स्थानीय निर्वाचन

भोट हाल्न गाउँ फर्किनेको लर्को [तस्बिरहरु]

निमेष जंग राई मंगलबार, वैशाख २७, २०७९ ११:१७

काठमाडौं– स्थानीय तह निर्वाचनको मौन अवधि सुरु हुन अब केही घण्टा मात्रै बाँकी छ। मौन अवधिमा चुनावी प्रचारप्रसार गर्न नपाइने भएका कारण उम्मेदवारहरु अन्तिम प्रचारमा व्यस्त छन्।

वैशाख ३० गते हुने चुनाव (मतदान)मा सहभागी हुन शहरी क्षेत्रबाट गाउँमा मतदाता ओसार्न पनि अहिले दलका कार्यकर्तालाई भ्याइनभ्याइ छ। संघीय राजधानी काठमाडौंमा रहेका आफ्ना गाउँका मतदाता ओसार्न उम्मेदवारहरुले गाडीकै व्यवस्था गरेका छन्।

काठमाडौंको कलंकी, कोटेश्वर, बल्खु क्षेत्रमा अहिले दलका कार्यकर्ताहरुले आफ्नो पार्टीको झण्डा नै टाँगेर गाडी स्ट्याण्डबाई राखेका छन्।

काठमाडौंको कोटेश्वरमा नेपाली कांग्रेसका उम्मेदवारका लागि गाडी व्यवस्थापनमा खटिएका एक युवकले आफूहरुले सोमबारदेखि नै गाडी व्यवस्थापन गरेर मतदाताहरुलाई गाउँ फर्काउन लागेको बताए।

'धेरै मतदाता गाउँ फर्किन चाहनुहुन्छ। उहाँहरुलाई सहजै यातायातको व्यवस्था होस् भनेर हामीले सहयोग गरिरहेका छौं,' नाम उल्लेख गर्न नचाहने ती युवकले भने।

काठमाडौंबाट मतदाताहरुलाई गाउँ ओसार्न सम्बन्धित जिल्लाका पार्टी प्रतिनिधि, पार्टीका सम्पर्क मञ्च र उम्मेदवारका आफन्तहरुले समेत गाडीको व्यवस्था गरिरहेका छन्।

हातमा आफ्नो वडाका मतदाताहरुको नामावलीको सूची बोकेका एक युवकले आफूले नेकपा एमालेका उम्मेदवारलाई सहयोग गरिरहेको बताए। काठमाडौंको कोटेश्वरमा भेटिएका उनले आफ्नो पालिका र वडाका मतदाता ओसार्न ४ वटा गाडी बूक गरिएको बताए।

काठमाडौं उपत्यकामा चल्ने सार्वजनिक सवारीका साधन (बस, माइक्रो बस) पनि उम्मेदवारहरुले आफ्नो क्षेत्रका मतदाता ओसार्न बुक गरेका छन्। यस्तै, लामो दूरीमा चल्ने बसहरु पनि पार्टीका झण्डा फहराउँदै मतदाता बोकेर चलिरहेका छन्।

काठमाडौंबाट धनगढी जान लागेको एउटा बसका चालकले आफूले ५ दिन अगाडिदेखि मतदाता बोक्न थालेको बताए। धनगढीबाट काठमाडौं आउँदा बस खाली नै हुने भएपनि काठमाडौंबाट धनगढी जानेबेला भने बसमा खचाखच मान्छे हुने गरेको उनले सुनाए।

'हाम्रो बस कुनै एउटा मात्रै पार्टीले बुक गरेको छैन। सबै पार्टीका व्यक्तिहरुले आफ्ना मतदाताको टिकट काटेर गाडीमा मान्छे हाल्छन्। हामीले सिट क्षमताअनुसार टिकट काटेर मान्छे बोकिरहेका छौं,' ती चालकले भने।

केही उम्मेदवारले भने साना बस र जिप बुक गरेर मतदाता ओसारिरहेका छन्। काठमाडौंबाट बागलुङ जान लागेको एउटा माइक्रोबसका यात्रुले आफू चुनावमा मतदान गर्न गाउँ जान लागेको बताए। 'मैले आफैं टिकट काटेको हुँ। आफ्नो मताधिकार प्रयोग गर्न किन अरुले व्यवस्था गरिदिएको गाडीमा जानु भनेर आफैं टिकट काटे,' काठमाडौंको गोंगबुमा भेटिएका ती युवकले भने।