तालिबानका संस्थापक मुल्लाह गनी बरादर
आफगानिस्तानमा २० वर्षपछि पुन: सत्ताको बाग्डोर सम्हाल्ने अवस्थामा पुगेको तालिबानका वरिष्ठ नेताहरुबीच सरकार गठनको विषयलाई लिएर 'ठूलो विवाद' उत्पन्न भएको छ।
जसका कारण सरकार नै विभाजित हुने अवस्थामा आइपुगेको तालिबानका वरिष्ठ नेतालाई उद्धृत गर्दै बीबीसीले लेखेको छ।
बीबीसीका अनुसार राष्ट्रपति भवनमा तालिबानका सह–संस्थापक मुल्लाह अब्दुल गनी बरादर र एक मन्त्रीबीच चर्काचर्की भएको तालिबान नेताहरुले बताएका छन्।
तालिबानका एकजना नेताले बीबीसी पाश्तोलाई बताएअनुसार बरादर र हक्कानी लडाकु समूहका प्रभावशाली नेता एवं शरणार्थी मामिला हेर्ने मन्त्री खलिल उर-रहमान हक्कानीबीच चर्काचर्की भएको थियो। त्यसपछि त्यहाँ उनीहरुका समर्थकबीच झगडा भएको पनि बताइएको छ।
गत महिना आफगानिस्तानमा नियन्त्रण कायम गरेको तालिबानले त्यसको करिब ३ हप्तापछि अन्तरिम सरकार गठन गरिएको घोषणा गरिएको थियो।
अन्तरिम सरकारमा उपप्रधानमन्त्रीको जिम्मेवारी पाएका बरादर सार्वजनिक रुपमा देखा नपरेकाले तालिबान नेतृत्वमा मतभेद रहेको खबरहरु पनि आएका थिए। तर, तालिबानले भने त्यस्ता खबरहरुलाई औपचारिक रुपमै अस्वीकार गरिदिएको छ।
सरकारमा उपप्रधानमन्त्रीको जिम्मेवारी पाएका बरादर सरकारको संरचनासँग असन्तुष्ट रहेका स्रोतहरुलाई उद्धृत गर्दै बीबीसीले लेखेको छ।
यस्तै, अफगानिस्तानमा तालिबानको जितको श्रेय कसलाई दिने भन्ने विषयमा विवाद सुरु भएको बताइएको छ। बरादरले आफूजस्ता व्यक्तिले कूटनीतिमा लगाएको जोडबलले जित भएको ठानेका बताइन्छ।
तर, केही वरिष्ठ तालिबान नेताहरूले नेतृत्व गरेको हक्कानी समूहका सदस्यहरू र तिनका समर्थकहरू त्यस्तो सफलता युद्धबाट प्राप्त भएको बताउँछन्।
बरादर अमेरिकी राष्ट्रपतिसँग सीधा सम्पर्क गर्ने पहिलो तालिबान नेता हुन्। उनले सन् २०२० मा डोनल्ड ट्रम्पसँग टेलिफोन संवाद गरेका थिए।
त्यसअघि उनले अमेरिकी फौज फिर्ता गर्ने विषयमा दोहा सम्झौतामा तालिबानका तर्फबाट हस्ताक्षर गरेका थिए।
बरादर सार्वजनिक रूपमा बाहिर देखा पर्न छोडेपछि गत सातादेखि तालिबान नेतृत्वमा विवाद उत्पन्न भएको चर्चा चलेको थियो। सामाजिक सञ्जालमा उनको मृत्यु भएको भन्ने खालका आशंकाहरु पनि व्यक्त गरिन थालिएका थिए।
तालिबान स्रोतलाई उद्धृत गर्दै बीबीसीले उल्लेख गरेअनुसार विवादपछि बरादर काबुलबाट निस्किएर कान्दहार सहर गएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
