पोखरा– सरकारी कार्यालयमा सेवाग्राही कुन शाखा जाने थाहा नै पाउँदैनन्। थाहा पाएपनि विभिन्न बहानामा काम हुँदैन। एउटै कामका लागि धेरै कोठा धाउनु पर्ने बाध्यताले सेवाग्राही हैरान हुन्छन्। सेवाग्राहीले पेस गराउने फाइल हराउने, च्यातिने समस्या त झन् वषौँदेखि चलिआइरहेकै छ। जुन समस्याहरुलाई समाधान गर्न पोखरा महानगरपालिकाले एकद्वार प्रणालीको सुरुवात गरेको छ।
एउटा सेवा लिन जाँदा धेरै शाखा धाउनुपर्ने बाध्यता अन्त्य गर्न महानगरले एकद्वार प्रणाली सुरुवात गरेको हो। एकद्वार प्रणालीको शुक्रबार मेयर धनराज आचार्यले उद्घाटन गरे। कम झन्झटमा महानगरमा सेवाग्राहीको काम होस् भन्ने उद्देश्यले एकद्वार प्रणाली लागू गरिएको प्रमुख आचार्यले बताए।
एकद्वार प्रणालीले सेवाग्राहीले सेवा लिन धेरै शाखा धाउनुपर्ने बाध्यताको अन्त्य हुने मेयर आचार्यले दाबी गरे। ‘फाइल एउटा शाखाबाट अर्को शाखामा लग्दा सेवाग्राहीले लग्नुपर्ने छैन,’ उनले भने, ‘फाइल ओसारपसार गर्न कर्मचारी खटाउने छौँ, फाइल कहाँ गएको छ। सबै ठाउँ इन्ट्री हुन्छ जसले गर्दा सेवाग्राहीले आफ्नो फाइल कहाँ छ त्यसको जानकारी पाउँछन्।’
एकद्वार प्रणाली सञ्चालनका लागि २० लाख लगानीमा महानगर परिसरमा संरचना निर्माण भएको छ। जसमा ११ काउन्टर छन्। महानगरको पहिलो तलामा महानगर प्रमुखको सचिवालय, उपप्रमुखको सचिवालय, प्रमुख प्रशासकीय प्रमुखदेखि बैंकको काउन्टर, राजस्व, पूर्वाधार, पञ्जीकरण, घरनक्सा लगायत छन्। तिनै काउन्टरमा सेवाग्राहीले फाइल बुुझाएपछि कर्मचारीले सम्बन्धित शाखामा पुर्याइ काम सकेर ल्याउने छन् । काम नहुने रहेछ भने कारणसहितको पत्र दिने छन्।
‘काउन्टरमा आएपछि फाइल बुझ्ने टिम छ। उहाँहरुले सबै फाइल हेर्नुहुन्छ। सबै फाइल हेरेर नपुगेको छ भने त्यहीनेर थपेर ल्याउनुस भन्नुहुन्छ,’ आचार्यले भने, ‘आज नहुने काम छ भने कहिले हुन्छ यति दिनपछि आउनुस् भन्नुहुन्छ।’ मेयर आचार्यले निर्वाचनमा एकद्वार प्रणालीबाट सेवा प्रवाह सुरू गर्ने प्रतिवद्धता जनाएका थिए।
हेलो मेयर कार्यक्रम
पोखरा महानगरपालिकामा ‘हेलो मेयर’ कार्यक्रम सुरु भएको छ। जनताको गुनासो सुन्न हेलो मेयरको सुरुआत गरिएको महानगरपालिका मेयर धनराज आचार्यले जानकारी दिए। महानगरले प्रवाह गर्ने सेवासम्बन्धि कुनै गुनासो भए ११८१ मा फोन गरेर टिपाउन सकिने मेयर आचार्यले बताए। बिहान साढे ९ बजेदेखि साँझ ५ बजेसम्म टोल फ्री नम्बरमा फोन गरेर जनताले गुनासो राख्न सकिने उनको भनाइ छ।
‘सुरुवातमा ९ बजेदेखि ५ बजेसम्म राखेका छौँ। आवश्यकता र मागअनुसार समय बढाउन सकिन्छ,’ उनले भने। कार्यालयसँग सम्बन्धित समस्या टेलिफोनमा टिपाएपछि सम्बन्धित शाखामा लगरे समाधान मेयर आचार्यले बताए।
मेयरले दैनिक १ घण्टा जनतासँग भेटघाट गर्न समय छुट्याएका छन्। उनले दैनिक दिउँसो २ देखि ३ बजेसम्म जनताको समस्या गुनासो सुन्ने मेयर आचार्यले बताए। ‘दैनिक जनतासँग बस्ने समय छुट्याएको छु, पोखरा बाहिर रहेको बेला बाहेक नियमित जनतासँगै हुनेछु,’ मेयर आयार्चले भने। प्रमुख आचार्यले आफ्नो चुनावी घोषणापत्रमा १ महिनाभित्र हेलो मेयर कार्यक्रम सञ्चालन गर्ने प्रतिबद्धता जनाएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1761637445.jpeg)
