काठमाडौं– लेखक कुमार नगरकोटीले आफ्नो लेखनको २५औं वर्षलाई 'रजत उत्सव'को रूपमा मनाउने भएका छन्। सोही अवसरमा उनी देशभरका पाठकमाझ 'नगरकोटी मन्त्र' नामक कार्यक्रम लिएर आउँदै छन्।
सपना र कल्पनालाई यथार्थ जीवनसँग जोड्दै आएका उनले सो एकल वाचन कार्यक्रममा आफ्ना विभिन्न भाषाका कविता, कथा, संस्मरणजस्ता रचनाका साथै जीवन र जगतसँग जोडिएका भोगाइ सुनाउनेछन्।
देशका करिब १ दर्जन शहरमा हुने सो उत्सवबारे उनी भन्छन्, 'बदलिंदो समयसँगै आफ्ना पाठक र शुभेच्छुकसँग म मेरा कुरा साट्न चाहन्छु। त्यसैले यो उत्सवको परिकल्पना भएको हो।'
उत्सवबारे आयोजक बुकहिलका अध्यक्ष भूपेन्द्र खड्का भन्छन्, 'नेपालमा यसरी लेखकको ब्राण्ड भ्यालु बुझाउन जरुरी पनि छ र नगरकोटीको लेखकीय छविलाई पाठकमाझ प्रस्तुत गर्न पनि आवश्यक भएकाले यो कार्यक्रम गर्न लागेका हौं।'
टिकटमा हेर्न र सुन्न पाइने कार्यक्रममा नगरकोटीको नयाँ किताब 'मन्त्र' पनि दर्शकले हस्ताक्षरसहित प्राप्त गर्नेछन्।
बुकहिल पब्लिकेसनको आयोजना र आईएनजी ग्रुपको प्रायोजनमा हुने सो उत्सव आगामी जेठ अन्तिम साताबाट पोखराबाट सुरु भइ देशका विभिन्न शहर हुँदै काठमाडौंमा समाप्त हुनेछ।
उत्सवबारे तयार पारिएको भिडियो:
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
