काठमाडाैं- सिरियाली नेता बसर अल असदले चौथोपटक राष्ट्रपतिको शपथ लिएका छन्। दमास्कसमा शनिबार उनले शपथग्रहण गरेका हुन्।
शपथग्रहणपछि राष्ट्रलाई सम्बोधन गर्दै ५५ वर्षीय असदले सिरियाली जनतालाई धन्यवाद दिएका थिए। ‘जनताले आफ्नो रगत दिएर मातृभूमिको रक्षा गरेका छन्। सबैलाई धन्यवाद,’ उनले भने।
गत मेमा सम्पन्न निर्वाचनमा असदले ९५.१ प्रतिशत मत प्राप्त गरेका थिए। यद्यपि, विपक्षीहरुले भने निर्वाचनमा धाँधलीको आरोप लगाएका छन्।
फ्रान्स, जर्मनी, बेलायत, अमेरिका र इटालीले असद निर्वाचित भएको निर्वाचनको निष्पक्षतामा प्रश्न उठाएका थिए। सन् २०१४ मा भएको निर्वाचनमा असदले ८८ प्रतिशत मत ल्याएका थिए।
उनको परिवारले सिरियामा करिब ६ दशकदेखि शासन गरिरहेको छ। उनका बुवा हफेज अल असदले सन् २०० सम्म ३० वर्ष सिरियाको नेतृत्व गरेका थिए।
अब असदले थप सात वर्ष राष्ट्रपतिका रुपमा काम गर्नेछन्। २०११ देखि सिरिया गृहयुद्धको अवस्थासँगै जुझिरहेको छ। यस कारण लाखौं मानिस विस्थापित हुनुपर्छ।
वर्षौंको द्वन्द्वपछि रूसी समर्थित सिरियाली सरकारी सेनाले देशको दुई तिहाई हिस्सा कब्जा गरेको छ। तर, त्यहाँ अझै धेरै त्यस्ता क्षेत्रहरू छन्, जुन सरकारको नियन्त्रण बाहिर छन्।
असदलाई सिरियाको अर्थतन्त्रलाई बचाउने चुनौति छ। समाचार एजेन्सी एएफपीका अनुसार देशको ८० प्रतिशत जनसंख्या गरीबीको सामना गरिरहेका छन्। सिरियाली पाउण्डमा गिरावट आउँदा मुलुकमा मुद्रास्फीति उच्च विन्दुमा छ।
हालसालै सरकारले पेट्रोल, रोटी, चिनी र चामलको मूल्य बढाएको छ। ‘देशको धेरै पैसा छिमेकी लेबनानको बैंकमा अड्किएको छ। देशको प्रगति नहुनु यो पनि मुख्य कारण हो,’ राष्ट्रपति असदले भने।
सरकारी अधिकारीहरुका अनुसार लेबनानमा करिब ४० देखि ६० अरब डलर रहेको छ। समाचार एजेन्सी रोयटर्सका अनुसार सिरियाका कम्पनीहरूले पश्चिमी देशहरूले लगाएको प्रतिबन्धलाई सामना गर्न लेबनानको बैंकिङ प्रणालीको फाइदा उठाएका थिए।
तर, आर्थिक संकटबाट प्रभावित लेबनानले २०१९ मा देश बाहिर पैसा ट्रान्सफरमा प्रतिबन्ध लगाएको थियो, जसका कारण सिरियामा समेत यसको प्रभाव परेको छ।
असदले पश्चिमी देशहरूले लगाएको प्रतिबन्धबाट मुक्त हुन यथासक्य गर्ने प्रतिवद्धता व्यक्त गरेका छन्। ‘प्रतिबन्धका कारण हामी हाम्रा आवश्यक चीजहरूको व्यवस्था गर्न सक्षम नभएको होइन। तर, यसको कारण केही ठूला समस्याहरू अवश्य खडा भएका छन्,’ उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778155080.jpg)
-1764146706.png)
