सर्वोच्चको फैसलापछि ओली पक्ष सडकमा !

राजनीति

निमेष जंग राई सोमबार, असार २८, २०७८ १४:२६

काठमाडौं– प्रधानमन्त्री केपी शर्मा ओलीले समर्थकहरुले संसद पुनःस्थापना गर्ने सर्वोच्च अदालतको फैसलाको विरोध गरेका छन्।

नेकपा एमालेका युवा संघ समर्थित युवाहरु सर्वोच्चको फैसलाको विरोध गर्दै सोमबार सडकमा निस्किएका छन्।

ओली समर्थकहरुले सोमबार काठमाडौंको माइतीघरमा सर्वोच्च अदालतको फैसलाको विरोध र केपी शर्मा ओलीले समर्थनमा जुलुस निकालेका छन्।

एमाले नेता महेश बस्नेतले सर्वोच्चको फैसला सार्वजनिक हुनासाथ तुरुन्त अहिले नै माइतीघर मण्डलामा जम्मा भएर सर्वोच्च अदालतको असंवैधानिक फैसलाका विरुद्ध विरोध जनाउन आह्वान गरेका थिए। फेसबुकले उनले लेखेका थिए- ‘युवा संघले यसको (फैसला) विरुद्ध तुरुन्तै माइतीघर मण्डलामा बिरोध प्रदशन गर्दैछ। जो जहाँ छौँ, सहभागी बनौँ। देशभर विरोध प्रदशन गरौँ।‘

माइतीघरमा यतिबेला एमालेका नेता तथा कार्यकर्ताहरु जुट्ने र भाषण गर्ने क्रम चलिरहेको छ। सर्वोच्चले देशलाई मुडभेड र अस्थिरतातर्फ लैजान लागेको भन्दै उनीहरुले असन्तुष्टि व्यक्त गरेका छन्। उनीहरुले देशैभर विरोध प्रदर्शन देशैभरका मातहतका कमिटीलाई निर्देशन दिइसकेको पनि बताएका छन्। प्रदर्शनकारीका अनुसार, काठमाडौंका विभिन्न स्थानबाट एमाले कार्यकर्ताहरु मोटरसाइकल र्‍याली सहित माइतीघरमा जम्मा हुनेछन्।

माइतीघरमा प्रदर्शनकारीले ‘सबै फैसला मानिँदैन! खबरदार’ लेखिएको मुख्य ब्यानर प्रदर्शन गरेका छन्। उनीहरुले नेकपा एमाले जिन्दावाद, विदेशी दलाल होसियार, संविधान मिच्न पाइँदैन, केपी ओली जिन्दावाद, राष्ट्रघाती गठबन्धन चाहिँदैन जस्ता नारा लगाइएका छन्।

ओलीको प्रस्तावमा राष्ट्रपति विद्यादेवी भण्डारीले जेठ ७ गते गरेको संसद विघटनको निर्णय सर्वोच्चले बदर गरिदिएको हो।

सर्वोच्च अदालतको संवैधानिक इजलासले सोमबार फैसला सुनाउँदै १४६ जना सांसदको रिटमा मागदाबी गरिएअनुसार नेपाली कांग्रेसका सभापति शेरबहादुर देउवालाई २ दिनभित्र प्रधानमन्त्री नियुक्त गर्न पनि परमादेश जारी गरेको छ।