रामेश्वर रामको अपहरण गरेको आरोपमा पक्राउ परेकाहरू।
काठमाडौं– सुन तस्करका एजेन्टले नै दोहोरो भूमिका खेलेपछि भरिया रामेश्वर राम अपहरणमा परेको प्रहरी अनुसन्धानले देखाएको छ। सिरहाको सखुवानाकारकट्टी गाउँपालिका–५ का ३० वर्षीय राम अपहरणमा परेको घटनामा संलग्न भएको आरोपमा पक्राउ परेकाहरुको बयान र प्रहरी अनुसन्धानले सुन तस्करका एजेन्टले नै दोहोरो भूमिका खेल्दा राम अपहरणमा परेको देखाएको हो।
दुबईबाट गत असोज ६ गते काठमाडौंमा आएका उनी अपहरणमा परेका थिए। अपहरणमा संलग्न भएको आरोपमा महानगरीय प्रहरी परिसर काठमाडौंले पुस ३० र माघ २ गते तीन जना (काठमाडौं, तारकेश्वर नगरपालिका–८, जरङ्खुका ३२ वर्षीय संजोग राई, सोही ठाउँका ३० वर्षीय रमेश अर्याल र मकवानपुरको मकवानपुरगढी गाउँपालिका–५ घर भई हाल काठमाडौं महानगरपालिका–१६ बस्ने ३१ वर्षीय गोकुल घिमिरे)लाई पक्राउ गरेर अनुसन्धान सुरु गरेको थियो।
उनीहरुमाथि अपहरण तथा शरीर बन्धकको कसुरमा म्याद लिएर अनुसन्धान भइरहेको परिसरका प्रवक्ता तथा प्रहरी उपरीक्षक (एसपी) दिनेशराज मैनालीले बताए। अनुसन्धानमा संलग्न अधिकारीका अनुसार पक्राउ परेका तीन जनामध्ये एक जना सुन तस्करका एजेन्ट भएको र उनकै योजनाअनुसार सुन लुटिएको बहाना बनाई रामलाई अपहरण गरेको खुलेको छ।
परिसरका एक अनुसन्धान अधिकृतले भने, ‘पक्राउ परेका तीन जनामध्ये एक जना सुन तस्करका एजेन्ट भएको पाइएको छ। ती एजेन्टको काम दुबईबाट तस्करले पठाएको सुन रिसिभ गर्ने थियो। तर, उनले सुन लिन अर्कै मान्छेलाई पठाएर सुन लिएको र पछि आफू सुन धनी भएको भन्दै सुन खोई भन्दै रामको अपहरण गरेको खुलेको छ।’
दुबईबाट पठाएको सुन अर्कैले लुटेर लगेको र आफूले सुन रिसिभ गर्न नपाएको बताएर उक्त सुन आफ्नो पार्ने उद्देश्यले अपहरणसम्मको घटना रचिएको अनुसन्धान अधिकारी बताउँछन्।
‘सुन यति नै थियो भन्ने अहिलेसम्म यकिन भएको छैन। तर, अपहरणमा परेका भनिएका व्यक्तिको बयान अनुसार करिब १ किलोसम्म सुन थियो भन्ने बुझिएको छ। एक किलो सुन पचाउनकै लागि रिसिभ गर्नुपर्ने व्यक्तिले सुन लुटिएको घटना बनाई भरियाको अपहरण गरेको देखिन्छ’ अनुसन्धानमा संलग्न एक अधिकारीले नेपाल लाइभसँग भने। सुनको घोल (लिक्वीड) बनाएर ल्याएको खुलेको छ।
सुन र मेरो फोटो देखाएकाले सुन दिएको हुँ– राम
अपहरणमा परेका राम दुबईमा काम नपाएर घर फर्कने सुरुमा थिए। उनी समस्यामा परेको थाहा पाएपछि सुन तस्करको समूहले नै उनीसँग सम्पर्क बढाएर उद्दार गरेर नेपालसमेत पठाउने बताएको थियो। तर, तस्करको योजना भने रामलाई थाहा नभएको प्रहरी अधिकारी बताउँछन्।
