काठमाडौं- प्रधानमन्त्री शेरबहादुर देउवालाई पाकिस्तानी समकक्षी इमरान खानले बधाइ दिएका छन्।
सोमबार बिहान ट्वीट गर्दै पाकिस्तानी प्रधानमन्त्री खानले देउवाले संसदबाट विश्वासको मत जितेकोमा बधाइ दिएका हुन्।
प्रधानमन्त्री खानले पाकिस्तानले नेपालसँगको सौहार्दपूर्ण सम्बनधलाई अझ प्रगाढ बनाउन चाहेको बताएका छन्। उनले साझा हितका विषयमा नेपालसँगको सहकार्यलाई जारी राख्ने उल्लेख गरेका छन्।
यसअघि आइतबार राति भारतीय प्रधानमन्त्री नरेन्द्र मोदीले देउवालाई बधाइ दिएका थिए। आइतबार प्रतिनिधि सभाबाट विश्वासको मत लिएको केही समयमै मोदीले सामाजिक सञ्जालमार्फत देउवालाई बधाई दिएका हुन्।
सन्देशमा मोदीले देउवाको सफल कार्यकालको कामना गरेका छन्। मोदीले देउवाको प्रधानमन्त्रीकालमा दुई देशबीच सबै क्षेत्रमा सहकार्यका साथै जनता–जनताबीचको सम्बन्धलाई अझै प्रगाढ बन्ने आशा पनि व्यक्त गरेका छन्। प्रधानमन्त्री भएलगत्तै भारतीय समकक्षीले बधाई दिने गरेको भएपनि देउवालाई नदिएकोबारे चर्चा चलिरहेको बेला संसदमा विश्वासको मत पाएकै दिन मोदीले बधाई दिएका हुन्।
सर्वोच्च अदालतको फैसलापछि गत मंगलबार नै संविधानको धारा ७६ (५) अनुसार देउवा प्रधानमन्त्री नियुक्त भएका थिए। उनले आइतबार विश्वासको मत लिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
