काठमाडौं- कोरोना कहरसँग जुध्दै कलाकार न्यू नर्मल लाइफमा कसरी गइरहेका छन्? यसैबारे कुराकानी गर्न केही दिनअघि नायिका करिष्मा मानन्धरलाई सम्पर्क गरेका थियौं। सुरुमा फोन नउठाएकी उनले मेसेजपछि भने फोन उठाइन्। मिडियाको परिचय दिने बित्तिकै उनले भनिन्, ‘म मिडियामा डटकम झुण्डिएकाहरुसँग कुरा गर्दिनँ।’ उनले अगाडि भनिन्, ‘मेनस्ट्रिमका मिडिया र केही स्थापित पत्रकारसँग मात्रै कुराकानी गर्छु।’
कारणबारे उनले भनिन्, ‘कुरा एउटा गर्यो, हेडलाइन अर्को राखिदिन्छन्। भन्दै नभनेका कुरा आफूले भनेको भन्दै पढ्नुपर्दा पारा तात्छ, त्यसैले डटकमवालालाई अन्तरवार्ता दिन्नँ।’
आफैले बोलेका कुरा अर्को तरिकाले हेर्न र पढ्न रुचि नभएकाले आफू नयाँ सञ्चार माध्यमबाट टाढै रहन चाहेको उनको भनाइ थियो।
कलाकार हुनुहुन्छ, सञ्चारमाध्यम त चहिन्छ नि? भन्ने जिज्ञासामा उनले त्यसका लागि आफूले युट्युब चलाइरहेको बताइन्। 'खराब मिडिया'कै कारण आफू युट्युबर बन्न परेको उनको तर्क छ। उनले भनिन्, ‘आफूलाई राख्न मन लागेका सबै कुरा आफ्नै च्यानलमा राख्यो, आनन्द! न भन्दै नभनेको सनसनीपूर्ण हेडलाइनको डर, न अर्थको अनर्थ लगाएर काटकुट पारेको भिडियोले विवाद मच्चाउने चिन्ता।’
करिष्माले आफ्नो युट्युब च्यानल कोभिड–१९ ले पारेको पहिलो चरणको प्रभावमा खोलेकी हुन्। अहिले झण्डै ५५ हजार सब्स्क्राइबर बनाइसकेकी छन्। उनले आफूले गरिरहेका कामदेखि घरपरिवार र खाना बनाएका भिडियोसम्म युट्युबमा राखेकी छन्।
युट्युबलाई व्यावसायिक रुपमा नै लगेकी अर्की नायिका हुन्, प्रियंका कार्की। उनीसँग पनि नेपाल लाइभले गर्भावस्थाको कुरा गर्न गरेको आग्रहमा सञ्चारमाध्यमदेखि डर लाग्ने बताइन्। उनले भनिन्, ‘यस्तो अवस्थामा म मिडियादेखि र विवाददेखि टाढा रहन चाहन्छु। मलाई खोज्ने फ्यानका लागि आफ्नै च्यानल छँदैछ।’
सञ्चारमाध्यमको काम कलाकारलाई चर्चामा राखिरहने भएको भन्दै उनले आफ्नै माध्यम भएपछि विवाद कम हुने, फ्यानमा राम्रो छबि बनाउन सकिने बताइन्। भनिन्, ‘कतिपय सञ्चारमाध्यम भ्यूज बटुल्न र धेरै मानिससम्म पुग्न हाम्रो नभएका, नभनेका कुराको प्रयोग गर्छन्।’ आफ्नै च्यानल भएपछि त्यसरी अरुले प्रयोग नगर्नेमा ढुक्क हुने उनको भनाइ छ।
प्रियंका युट्युबमा खाने कुराको भिडियो राख्छिन्। उनले चपचप डायरीज नामको खानेकुरा बनाउने कार्यक्रम व्यावसायिक रुपमा नै बनाएकी छन्। जसमा उनी आफ्नै हातले स्वादिष्ट खानेकुरा पकाउँछिन् र गृहिणीहरुलाई सिकाउँछिन्। भिडियो खिच्ने काम उनका श्रीमान समेत रहेका नायक आयुष्मान देशराज जोशीले गर्छन्।
नयाँ नयाँ रेसिपीको जानकारीसँगै परिवार र विभिन्न सेलिब्रेटीसँग गफगाफ पनि गर्छिन्। उनले झण्डै तीन लाख सब्स्क्राइबर बनाउन लागिसकेकी छन्। गर्भवती अवस्थामा पनि काममा व्यस्त हुन र फ्यानको आँखामा परिरहन उनले युट्युबको भरपुर सहारा लिइरहेकी छन्।