सुन तस्करले उनको दुबईबाट काठमाडौंसम्मको टिकट काटिदिएका थिए। त्यसपछि सुन तस्करले आफ्नो एउटा सामान काठमाडौं लगिदिनुपर्ने र सामान लिन आफूले मान्छे पठाउने बताएपछि राम राजी भएर उक्त सामान लिएर आएका थिए।
‘मलाई सुन भन्ने नै थाहा थिए। एउटा महँगो सामान छ। हराउन, लुटिन सक्छ लुकाएर लैजानु भनेकाले अन्डरवेयरमा राखेर सामान ल्याएको थिएँ’, रामले प्रहरीसमक्ष बयान दिएका छन्, ‘एयरपोर्टबाट जाँच पास भएपछि बाहिर निस्कने बित्तिकै एक व्यक्तिले मेरो र सामानको फोटो देखाएर सामान लिन आएको बताए। उनैले बल्खुस्थित कन्चनजंघा होटलमा पुर्याएर सामान लगे। उनले सामान लिने बेला खोलेर हेर्दा बल्ल सुन भएको थाहा पाएँ।’
प्रहरी स्रोतका अनुसार उनी त्यसबेला अर्धचेत अवस्थामा भएको पाइएको छ। उनलाई कसरी अर्धचेत बनाइयो वा उनले मदिरा सेवन गरेकाले अर्धचेत थिए भन्ने खुलिसकेको छैन।
सुन दिएलगत्तै अपहरण, मोटरसाइकलमा हालेर पुर्याइयो ठमेल
रामले ती व्यक्तिलाई सुन दिएलगत्तै उनी अपहरणमा परेको पाइएको छ। दुबईबाट तस्करले पठाएको सुन रिसिभ गर्ने जिम्मा पाएका व्यक्ति नै ८/९ जना युवा लिएर होटल कन्चनजंघा पुगेर रामलाई अपहरण गरेको पाइएको हो। उनीहरुले पनि सुन र भरियाको फोटो देखाएर 'खोई हम्रो सुन?' भन्दै रामसँग सुन मागेका थिए।
तर, रामले सबै घटना बताएपछि हाल पक्राउ परको अपहरणकारीहरुले मोटरसाइकलमा हालेर ठमेल पुर्याएर होटल प्लेजरमा बन्धक बनाइएको खुलेको हो। उनीहरुले त्यहाँ रामलाई चरम यातना समेत दिएका थिए।
उक्त होटलमा बन्धक बनाएर उनीहरुले बाँध्दै, कुट्दै सुन खोई भन्दै यातना दिएका थिए। शरीरभरी निलडाम हुनेगरी कुटपिट गर्ने, ज्यान मार्ने धम्की दिनेसम्मका काम अपहरणकारीले गरेका थिए। चुरोटको ठुटोले पोलेर अपहरणकारीले सुन भरिया रामलाई यातना दिएको प्रहरीले जनाएको छ।
चरम यातना दिँदा पनि सुन नभेटिएपछि उनलाई कोठामै थुनेर अपहरणकारीको समूह बाहिरिएको थियो। त्यसपछि उनले उक्त होटलको दुई तलाबाट हाम्फालेर ज्यान जोगाएका थिए।
‘सुन हराएपछि रामलाई यातना दिएको जानकारी दुबईमा रहेका सुन तस्करलाई समेत दिएपछि उनले विश्वास गर्ने र त्यसपछि पूर्वयोजना अनुसार अर्कै व्यक्ति पठाएर रामबाट लिइएको सुन पचाउने उद्देश्य अपहरणकारीको देखिन्छ’, अनुसन्धान अधिकारी भन्छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
