काठमाडौं– प्रतिनिधि सभा विघटनका विषयमा सर्वोच्च अदालतले गरेको फैसला गलत रहेको भन्दै राष्ट्रिय सभामा प्रश्न उठाइएको छ। नेकपा एमालेबाट राष्ट्रिय सभामा निर्वाचित सांसद देवेन्द्र दाहालले सेटिङबाट इजलास गठन र सेटिङबाटै फैसला गरिएको भनेर किन नभन्ने भन्दै प्रश्न गरेका छन्।
राष्ट्रिय सभाको बिहीबारको बैठकमा बोल्दै उनले भने, ‘फलाना– फलाना न्यायधीश बस्छन् भने हामी बाहिरिन्छौं कसले भने? त्यसका बारेमा लेखिएको खोइ? यसमा आत्मसमिक्षा चाहिन्थ्यो कि? त्यसो होइन भने सेटिङबाट इजलास गठन र सेटिङबाटै निर्णय भएको हो किन नभन्ने?’
फैसला सरकार प्रमुख कानुनी सल्लाहकार महान्यायधिवक्तामाथि आक्रोश पोखिँदा उनीहरुमाथि नबोलिएको भन्दै उनले यस्तो प्रश्न गरेका हुन्।
उनले प्रधानन्यायाधीश चोलेन्द्र शमसेर राणामाथि प्रश्न गर्दै भने, ‘म श्रीमानलाई भन्न चाहन्छु। जसले निवेदन दियो, उसैले जे–जे तर्क गर्यो, त्यसलाई सदर गर्ने निकाय हो अदालत?’
अदालतको इजलासमा उभिएर अमुक न्यायधीशलाई राख्न हुँदैन। वा प्रधानन्यायाधीशलाई ‘अप्ठेरो लाग्छ भने बिदा लिएर बस्नोस्’ भन्ने वकिलका विषयमा पनि कुनै टिप्पणी नगरिएको भन्दै उनले आक्रोश पोखे र भने, ‘अदालत कुन्ठा र आक्रोश पोख्ने थलो हो ?’
उनले यतिबेला देश परमादेशबाट शासित भइरहेको बताउँदै फैसलाका बारेमा राष्ट्रिय सभाले दृष्टिकोण बनाउनुपर्ने बताए। उनले भने, ‘भर्खरै अदालतले गरेको फैसलाका बारेमा यो सभाको दृष्टिकोण के हो? फैसलाका विषयमा प्रश्न उठाउन पाउने कि नपाउने?’
राष्ट्रिय सभा जनताको अदालत भएको बताउँदै उनले जनताको पक्षमा आवाज उठाउने मात्रै होइन, त्यस्ता गलत फैसलाका बारेमा जनतालाई सुसूचित गर्दै सच्याउन र काननुलाई प्रष्ट बनाउन लाग्नुपर्ने उल्लेख गरे। उनले भने, ‘अदालत गरेको गलत फैसला टुलुटुल हेर्नुपर्छ भन्ने होइन।’
प्रतिनिधि सभा पुनःस्थापित गर्दै शेरबहादुर देउवालाई प्रधानमन्त्री नियुक्त गर्नुपर्ने परमादेशबाट गम्भीर प्रश्न उठेको उनले बताए। स्वतन्त्र न्यायिक निकाय भएकाले यस्तो प्रश्न उठ्दै गर्दा त्यसको विश्वसनियतामाथि आँच आइरहेको उनको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
