काठमाडौं- अफगानिस्तानको तालिबान सरकारले विश्वविद्यालयमा महिला र पुरुषले एउटै कक्षाकोठामा पढ्न नपाउने बताएको छ।
आइतबार महिला शिक्षासम्बन्धी नयाँ नियम जारी गर्दै उक्त नियम घोषणा गरेको हो। तालिबानका शिक्षामन्त्री अब्दुल बाकी हक्कानीले महिलालाई पनि विश्वविद्यालयसम्मको पढाइ गर्ने अनुमती दिइएको तर, अध्ययनका लागि आउनेले शर्त पालना गर्नेुपर्ने बताए।
‘महिला शिक्षाको लागि नयाँ शर्त र नीति जारी गरिएको छ। महिलालाई पनि विश्वविद्यालयसम्मको पढाइ गर्ने अनुमती दिइएको छ। तर, महिला र पुरुषले एउटै कक्षाकोठामा भने पढ्न पाउने छैनन्,’ उनले भने।
उनका अनुसार अब अध्ययनका लागि आउने महिलाले अनिवार्य रुपमा हिजाव लगाउनु पर्नेछ। विश्वविद्यालयमा अध्ययन हुने पाठ्यसामग्री पनि चाँडै समीक्षा गरिने उनले बताए। यसअघि तालिबानले कला र संगीत अध्ययनमा प्रतिबन्ध लगाउने बताउँदै आएको थियो।
१५ अगस्टमा अफगानिस्तान कब्जा गरेसँगै तालिबानले महिलाहरुलाई शिक्षा र रोजगारीबाट नरोक्ने बताएका थिए। तर, उनीहरुले १५ अगस्टदेखि सार्वजनिक स्वास्थ्य क्षेत्रमा बाहेक सबै महिलाहरुलाई सुरक्षाको स्थितिमा सुधार नभएसम्म कामबाट टाढा रहन आग्रह गरेका छन्।
तालिबानले अफगानिस्तान कब्जा गर्नुभन्दा पहिले विश्वविद्यालयहरु सह–शैक्षिक थिए। पुरुष र महिलाहरुसँगै अध्ययन गरिरहेका थिए। महिला विद्यार्थीहरुले एकै ड्रेस कोड लगाउनुपर्ने थिएन। तर, हक्कानीले यस नयाँ नियमलाई जनताले स्वीकार गर्ने बताएका छन्। ‘मिश्रित शिक्षा प्रणाली अन्त्य गर्न हामीलाई कुनै समस्या छैन,’ उनले भने,‘जनता मुस्लिम हुन् र उनीहरुले यसलाई स्वीकार गर्नेछन्।’
कतिपयले यस नयाँ नियमले महिलाहरुलाई शिक्षाबाट वञ्चित गर्ने बताएका छन्। अफगानिस्तानका विश्वविद्यालयहरुसँग छुट्टै कक्षाहरु उपलब्ध गराउने स्रोतहरु छैनन्। तर, हक्कानीले अफगानिस्तानमा पर्याप्त महिला शिक्षिकाहरु रहेको र जहाँ उनीहरु उपलब्ध छैनन् त्यहाँ विकल्प भेटिने बताएका छन्।
‘यो सबै विश्वविद्यालयको क्षमतामा निर्भर हुन्छ,‘उनले भने,‘पुरुष शिक्षकहरुलाई पर्दा पछाडिबाट पढाउन वा टेक्नोलोजीको उपयोग गराउँन सक्छौं,’ उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
