काठमाडौं– काठमाडौं उपत्यकाबासीले दशैँसँगै मेलम्चीको खानेपानी उपभोग गर्न पाएका छन्।
हेलम्बुमा मुहान रहेको मेलम्ची खानेपानी आयोजनाबाट उत्पादित खानेपानी वितरण पुनः सुरु भएको छ।
काठमाडौं उपत्यका खानेपानी लिमिटेड (केयूकेएल) का प्रबन्ध सञ्चालक राम रतन साहले मेलम्चीको खानेपानी पुनः वितरण गर्न थालिएको जानकारी आइतबार नेपाललाइभलाई दिए।
मनसुन सुरु भएसँगै बाढीपहिरोको जोखिमका कारण मुहानमै समस्या हुने ठानेर गत असार १९ गतेदेखि मेलम्चीको खानेपानी वितरण बन्द भएको थियो।
खानेपानी बन्द हुँदा उपत्यकावासीले बर्खाभर खानेपानीको चरम अभाव झेल्नुपरेको थियो। यतिसम्म कि महँगो ट्याङ्कर र जारको पानी किनेर प्यास मेटाउन बाध्य हुनुपरेको थियो।
वर्षायाम सकिएर नदीमा पानीको बहाव सामान्य भएसँगै सुरुङ र मुहान (हेडवर्क्स) को मर्मत तथा सफाइ गरी पानी पुनः सुन्दरीजलस्थित प्रशोधन केन्द्रमा ल्याएर केयूकेएलले उपभोक्ताको धारामा खानेपानी पठाउन थालेको हो।
मेलम्चीको खानेपानी पुनः वितरण भए पनि काठमाडौं उपत्यकाका लागि पर्याप्त खानेपानी वितरण हुने छैन। साहका अनुसार दैनिक ५० करोड लिटर खानेपानीको माग रहे पनि उपत्यकामा मेलम्चीको पानी आउँदा समेत आधा पनि आपूर्ति गर्न कठिन छ।
केयूकेएलले दैनिक मागको आधाभन्दा कम, २० करोड लिटर खानेपानी वितरण गरिरहेको छ। ‘हप्तामा २–३ दिन बिराएर आलोपालो गरेर उपभोक्ताको धारामा पानी पठाइन्छ,’ उनले भने।
खोलामा पानीको बहाव बढेसँगै अत्यधिक मात्रामा धमिलो, प्रदूषित र पिउनका लागि पूर्णतः अयोग्य प्रमाणित भइसकेपछि गत असार १९ गतेदेखि मेलम्चीको पानी वितरण बन्द गरिएको थियो।
धमिलो पानी र लेदो सुरुङभित्र पस्दा २७ किलोमिटर लामो सुरुङमार्ग बालुवा र माटोले भरिने जोखिम रहेको बताइएको थियो। खानेपानी आयोजनाका मुख्य संरचनालाई ठूलो क्षति हुनबाट जोगाउन मेलम्ची खानेपानी विकास समितिले असार महिनामै सुरुङको ढोका बन्द गरी पानी पथान्तरण रोकेको थियो।
बर्खा कम भएपछि सिन्धुपाल्चोकको अम्बाथानस्थित मुहान क्षेत्रमा जम्मा भएको गेग्रान, बालुवा र ढुङ्गा सफा गर्न प्राविधिक र कामदार खटाइएका थिए। अस्थायी संरचना र पहुँचमार्गको मर्मतसम्भार सम्पन्न गरेपछि सुरुङ परीक्षण गरी पानी सुन्दरीजल पठाइएको थियो। सुन्दरीजल प्रशोधन केन्द्रमा पानी शुद्धीकरण गरिसकेपछि विभिन्न थोक वितरण केन्द्रबाट पानी पठाउन सुरु गरिएको बताइएको छ।
मेलम्चीको खानेपानी आयो भनेर खुसी हुने स्थिति भने छैन। हरेक वर्षायाममा मुहानमा समस्या हुने गरेको छ। सरकारले यसको दीर्घकालीन समाधान गर्न सकेको छैन।
२०७८ सालको विनाशकारी बाढीपछि आयोजनाको स्थायी मुहान (हेडवर्क्स) जोखिममा परेपछि सरकारले यसलाई अलि सुरक्षित स्थानमा स्थानान्तरण गर्ने वा अन्य वैकल्पिक स्रोतबाट उपत्यकामा पानी आपूर्ति गर्ने गृहकार्य अगाडि बढाएको भनिए पनि अहिलेसम्म प्रगति हुन सकेको छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
