काठमाडौं- इरानको दक्षिण–पश्चिमी क्षेत्रमा पानीको अभावका कारण भएको प्रदर्शनको क्रममा थप एक प्रहरीसहित दुईजनाको ज्यान गएको छ।
खुजेस्तान प्रान्तमा पानीको गम्भीर अभाव भएको छ। पानी नपाउँदा आक्रोशित स्थानीय बासिन्दाहरुले लगातार छौटौं दिन प्रदर्शन गरेका छन्।
खुजस्तानको पूर्वमा रहेको आइजेह शहरको महशहरमा भएको प्रदर्शनमा एक १६ वर्षे युवकको मृत्यु भएको बताइएको छ।
यस्तै, इरानको सरकारको नजिक मानिएको समाचार एजेन्सी फर्सका अनुसार प्रदर्शनकारीले चलाएकाे गाेली लागेर एक प्रहरीकाे मृत्यु भएकाे छ भने अर्को एकजना घाइते छन्।
सामाजिक सञ्जालमा पोष्ट भएका भिडियोमा सुरक्षाकर्मीले प्रदर्शनकारीहरुमाथि अश्रुग्यास प्रहार गरिरहेको देखिएको छ।
शनिबार भएकाे प्रदर्शनमा पनि एकजनाको मृत्यु भएको थियो। शादेगान शहरमा भएको प्रदर्शनमा अरब अल्पसंख्य समुदायका ती व्यक्तिको मृत्यु भएको बताइन्छ।
सरकारी समाचार एजेन्सीका अनुसार प्रदर्शनकारीहरुले हावामा गोली चलाउँदा उनलाई लागेको थियो।
तर, निजी सञ्चारमाध्यमहरुले भने सुरक्षाकर्मीले प्रहार गरेको गोली लागेको बताएका छन्।
इरानले एक दशकभन्दा बढी समयदेखि खडेरीको सामना गरिरहेको छ। तर यसवर्ष अवस्था गम्भीर बनेको छ। पानी तथा विद्युतको कमीलाई लिएर सर्वसाधारणमा आक्रोश तीव्र बन्दै गएको छ।
इरानका विपक्षी दलहरुले खुजस्तानमा चलिरहेको आन्दोलनको समर्थनमा प्रदर्शन गर्न सबै देशवासीलाई अपील गरेका छन्।
समाचार एजेन्सी रोयटर्सका अनुसार तेहरानको एउटा मेट्रो स्टेशनमा केही महिलाले ‘इस्लामिक रिपब्लिक हाई हाई’को नारा लगाएका थिए।
यस महिनाको शुरुदेखि नै इरानमा धेरै स्थानमा बिजुलीको अभाव भएको भन्दै प्रदर्शनहरू भएका थिए। उक्त प्रदर्शनमा सर्वोच्च धार्मिक नेता अयातुल्ला अली खमानेईविरूद्ध नाराबाजी गरेका थिए।
इरानी सरकारले गम्भीर खडेरी र विद्युत् कटौतीको गर्नु परेको जनाएको छ। राष्ट्रपति हसन रूहानीले मुलुकका अधिकांश जलविद्युत् आयोजनाहरू खडेरीका कारण बन्द भएकाे बताएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
