रामेश्वर रामलाई अपहरण गरि बन्धक बनाएको आरोपमा पक्राउ परेकाहरू।
काठमाडौं– दुबईबाट ल्याएको सुन गायब बनाएको भन्दै सुन तस्करीमा संलग्न समूहले एक व्यक्तिलाई अपहरण गरी काठमाडौंमै चरम यातना दिएको खुलेको छ। दुबईबाट ल्याइएको सुन लुट्न गएको समूहले सुन नभेटेपछि ती व्यक्तिलाई अपहरण गरेर काठमाडौंकै एक होटलबाट अपहरण गरेर अर्को होटलमा राखेको र त्यसक्रममा चरम यातना दिएको खुलेको हो।
अपहरणकारी पक्राउको मात्रै जानकारी गराएको प्रहरीले अपहरणको कारणबारे भने अहिलेसम्म सार्वजनिक गरेको छैन। महानगरीय प्रहरी परिसर काठमाडौंका प्रमुख, एसएसपी सुदीप गिरीले पनि यस घटनामा दुबईबाट आएको सुन जोडिएको पुष्टि गरे।
के थियो घटना?
सिरहाको सखुवानाकारकट्टी गाउँपालिका–५ का ३० वर्षीय रामेश्वर राम गत असोज ६ गते दुबईबाट नेपाल फर्किएका थिए। वैदेशिक रोजगारबाट फर्किएका उनले साथमा सुन पनि ल्याएर आएका थिए। स्रोत भन्छ, ‘उनलाई तस्करको समूहले दुबईबाट टिकट नै काटिदिएर सुन बोकाएर पठाएका थिए। उक्त सुन काठमाडौंमै रहेका एक व्यक्तिलाई दिनुपर्ने जिम्मा रामलाई दिइएको थियो।’
पूर्वयोजनाअनुसार उनी त्रिभुवन विमानस्थलमा उत्रिएपछि बल्खुस्थित होटल कञ्चनजंघामा गएर बसेका थिए। उनले दुबईबाट ल्याएको सुन काठमाडौंका एक व्यक्तिले रिसिभ गरे। यो सुनको परिमाण भने खुलेको छैन।
तर, रामले दुबईबाट सुन लिएर आउँदैछन् भन्ने हाल पक्राउ परेका (काठमाडौं, तारकेश्वर नगरपालिका–८, जरङ्खुका ३२ वर्षीय संजोग राई, सोही ठाउँका ३० वर्षीय रमेश अर्याल र मकवानपुरको मकवानपुरगढी गाउँपालिका–५ घर भई हाल काठमाडौं महानगरपालिका–१६ बस्ने ३१ वर्षीय गोकुल घिमिरे) लगायत ९ जनाको समूहलाई थाहा थियो।
त्यसपछि उनीहरुले उक्त सुन लुट्ने योजना बनाएका थिए। सोही अनुसार उनीहरु राम बसेको होटल कन्चनजंघा पुगेका थिए। तर, सुन उनीहरु पुग्नु पहिल्यै अर्कै व्यक्तिले लगिसकेकाले उनीहरुले लुट्न पाएनन्। त्यो समूहले भने रामले सुन लुकाएर आफूहरुलाई ढाँटेको भन्दै उक्त होटलबाट अपहरण गरेको थियो।
दुई तलाबाट हाम्फालेर अपहरणमुक्त
प्रहरीका अनुसार ९ जनाको अपहरणकारी समूहले उनलाई होटल कन्चनजंघाबाट ठमेलस्थित होटल प्लेजर होलमा लगेर बन्धक बनाएको थियो। विमानस्थलबाट बाहिरिएको करिब एक घण्टामै उनी अपहरणमा परेका थिए। उक्त होटलमा बन्धक बनाएर उनीहरुले बाँध्दै, कुट्दै सुन खोई भन्दै यातना दिएको पाइएको छ। शरीरभरी निलडाम हुनेगरी कुटपिट गर्ने, ज्यान मार्ने धम्की दिनेसम्मका काम अपहरणकारीले गरेका थिए।
चुरोटको ठुटोले पोल्नेसम्मका यातना अपहरणकारीले सुन भरिया रामलाई दिएको प्रहरीले जनाएको छ। चरम यातना दिँदा पनि सुन नभेटिएपछि उनलाई कोठामै थुनेर अपहरणकारीको समूह बाहिरिएको थियो। त्यसपछि उनले उक्त होटलको दुई तलाबाट हाम्फालेर ज्यान जोगाएका थिए। प्रहरी स्रोत भन्छ, ‘गोरेकै शैलीमा सनम शाक्यलाई यातना दिएजसरी यातना दिइएको थियो। हाम्फालेर भाग्न सफल नभएको भए रामको पनि शाक्यकै जस्तो स्थिति हुने सम्भावना थियो।’
२०७४ माघ पहिलो साता त्रिभुवन अन्तर्राष्ट्रिय विमानस्थलबाट भित्रिएसँगै तस्करीको साढे ३३ किलो सुन गायव भएपछि सनम शाक्यलाई चुडामणि उप्रेती (गोरे)को समूहले अपहरण गरी चरम यातना दिएर हत्या गरेको थियो। रामेश्वर राम अर्को सनम शाक्य हुनबाट जोगिएको यो घटनाले देखाउँछ।
सिसीटिभीमार्फत अपहरणकारीको पहिचान
उक्त घटनाका पीडित अपहरणमुक्त भएपछि सिरहास्थित आफ्नो घर गएका थिए। उनले प्रहरीमा जाहेरी दिएका थिएनन्। तर, अन्य स्रोतबाटै दुबईबाट आएको सुन लुट्न योजना बनाएको समूहले एक व्यक्तिलाई होटल प्लेजरमा राखेर अपहरण गरी यातना दिएको भन्ने जानकारी आएपछि महानगरीय प्रहरी परिसर काठमाडौंले अनुसन्धान सुरु गरेको थियो। होटलको सिसीटिभी फुटेजमा समेत अहपरण गरी बन्धक बनाएर चरम यातना दिएको दृश्य देखिएपछि प्रहरीले उक्त घटनालाई गम्भीर रुपमा लिँदै अनुसन्धान अघि बढाएको थियो।
उता पीडित भनिएका रामले भने अहपरणकारीलाई नचिनेको प्रहरीलाई बताएका थिए। सिसीटिभी फुटेजलगायतका आधारमा अपहरणकारीको पहिचान गरी प्रहरीले तीन जनालाई चार महिनापछि पक्राउ गरेको हो।
राई र अर्याललाई पुस ३० गते जरङ्खुबाट र घिमिरेलाई माघ २ गते बसन्तनगरबाट पक्राउ गरिएको हो। उनीहरुको पुष्ठभूमि नै आपराधिक रहेको पाइएको प्रहरीले जनाएको छ। पक्राउ परेकाविरुद्ध काठमाडौं जिल्ला अदालतबाट ७ दिनको म्याद लिई थप अनुसन्धान भइरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
