काठमाडौं- प्रधानमन्त्री शेरबहादुर देउवाले आइतबार प्रतिनिधि सभाबाट विश्वासको मत लिँदैछन्। सर्वोच्चको परमादेश अनुसार असार २९ गते प्रधानमन्त्री नियुक्त भएका उनले आजै विश्वासको मत लिन लागेका हुन्। धारा ७६ (५) अनुसार नियुक्त प्रधानमन्त्रीले तीस दिनभित्र विश्वासको मत लिनुपर्ने व्यवस्था छ।
आज प्रतिनिधि सभाको दुइवटा बैठक बस्नेछन्। 'आज मुख्यगरी अब पहिलो बैठक भएको हुनाले औपचारिकता हुने भइहाल्यो। पहिलो बैठकमा राष्ट्रपति कार्यालयका पत्रहरु पढेर सुनाइनेछ। पूर्वसंविधानसभाका सदस्यहरु तथा सांसद्हरुको निधन भएको छ। शोक प्रस्तावहरु हुन्छन्', सभामुख अग्निप्रसाद सापकोटाले भने।
त्यसका अतिरिक्त यस अवधिमा जारी भएका अध्यादेशहरु पनि प्रस्तुत हुनेछन्। त्यसपछि पहिलो बैठक समापन हुने सापकोटाको भनाइ छ। पहिलो बैठक समापन भएको केही समयपछि दोस्रो बैठक प्रारम्भ हुन्छ। यसअघि १५ मिनेटपछि दोस्रो बैठक बस्ने गरिएको छ।
'दोस्रो बैठकमा प्रधानमन्त्रीज्यूले विश्वासको मत लिन्छु भनेर मलाई पत्र पठाउनुभएको छ। त्यो पत्र अनुसार विश्वासको मतको प्रस्ताव प्रस्तुत गर्नका लागि सचिवालयले तयारी गरिरहेको छ। तयारीका लागि मैले सचिवालयलाई निर्देशित पनि गरिरहेको छु। आज यिनै कार्यसूची छन्', सापकोटाले भने।
विश्वासको मतको लागि प्रधानमन्त्री देउवाको पत्र दर्ता भइसकेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1772429987-1772433038.jpg)
-1764146706.png)
