छ।
यसैबीच गाउँपालिकाको नि:शुल्क शिक्षा कार्यान्वयन निर्देशन समितिको सदस्यबाट नेकपा एमालेबाट निवार्चित ५ नम्बर वडा अध्यक्ष देवप्रसाद चद्धरी र वडा सदस्य गीता चौधरीले आइतबार एक विज्ञप्ति जारी गर्दै राजीनामा दिएका छन्।
शिक्षक छनोट समिति गठनदेखि शिक्षक छनोट प्रक्रियामा समेत व्यापक कानुनी त्रुटि गरेर शिक्षक छनोटमा बल मिचाइ भएको उनीहरुको आरोप छ। गाउँपालिका अध्यक्ष प्रकाश विष्टले शिक्षक छनोट निष्पक्ष रूपमा भइरहेका बेला कांग्रेसले भागबन्डा खोजेर धाँधली गर्न खोजेको आरोप लगाए।
‘हामीले निष्पक्ष रूपमा शिक्षक छनोट गर्ने गरी प्रक्रिया अगाडि बढेको अवस्था कांग्रेसले भागबन्डा खोजेर गलत राजनीतिक संस्कार देखायो।’,उनले भने, ‘शिक्षक छनोटमा कुनै पनि हालतमा राजनीति भागबन्डा गर्न मिल्दैन।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1770630850.jpg)
-1764146706.png)
-1770562345.jpg)