प्रियंका जस्तै गर्भावस्थाको सम्झना कैद गर्दै युट्युबमा पोष्ट गर्न व्यस्त छिन् नायिका ऋचा शर्मा। उनलाई पनि नेपाल लाइभले टेलिफोन गर्दा अहिलेको अवस्थामा पत्रकारसँग कुरा नगर्ने बताइन्। उनले भनिन्, ‘मेरो तर्फबाट केही कन्टेन्ट चाहिए ऋचा शर्मा नामको युट्युब च्यानलमा भिजिट गरेर काम चलाउन सक्नुहुन्छ।’
ऋचा युट्युबमा कहिले खाने कुरा पकाउँछिन्, कहिले गर्भावस्थामा गरिने योगा, व्यायाम सिकाउँछिन् त कहिलेकाहीँ मेकअप गरेका भिडियो राखिछन्। ऋचाले युट्युबको सब्स्क्राइबर भने लुकाएकी छन्।
नायिका रिमा विश्वकर्मा पनि यतिबेला आफ्नै युट्युब च्यानलमा रमाइरहेकी छन्। उनले ‘मेरो एउटा साथी छ’ नामको टक शो नै चलाइरहेकी छन्। सब्स्क्राइबर झण्डै ६५ हजारको हाराहारीमा पुगेको छन्। रिमा विभिन्न ठाउँ घुमेको, फोटोसुट गरेको भिडियो राख्न रुचाउँछिन्। साथै आफूलाई भन्न मन लागेका, अरुसमक्ष बाँड्न मन लागेका कुराहरुको समेत भिडियो बनाउँछिन्। उनी बेलाबखत मध्यरातमा कविता गुनगुनाउँदै बनाएका भिडियोदेखि, चित्र कोरेका भिडियोसम्म पोष्ट गर्छिन्। रूचिको काम गर्न युट्युबको प्रयोग गरेको उनको भनाइ छ।
उनले आफ्नै च्यानलबाट पोष्ट गरेको एक भिडियोमा भनेकी छन्, ‘म पनि आममानिस हुँ, सबैले गरेका कामहरु गर्न मन लाग्छ।’ त्यही मन लागेका कुरा भिडियोमार्फत् देखाउन च्यानल खोलेको उनको भनाइ छ। उनी च्यानलमा विभिन्न ध्यान विधि र आध्यात्मको कुरा पनि गर्छिन्।
बिहेको भिडियो राखेर युट्युब चलाउन सुरु गरेका नायिका वर्षा राउत र नायक सञ्जोग कोइरालाले त युट्युबलाई कुनै समयमा व्यावसायिक तरिकाले नै लैजाने योजना समेत बनाएका छन्। युट्युबमा आएको प्रतिक्रियाले उत्साह मिलेको पनि उनीहरुको भनाइ छ। हाललाई भने उनीहरुले युट्युबलाई अर्काइभको रुपमा प्रयोग गरेको बताए।
कुनै समय अरु रोजीरोटी नमिले यही भिडियोले समेत पाल्ने उनीहरुको आशा छ। वर्षा र सञ्जोगको युट्युबमा प्रायः घुमफिर गरेका, छुट्टी मनाइरहेका कुरालाई हेर्न सकिन्छ। वर्षा ‘भारतीय फ्यानले दुःख मान्ने’ भन्ने खालको विवादास्पद अभिव्यक्तिपछि उम्कने जरिया पनि युट्युब बनेको थियो। सञ्जोगले वर्षाले नजानेर भनेको र यही कारण उनको मानसिक हालत ठीक नभएको भिडियो बनाएर अपलोड गरेपछि विवाद मत्थर भएको थियो।
वर्षा र सञ्जोगको सांसा नामक युट्युब च्यानलले अहिलेसम्म झण्डै २ लाख १० हजार सब्स्क्राइबर बनाइसकेको छ।
भारतमा रहेकी कुनै समयकी चर्चित नायिका विपना थापा पनि युट्युबमा मग्न छिन्। ४ महिना अघिमात्रै युट्युब च्यानल खोलेकी विपनाको छोटो समयमै ८० हजार सब्स्क्राइबर पुग्न लागिसकेको छ।
उनी च्यानलमा नेपाली फ्यानका लागि भिडियो बनाउँछिन्। भारतमा हुने विवाह, महोत्सव लगायतमा उनले बनाएको भिडियो हेर्न पाइन्छ। उनी च्यानलमा आफूले फिल्म खेल्दाको अनुभवहरु पनि बाँड्न रुचाउँछिन्। प्रविधिकै कारण १४ वर्ष पुरानो बनेको जिन्दगी र यादलाई ताजा गर्न पाएकोमा उनी खुशी छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
