कैलाली- नेपाली कांग्रेस कैलालीको सभापतिमा शेरबहादुर देउवा पक्षधर ६ जना आकांक्षी देखिएका छन्। विगतमा भन्दा कमजोर भएको कोइराला पक्षधरबाट भने सभापतिको आकांक्षीमा कोही पनि देखिएका छैनन्।
यसअघि जिल्ला सभापतिमा प्रतिस्पर्धा गरिसकेका भीम बडुवालले यसपटक पनि उम्मेदवारी दिने घोषणा गरिसकेका छन्। उनी आफूलाई देउवा समर्थक बताउँछन्। 'मेरो नेता देउवा हुन्', उनले भने, 'म देउवाकै उम्मेदवार हुँ।'
सभापतिको अर्को आकांक्षी हु्न्, प्रकाश बम। उनी अहिले पार्टी उपसभापति छन्। उनलाई पार्टी सभापति नरनारायण शाह मनुको साथ र समर्थन छ। यद्यपि, सभापति शाहका ३ जना उम्मेदवार छन्। तर, शाहको पहिलो रोजाइमा बम पर्छन्।
शाहको अर्का उम्मेदवार हुन्, खेमराज चौधरी। कैलाली थारु बाहूल्य जिल्ला भएकोले थारु समुदायको व्यक्ति पार्टी सभापति हुँदा राम्रो सन्देश जाने शाहको बुझाइ छ। तर, बम सभापति हुन नसक्ने अवस्थामा मात्र चौधरीलाई उम्मेदवार बनाउने शाहको योजना छ।
त्यस्तै, पार्टी सभापति शाहको तेस्रो रोजाइ हुन्, धनगढी उपमहानगरपालिकाका प्रमुख नृपबहादुर वड। वडलाई नगरप्रमुख बनाउन पनि शाहको मुख्य भूमिका थियो। कार्यकर्तामाझ भिजेका वडलाई नेपाली कांग्रेस सुदूरपश्चिम प्रदेश सभाका संसदीय दलका नेता रणबहादुर रावलले पनि साथ दिने संकेत देखाइसकेका छन्।
रावल र वड दुवै जना पार्टी सभापति देउवा र देउवापत्नी डा. आरजु राणा देउवासँग नजिक छन्। सजिलै सभापति हुने अवस्था भएमा पार्टी सभापति शाहले बमलाई उम्मेदवार बनाउने छन्। तर, फरक गुट र समूहसँग भिड्नु पर्ने अवस्था आएमा उनले वडलाई सभापति पदमा अघि सार्नेछन्।
वडलाई अघि सार्दा उनले पुनः धनगढीको प्रमुख हुने आकांक्षा भने त्याग्नु पर्ने दबाब छ।
पार्टी सभापति देउवा र देउवापत्नी आरजुसँग नजिक मानिने नारायणदत्त भट्ट र गणेश देउवा पनि सभापतिको दौडमा छन्। भट्ट सुरुदेखि नै देउवा पक्षधर हुन्। गणेश देउवा भने विगतमा कोइराला क्याम्पमा थिए। आरजुले सभापति बनाउने आश्वासन दिएकोले आफू देउवा क्याम्पमा आएको उनले बताउने गरेको कांग्रेस वृत्तमा चर्चा छ।
भट्टलाई नेपाली कांग्रेसका नेता पुष्कर ओझाको समेत साथ रहने बताइएको छ। यद्यपि, आरजुको उम्मेदवारका रुपमा भट्ट प्रस्तुत भए उनले ओझाको साथ भने गुमाउने छन्। किनकी आरजु र ओझाबीच तालमेल छैन। जुन कुरा आरजु चुनाव लड्दा छताछुल्ल भइसकेको छ।
भट्टलाई सभापतिका रुपमा वर्तमान सभापति शाहले पनि स्वीकार गर्दैनन्। धनगढी उपमहानगरपालिकाका प्रमुख वड पनि भट्टलाई सभापतिमा छोड्ने देखिँदैनन्। किनकी भट्टले नगरप्रमुख वडको बिरोध गर्दै आएका छन्। भट्टलाई नेपाली कांग्रेसका नेता कृष्णबहादुर महराको भने साथ र समर्थन छ। महराले भट्टलाई सभापतिको उम्मेदवार बनाउन पार्टी सभापति देउवा र देउवा पत्नीलाई दबाब दिँदै आएका छन्।
देउवापत्नी आरजुको साथ र समर्थनमा शाह पार्टी सभापति भएपनि यतिबेला भने उनीहरुबीच राम्रो सम्बन्ध छैन। आरजुका स्वकीय सचिव प्रकाश देउवाले त सार्वजनिक रुपमै शाहलाई विवेकशीलको कार्यकर्ताको आरोप लगाउँछन्।
आरजु र शाहका बीचमा फाटो ल्याउन प्रकाश देउवाका अभिव्यक्तिले पनि काम गरेको छ। धनगढीमा आरजु देउवाको माहोल बिगार्ने पनि प्रकाश देउवा नै मानिन्छन्। पार्टी सभापति शाह र आरजु देउवाका बीचमा फाटो ल्याउने पनि प्रकाश देउवा नै हुन्। प्रकाश देउवाका अभिव्यक्ति र व्यवहारका कारण आरजुसँग रुष्ट हुने कांग्रेस नेता र समर्थकको संख्या बढ्दो छ।
सभापति पदमा आफ्नै खेमाबाट ६ जना आकांक्षी देखिएकोले पार्टी सभापति देउवा र देउवापत्नी आरजुलाई सकस परेको छ। उनीहरुले अहिलेसम्म कसैलाई आफ्नो आधिकारिक उम्मेदवारका रुपमा घोषणा गरिसकेका छैनन्। यद्यपि, आकांक्षी सबैले आफूलाई पार्टी सभापति देउवा र उनकी पत्नी आरजुको साथ रहने बताउँदै आएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791212224.jpg)
-1786602170.png)
-1791090469.jpeg)
