काठमाडौं- प्रधानमन्त्री शेरबहादुर देउवाले आइतबार प्रतिनिधि सभाबाट विश्वासको मत लिँदै छन्। सर्वोच्चको परमादेशअनुसार असार २९ गते प्रधानमन्त्री नियुक्त भएका उनले आजै विश्वासको मत लिन लागेका हुन्। धारा ७६ (५) अनुसार नियुक्त प्रधानमन्त्रीले ३० दिनभित्र विश्वासको मत लिनुपर्ने व्यवस्था छ।
प्रतिनिधि सभामा विश्वासको लागि १३६ मत भए पुग्छ। २७५ सदस्यीय प्रतिनिधि सभामा हाल चार जना पदमुक्त भएका छन्। थप चार जना निलम्बित छन्। उनीहरुले मत दिन नपाए पनि सांसद्को कुल संख्यामा उनीहरु समेत जोडिन्छन्।
प्रतिनिधि सभामा देखिएको पछिल्लो समीकरण अनुसार प्रधानमन्त्री देउवाले १५२ मत पाउने सम्भावना छ। उनको पक्षमा नेपाली कांग्रेस सहित माओवादी केन्द्र, नेकपा एमाले (माधवकुमार नेपालपक्ष), जनता समाजवादी पार्टी (उपेन्द्र यादवपक्ष), राष्ट्रिय जनमोर्चा र स्वतन्त्र सांसदसमेत छन्।
कांग्रेसका ६३ मध्ये ६१ जना मत दिन योग्य छन्। दुई जना निलम्बित छन्। त्यस्तै, माओवादी केन्द्रका ४८ जनाले पनि देउवालाई नै मत दिनेछन्। देउवाले गत जेठ ७ गते राष्ट्रपतिसमक्ष प्रधानमन्त्रीमा दाबी गर्दा नेपालपक्षका २६ सांसदले हस्ताक्षर गरेका थिए। तर, प्रतिनिधि सभा विघटन भएपछि त्यसविरुद्ध सर्वोच्च अदालतमा रिट दायर गर्दा भने सो पक्षमा २३ जना सांसदले मात्रै हस्ताक्षर गरेका थिए।
त्यस्तै, जसपामा उपेन्द्र यादव पक्षमा थपिने सांसद्हरुको संख्या बढ्दै गएको छ। शनिबारसम्म महन्थ ठाकुर र राजेन्द्र महतोपक्षका पाँच जना सांसद् यादव पक्षमा खुलेका छन्। थप एक जना पनि आफूहरुकै पक्षमा आइसकेको सो पक्षको दाबी छ। दाबीअनुसार यादवपक्षका १८ जनाले देउवालाई मत दिनेछन्।
त्यस्तै, राष्ट्रिय जनमोर्चाका एक जना र स्वतन्त्र सांसद् छक्कबहादुर लामाले पनि देउवालाई नै मत दिनेछन्। यसरी हेर्दा देउवाको पक्षमा १५२ मत पुग्ने देखिन्छ।
तर, देउवालाई आफ्नो पक्ष बाहेककै बहुमत पुगेमा माधवकुमार नेपालपक्षले सीमित सांसद्ले मात्रै मत दिने सम्भावना पनि छ। सम्भवतः सो पक्षका सात जनाले मात्रै मत दिएमा पनि देउवालाई पुग्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1772429987-1772433038.jpg)
-1764146706.png)
