काठमाडौं– विभिन्न क्षेत्रमा उत्कृष्ट काम गर्नेहरुलाई प्रोत्साहनका लागि सरकारले हरेक वर्ष विभिन्न पदकबाट विभूषित गर्दै आएको छ।त्यसरी विभूषित हुनेहरूको सूची (विवरण) संविधान दिवसका दिन सार्वजनिक हुने गर्छ।
तर, वर्षेनी यस्तो सूची बाहिर आउँदा राजनीतिक पहुँच र शक्तिकेन्द्रको आशीर्वाद पाउनेहरुले नै पदक पाउने गरेका थुप्रै दृष्टान्त पनि सार्वजनिक भइरहेका छन्। भनिराख्नुपर्दैन, त्यसमा कार्यसम्पादनमा अब्बल हुनेहरु भने प्रायः समेटिदैनन्।
अझ सुरक्षा निकायहरु, नेपाल प्रहरी र सशस्त्र प्रहरी बलमा त पदकवापत् कार्यसम्पादन मूल्यांकनमा २ अंक पाउने र बढुवा हुनेबेला त्यो धेरै अर्थपूर्ण हुने हुँदा यसरी वितरण गरिने पदकको ठूलो महत्त्व हुन्छ। त्यही कारण पनि यी दुई संगठनभित्र पदकको व्यापक दुरुपयोग हुँदै आएको छ। अघिल्ला वर्षहरु जस्तै यो वर्ष पनि प्रहरी र सशस्त्र प्रहरी बलमा सिफारिस नै नगरिएकाले पहुँचको आधारमा पदक हात पारेका छन्। यहाँ हामीले त्यसकै केही दृष्टान्त खोतलेका छौं।
एसएसपीलाई एसपीको पदक
विभूषण सिफारिस कार्यविधि एंव प्रदान सम्बन्धी मापदण्डअनुसार सुरक्षा निकायतर्फ बढुवा भएको मितिले एक वर्ष पूरा भएकालाई मात्रै पदक दिइने उल्लेख छ। तर, नेपाल प्रहरीका एसएसपी डिल्लीराज पन्तको हकमा भने त्यो लागू भएन।
उनी २०७७ पुस २९ गते प्रहरी उपरीक्षक (एसपी)बाट प्रहरी वरिष्ठ उपरीक्षक (एसएसपी)मा बढुवा भएका थिए। बढुवा भएको ९ महिनामै उनले पदकबाट विभूषित हुने अवसर पाए। अझ रोचक कुरा त एसएसपीमा बढुवा भएको एक वर्ष नपुगेकाले पन्तलाई एसपीको दर्जा उल्लेख गरेर पदक दिने निर्णय भएको छ। उनी एसपी हुँदा नै पदक पाउने भए अघिल्लो वर्ष नै पदक पाउने सूचीमा उनको नाम हुनुपर्थ्यो। यसले नै पदक वितरणमा कतिसम्म चलखेल भएको छ भन्ने छर्लंग पार्छ।
सिफारिसमा परेकाको नाम काटियो, सूचीमा अरुकै आयो
विभूषण सिफारिस कार्यविधि एवं प्रदान सम्बन्धी मापदण्ड, २०७५ परिच्छेद ५ को (ड) मा सुरक्षा निकायका राष्ट्रसेवकहरुले पाउने पदकका लागि संगठन प्रमुखले नै सिफारिस गर्नुपर्ने उल्लेख छ। तर, प्रहरीमा संगठन प्रमुख बेगर नै शक्तिकेन्द्रको सिफारिसमा कैयौं प्रहरी पदक पाउनेको सूचीमा समेटिएका छन्।
प्रहरी प्रधान कार्यालयले सिफारिस नै नगरेकाहरुले पनि पहुँचको भरमा पदक पाएका हुन्। स्रोतका अनुसार प्रहरी मुख्यालयले सिफारिस नै नगरेका एसएसपीहरु केदार ढकाल, जनक भट्टराई, सुदिप गिरी, उमेशराज जोशी, नरबहादुर केसी, पूजा सिंह, मोहनकुमार आचार्यले शक्तिकेन्द्रको पहुँचको भरमा पदक कुम्ल्याएका छन्।
२०५१ सालमा प्रहरी निरीक्षकमा भर्ना भएकाहरु अहिले एसएसपी छन्। उनीहरुमध्येबाट नै एक जना प्रहरी महानिरीक्षक (आईजीपी)समेत हुनेछन्। यो ब्याचका अधिकांशले पदक पाउँदा ब्याचकै पहिलो नम्बरका एसएसपी सन्दिप भण्डारीको भने नाम नै काटिएको पाइएको छ।
प्रहरी स्रोतका अनुसार प्रहरी प्रधान कार्यालयले उनको नाम पदकका लागि सिफारिस गरेको थियो। तर, बढुवामा पदक वापतको २ अंकसमेत जोडिने हुँदा शक्तिकेन्द्रमार्फत् दबाब दिएर उनको नाम नै हटाउन लगाएको पाइएको छ। त्यो चलखेलमा यही ब्याचका एसएसपी टेकप्रसाद राई पनि पदकबाट बञ्चित भएका छन्।
एसपीलगायत अन्य दर्जामा पनि त्यही स्थिति छ। प्रहरी प्रधान कार्यालयले सिफारिस नै नगरेका एसपीहरु पनि पदक पाउनेको सूचीमा छन्। त्यस्तै, डीएसपीहरु नरेशराज सुवेदी, शोभाकान्त खनाल, निरन्जनदत्त भट्ट, डिल्लीनारायण पाण्डेय पनि शक्तिकेन्द्रसम्मको पहुँचबाट पदक पाउने सूचीमा अटाएका छन्। प्रहरी निरीक्षक (इन्स्पेक्टर)हरु शंकर पोखरेल, उमाशंकर प्रसाद शाहलगायतले पनि प्रहरी प्रधान कार्यालयको सिफारिसबिनै पदक पाउने सूचीमा आफ्नो नाम पारेका छन्।
प्रहरी प्रधान कार्यालयले मान पदवी, विभूषण र अलंकारका लागि १४० जनाको नाम सिफारिस गरेको थियो। अहिले ११९ प्रहरी कर्मचारी मान पदवी, विभूषण र अलंकार पाउने सूचीमा छन्। प्रहरी प्रधान कार्यालयले पठाएको सिफारिसमा टिपेक्स लगाएर धेरैजसोले शक्तिकेन्द्रको आडमा आफ्नो नाम सूचीमा पारेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768981471.jpg)
-1769055728.png)
-1764146706.png)
