काठमाडौं– जेलमा कैद सजाय भुक्तान गरिरहेका व्यक्ति र कारागारका कर्मचारीको मिलेमतोमा लागु औषधको काराबार भइरहेको खुलेको छ। सिन्धुली कारागारमा रहेका दुई कैदी र कारागार प्रशासनका कर्मचारीसमेतको मिलेमतोमा लागु औषधको कारोबार भएको खुलेको हो।
लागु औषधको मुद्दामा १८ वर्ष कैद सजाय तोकिएर कैद भुक्तान गरिरहेका भारतीय नागरिक गुड्डु गुप्ताको योजनामा जेलबाटै लागु औषधको धन्दा सञ्चालन भएको खुलेको छ। प्रहरीको लागु औषध नियन्त्रण ब्यूरोले ‘अपरेशन एम्पुल’ नाम दिएर गरेको झण्डै एक महिना लामो अपरेशनको क्रममा जेलबाटै लागु औषधको कारोबार हुने गरेको खुलेको हो। ब्यूरोका प्रमुख प्रहरी वरिष्ठ उपरीक्षक (एसएसपी) हदृय थापाका अनुसार गुप्ताले जेलमै रहेका कर्मचारी रिता सारुमगर समेतको मिलेमतोमा लागु औषधको कारोबार गर्दै आएको पाइएको छ।
जेलबाटै धन्दा सञ्चालन गरी लागु औषध कारोबार गरेको आरोपमा ८ जना पक्राउ परेका छन्। ब्यूरोको टोलीले सुरुमा काठमाडौं बौद्ध महांकालबाट सिन्धुलीको हरिहरपुरगढी गाउँपालिका–७ का २३ वर्षीय संग्राम मुक्तान र सोही ठाउँका २८ वर्षीय पञ्च स्याङ्तानलाई गत मंसिर १६ गते लागु औषधसहित पक्राउ गरेको थियो।
उनीहरुबाट डाइजापाम १६६ एम्पुल, फेनारगन १७० एम्पुल र बुफ्रेनोर्फिन १७५ एम्पुल बरामद भएको थियो। यी दुईबाट सुरु भएको अनुसन्धान कारागारसम्म पुगेको ब्यूरोका एसपी जीवन श्रेष्ठले बताए।
उनीहरु पक्राउ परेको भोलिपल्ट मोरङको विराटनगर महानगरपालिका–१४ का सुरज सिंह ठकुरी र दुई नाबालकलाई ब्यूरोले काठमाडौंको चाबहिलबाट पक्राउ गरेको थियो। पुस १९ गते नयाँबानेश्वरबाट १०० एम्पुल, फेनारगन १०० एम्पुल र बुफ्रेनोर्फिन १०० एम्पुलसहत काठमाडौं बालाजुका दीपक महर्जन पक्राउ परेका थिए।
उनीहरु पक्राउ परेपछि नै सिन्धुली कारागारमा रहेका भारतीय नागरिक गुड्डु गुप्ता, सन्तोष स्याङ्तान र कारागारकी कार्यालय सहयोगी रिता सारुमगरको मिलेमतोमा लागु औषधको कारोबार हुने गरेको खुलेको हो।
टेलिफोन नाइके र कर्मचारीको मिलेमतोमा गुड्डुको धन्दा
सिन्धुली कारागारमा रहेका भारतीय नागरिक गुड्डु २०६८ सालमा ७ सय ग्राम खैरो हेरोइनसहित पक्राउ परेको घटनामा दोषी ठहर हुँदै १८ वर्ष कैद सजाय तोकिएका व्यक्ति हुन्। काठमाडौं जिल्ला अदालतले उनलाई २०६९ कात्तिक २१ गते १८ वर्ष कैद सजाय तोकेको थियो। त्यसपछि उनी सिन्धुली कारागारमा थुनामा थिए।
उनै गुड्डुले कारागारमा रहेका टेलिफोन नाइके सन्तोष स्याङ्तानसँग सम्पर्क बढाए। जेलबाटै लागु औषध कारोबार गरी राम्रो आर्थिक आर्जन गर्न सकिने आफ्नो योजना सुनाए। त्यसका लागि बारम्बार टेलिफोन गर्नुपर्ने र त्यसमा टेलिफोन नाइकेको सहयोग चाहिने र सहयोग भए राम्रो रकम दिने योजनामा स्याङतान सहमति भएपछि गुड्डुले आफ्नो धन्दा सुरु गरेको ब्यूरोका एसएसपी थापा बताउँछन्।
