काठमाडौं– प्रधानमन्त्री शेरबहादुर देउवाका एक नातेदारलाई बढुवा गर्नकै लागि सशस्त्र प्रहरी नियमावली, २०७२ संशोधन गरिएको छ।
सशस्त्र प्रहरी नियमावलीका कारण बढुवाका लागि अयोग्य भएपछि नियमावलीको नियम ४० लाई नै संशोधन गरेर बढुवा सूचना निकालिएको छ।
कतिसम्म भने नियमावली संशोधन गरेर राजपत्रमा सूचना प्रकाशित भएलगत्तै सशस्त्र प्रहरी हेडक्वाटरले बढुवाका लागि सूचना निकालेको छ। सशस्त्र प्रहरी नियमावलीको नियम ४० अनुसार एसपीबाट एसएसपीमा बढुवा हुनका लागि एसपीमा ४ वर्ष सेवा गरेको हुनुपर्ने उल्लेख थियो।
‘सशस्त्र प्रहरी सेवामा बढुवाका लागि सम्भाव्य उम्मेदवार हुन बढुवा हुने श्रेणी वा तह भन्दा एक तह मुनिको पदमा चार वर्ष सेवा अवधि पूरा भएको हुनुपर्नेछ’ नियम ४० मा उल्लेख थियो।
४ वर्ष सेवा नगरेको भए पनि एसएसपी पद रिक्त भएको अवस्थामा कायममुकाय एसएसपीको दर्जा दिएर काम गर्न भने नरोक्ने उल्लेख नियमावलीले गरेको थियो। तर एसपीबाट कन्फम एसएसपी हुन भने ४ वर्ष सेवा अनिवार्य गरेको हुनुपर्ने प्रावधान थियो।
उक्त प्रावधानका कारण प्रधानमन्त्री देउवाका आफन्त तथा उनका स्वकीय सचिव भानु देउवाका बहिनी ज्वाईँ दीपेन्द्र कुँवर कन्फम एसएसपी बन्न नसक्ने भएपछि नियमावली नै संशोधन गरिएको छ।
नियम ४० मा उल्लेख भएको एसपी दर्जामा ४ वर्षसम्म सेवा गरेको व्यक्ति बढुवाका लागि योग्य हुने भन्ने ठाउँमा ३ वर्ष बनाइएको छ। यदी नियमावली संशोधन नभएको भए कुँवर आउँदो चैतको अन्तिम सातामात्रै कन्फम एसएसपी बन्नका लागि योग्य ठहरिन्थे।
तर, उनले बढुवा हुनका लागि चैतसम्म कुर्नु परेन। आफ्नै नातेदार शक्तिकेन्द्रको उच्च ओहोदामा रहेको फाइदा उठाउँदै नियमावली नै संशोधन गरेर उनी बढुवा हुने लाइनमा छन्। नियमावली संशोधन भएर हिजो (बिहीबार) राजपत्रमा सूचना प्रकाशित भएको थियो। राजपत्रमा सूचना प्रकाशित भएलगत्तै सशस्त्र प्रहरी हेडक्वाटरले बढुवाका लागि सूचना समेत निकालिसकेको छ। पाँच दिनको म्याद राखेर आवेदन माग गरिएको छ।
एसएसपी भएलगत्तै डीआईजी बन्ने दाउ
एसपीबाट कामु एसएसपी बन्दा कुँवर ११ नम्बरमा थिए। रोलक्रम नमिची, कासमु नहेरी कामु बढुवा दिइन्छ। जसकारण एसपी बढुवा हुँदा ११ नम्बरमा रहेका कुँवर कामु एसएसपी बन्नका लागि ११ जना एसएसपी पद रिक्त हुनुपर्थ्याे। २०७७ माघदेखि ८ वटा एसएसपी पद रिक्त हुँदासमेत झण्डै एक वर्षसम्म पद रिक्त राखेर २०७८ मंसिर २९ गते बल्ल कामु एसएसपी बनाइएको थियो।
११ एसएसपीको पद खाली भएपछि ११ औं नम्बरमा रहेका कुँवर कामु बन्न योग्य भएपछि बल्ल कामु एसएसपी दिइएको थियो। पद रिक्त भएको झण्डै एक वर्षसम्म कामु एसएसपी बन्ने प्रक्रियासमेत उनै कुँवरका कारण रोकिएको थियो।
यसरी एक वर्षसम्म पद रिक्त राखेर कामु बन्न सफल भएका कुँवर अहिले फेरि नियमावली संशोधन गर्दै कामुबाट कन्फम एसएसपी बन्दै डीआईजी बन्ने दाउमा लागेका छन्। कामु एसएसपीबाट कन्फम एसएसपी बन्दा बरियतामा अघि आउने र त्यसको केही समयमै डीआईजी बन्ने दाउ कुँवरको छ।
सशस्त्र प्रहरीमा अहिले दुई डीआईजीको पद रिक्त छ। प्रतिस्पर्धी हुँदासमेत डीआईजी बढुवाको तयारी सशस्त्र हेडक्वाटरले थालेको छैन।
सशस्त्र प्रहरीको डीआईजीमा बढुवा हुनका लागि स्टाफ कलेज पास गर्नुपर्ने हुन्छ। तर कुँवर भने स्टाफ कलेजको प्रवेश परीक्षामै दुई पटकसम्म फेल भएका थिए। उनै कुँवरलाई स्टाफ कलेज पास गर्नका लागि गत वर्ष त्रिभुवन विश्वविद्यालयको उपस्थितिबिनै परीक्षा लिएर पास गराइएको थियो।
तत्कालीन एआईजी पुष्पराम केसी (पछि आईजी भएर अवकाश) को नेतृत्वमा प्रवेश परीक्षा समिति बनाएर कुँवरलाई पास गरिएको थियो। प्रवेश परीक्षा पास गरेपछि मात्रै शिवपुरीस्थित स्टाफ कलेजमा अवसर पाउँछन्।
अहिले कन्फम एसएसपी हुँदै डीआईजीमा समेत बढुवा भएको अवस्थामा कुँवर भावि आईजीको बलियो दाबेदार बन्छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
