दाङ– आउँदो मंसिर ४ गतेका लागि प्रतिनिधि सभा र प्रदेश सभाको निर्वाचन तोकिएपछि दाङमा पनि यसको आन्तरिक तयारी तीव्र पारिएको छ।
जिल्ला निर्वाचन कार्यालय दाङले जिल्लास्थित राजनीतिक दल, दाङका १० वटै पालिका प्रमुख एवं अध्यक्ष, सुरक्षा निकाय प्रमुखहरुसँग मतदान केन्द्र र मतदान स्थलको अवस्था तथा पुनरवलोकन बारेमा छलफल गरेको हो।
छलफलपछि निर्वाचन प्रयोजनका लागि यसअघि तोकिएका मतदान स्थल थप नगर्ने गरी केही अपायक ठाउँको विकल्प खोज्दै सबैको सहमतिमा फरक ठाउँमा मतदान स्थल तोकिएको छ। जस अनुसार जिल्लाका ६ वटा पालिकाका १६ वटा मतदान स्थललाई अन्यत्र सार्ने निर्णय भएको छ।
प्रदेश निर्वाचन अधिकारी नारायण प्रसाद भण्डारीका अनुसार यसअघि गठित कार्यदलले गरेको सिफारिसका आधारमा गढवामा ४ वटा, घोराहीमा ३ वटा, तुलसीपुरमा १ वटा, बंगलाचुलीमा ५ वटा, राप्ती गाउँपालिकामा १ वटा र शान्तिनगर गाउँपालिकामा २ वटा गरी १६ मतदान स्थललाई पायक ठाउँमा सारिएको छ ।
निर्वाचन आयोगले समयको अभावका कारण तयारी नपुग्ने भन्दै साविककै संख्यामा रहने गरी अपायक ठाउँमा भएका मतदान स्थलको मात्रै विकल्प खोज्न सकिने गरी परिपत्र गरेपछि जिल्लामा पनि मतदान केन्द्र नथपिएको उनले बताए।
बैठकमा पालिकाका जनप्रतिनिधिहरुले प्रदेश र प्रतिनिधि सभा निर्वाचनलाई थप व्यवस्थित बनाउन पालिका पनि गम्भीर रहेको बताउँदै मतदाता शिक्षा, निर्वाचनको महत्त्वका बारेमा गाउँगाउँमा सचेतना फैलाउने बताए। निर्वाचन सुरक्षा तथा मतदाताको पहुँचलाई ख्याल गर्दै मतदान स्थल हेरफेर गरिएको राजनीतिक दलहरुको भनाइ छ ।
गत वैशाख ३० गते भएको स्थानीय निर्वाचनमा निर्वाचनमा दाङमा १५३ मतदान स्थल र ४६१ मतदान केन्द्र तोकिएको थियो।
जिल्ला निर्वाचन कार्यालय दाङका अनुसार असार १ गतेबाट सुरु भएको मतदाता नामावली संकलन अभियानमा ९ हजार २०० मतदाता थपिएका छन्। यसअघि दाङमा ४ लाख ९ हजार ९०२ जना मतदाता कायम थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