फोनमार्फत नै लागु औषध काराबार गर्नका लागि उनले मान्छे खोजेर राखेका थिए। उनीहरुले गुड्डुले फोनमा निर्देशन दिएजसरी काम गर्थे। यसरी लागु औषधको कारोबारबाट आएको रकम आफूसम्म प्राप्त गर्ने माध्यम चाहिने भएकाले गुड्डुले कारागारकै कार्यालय सहयोगी सारुमगरलाई प्रयोग गरेको खुलेको छ।
सारुमगरलाई पनि केही आर्थिक सहयोग गरेर गुड्डुले लागु औषध कारोबारबाट प्राप्त भएको रकम उनको खातामा जम्मा गर्न लगाउँथे। सारु मगरले उक्त रकम गुड्डुलाई दिने गरेकी थिइन्।
लागु औषध बेच्न २० हजार दिएर राखेका थिए कर्मचारी
गुड्डुले लागु औषधको कारोबार गर्नकै लागि काठमाडौंमा कोठा खोजेर मान्छे राख्नेदेखि मासिक २० हजार रुपैयाँसम्म तलब दिने गरेको अनुसन्धानबाट खुलेको छ। टेलिफोन नाइके स्याङ्तानमार्फत जेलबाहिर रहेका उनका भाइ पञ्चसँग सम्पर्क बढाएका थिए। पञ्चलाई मासिक २० हजार रुपैयाँ दिने गरी लागु औषधको कारोबार लगाइएको थियो। पञ्चलाई फोनमै गुड्डुले सबै निर्देशन दिने गरेका थिए। सोही अनुसार उनी लागु औषध लिनदेखि दिनसम्म जाने गरेका थिए। यसरी लागु औषध कारोबारबाट आएको रकम पञ्चले कारागारकी कार्यालय सहयोगी सारुमगरको खातामा जम्मा गर्थे। सारुमगरमार्फत गुड्डुले रकम हात पार्थे।
पञ्चसँगै २ नाबालक पनि मासिक १५ हजार रुपैयाँमा लागु औषधको कारोबार गर्दै आएका थिए। यी दुई नाबालकलाई भने पञ्चले निर्देशन दिने गरेका थिए। जेलभित्रको सबै व्यवस्था गुड्डुले मिलाउथे भने जेलबाहिरको सबै व्यवस्था मिलाउने जिम्मा पञ्चको थियो। जेलबाहिरबाट काम गर्नेहरुमा सुरजसिंह, संग्राम लगायतका मान्छे थिए।
कारागार प्रशासनको भूमिका संकास्द
गुड्डुले लागु औषध कारोबारमा खटाएका मान्छे धमाधम पक्राउ पर्न थालेसँगै सिन्धुली कारागारबाट गुड्डु र टेलिफोन नाइक स्याङ्तानको सरुवा भएको खुलेको छ।
उनीहरु दुबै जनालाई सिन्धुली कारागारले पुस २ गते रौतहट कारागार पठाएको थियो। लागु औषधका मुख्य नाइकेका सहयोगी नै पक्राउ पर्न थालेसँगै कारागारबाट दुबै जनाको सरुवा हुनुले कारागार प्रशासनको भूमिका संकास्पद रहेको पाइएको छ। प्रहरी स्रोत भन्छ, ‘गुड्डुका सहयोगी पक्राउ पर्न थालेसँगै दुबै जनाको एउटै कारागारमा सरुवा हुनु, लागु औषध कारोबारमा कारागारकै कर्मचारी पक्राउ पर्नुले कारागार प्रशासनको भूमिका संकास्पद देखिन्छ।’
यता कारागार प्रशासन भने सरुवामा संयोग मात्रै पर्न गएको दाबी गर्छ। सिन्धुली कारागारका जेलर मातृका प्रसाद पहाडी भन्छन्, ‘सरुवा संयोग पर्न गएको हो। उनीहरुको धन्दा नै यही रहेछ भन्ने हामीले पनि पछि थाहा पाएका हौं।’
टेलिफोनका नाइकेलाई नै आर्थिक प्रभावमा पारेर आफ्नो पकडमा लिएपछि यस्तो भएको उनले बताए। गुड्डुले टेलिफोनमा बोल्दा पनि कोड भाषाबाट कुरा गर्ने भएकाले लागु औषध कारोबारको धन्दाबारे जानकारी हुन नसकेको जेलर पहाडीले बताए। गुड्डु ७ महिना अघि मात्रै सिन्धुली कारागारमा सरुवा भएको उनले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
