कैलाली- आफैंले थापेको विद्युतीय पासोमा परेर बैतडीमा दुई दाजुभाइको मृत्यु भएको प्रहरी अनुसन्धानबाट खुलेको छ।
बैतडीको सुर्नया गाउँपालिका-५ मा आफैंले थापेको विद्युतीय पासोमा परेर बिहीबार राति करीब ९ बजेतिर २१ वर्षीय सन्तोष र १८ वर्षीय अमृत चन्दको मृत्यु भएको जिल्ला प्रहरी कार्यालय बैतडीले जनाएको छ।
घर नजिकै रहेको मकैबारीमा विद्युतीय सप्लाई रहेको तारको पासो बनाई जंगली बँदेल मार्नका लागि छोड्दा उनीहरु आफैंलाई करेन्ट लागेको थियो। करेन्ट लाग्दा दुबैको घटनास्थलमै मृत्यु भएको जिल्ला प्रहरी कार्यालय बैतडीका प्रबक्ता प्रहरी निरीक्षक बोधराज ओझाले जानकारी दिए।
घटना राति ९ बजेतिर भएको भएपनि प्रहरीलाई राति ११ बजेतिर खबर आएको प्रवक्ता ओझाले बताए। घटनास्थलबाट बँदेल मार्न प्रयोग गरिएको विद्युतीय पासो बरामद गरिएको उनले जानकारी दिए।
मृतकको परिवारले दिएको जानकारी अनुसार उनीहरु आफैंले पासो बनाएको र सोही पासोमा परि मृत्यु भएको प्रबक्ता ओझाले बताए।
मृतक दाजुभाइको पोस्टमार्टमपछि शव परिवारको जिम्मा लगाइएको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।