काठमाडौं- पछिल्लो समय निकै कटुतापूर्ण सम्बन्धमा रहेका नेकपा एमालेका अध्यक्ष एवं प्रधानमन्त्री केपी शर्मा ओली र वरिष्ठ नेता माधवकुमार नेपालबीच बुधबार साँझ काठमाडौंको नागपोखरी, नक्सालस्थित मेरियट होटलमा झण्डै दुई घण्टा वान अन वान वार्ता भयो।
अलग पार्टीको अभ्यासमा अघि बढिसकेका एमालेका दुई शीर्ष नेताबीचको यो वार्ता कुनै निष्कर्षमा भने पुगेन। वार्ता सकेर ओली र नेपाल कुनै प्रतिक्रिया नदिई बाहिरिए भने त्यो वार्ताअघि ओली र नेपालसहित मेरियटमै भएको संयुक्त छलफलमा सहभागी एमालेका दोस्रो तहका नेताहरु भने बुधबार साँझको वार्ताबाट आशावादी देखिएका छन्।
उनीहरुले शीर्ष नेताद्वयबीच सकारात्मक छलफल भएको बताएका छन्। जस्तो कि, वार्तास्थलबाट बाहिरिने क्रममा नेपालपक्षका नेता, एमाले स्थायी कमिटी सदस्य सुरेन्द्र पाण्डे छलफल सकारात्मक रहेको प्रतिक्रिया दिए। ठोस निष्कर्ष केही ननिस्किए पनि यो वार्तालाई एमाले नेताहरुले कसरी सकारात्मक देखे?
के भयो मेरियटमा?
करिब सवा सातबजे मेरियट पुगेका ओली र नेपालले शुरुमा त्यहाँ आफ्नोपक्षका केही नेताहरुसहित संयुक्त छलफल गरेका थिए। ओली र नेपालबाहेक त्यो छलफलमा एमाले महासचिव ईश्वर पोखरेल, एमाले विवाद समाधानका लागि गठित कार्यदलमा ओलीका तर्फबाट सहभागी स्थायी कमिटी सदस्य विष्णु पौडेल तथा कार्यदलमा नेपालपक्षका स्थायी कमिटी सदस्यद्वय भीम रावल र सुरेन्द्र पाण्डे सहभागी थिए।
‘पहिले हामी सबैले संयुक्त छलफल गर्यौं, एक हिसाबले त्यो अनौपचारिक छलफल जस्तै थियो’, एमाले महासचिव ईश्वर पोखरेलले नेपाल लाइभसँग भने, ‘त्यसपछि उहाँहरु दुई जनाबीचमा वान अन वान छलफल भयो।’ पोखरेलले दुई नेताबीचमा मात्र भएको कुराकानी आफूलाई जानकारी नभएको तर छलफल सकारात्मक रहेको बताए। ‘उहाँहरु एकापसमा भेटेर छलफल गर्न र पार्टीलाई एकतावद्ध राख्न सहमत हुनुभयो, यो नै सकारात्मक हो नि, पोखरलले भने, ‘सकारात्मक हुँदैन्थ्यो भने त उहाँहरुको भेट नै हुने अवस्था बन्दैन्थ्यो नि।’
पछिल्ला तीन दिन लगातार सक्रिय भएको एमाले विवाद समाधान कार्यदलले बुधबार साझा धारणा तय गर्दै आफूहरुबीचमा सहमति बनेको जनाएको थियो। त्यही सहमतिलाई ओली र नेपालसँग राख्न कार्यदलले बुधबार नै दुवैको भेट गराउने बताएको थियो। त्यसअनुसार नै बुधबार साँझ ओली र नेपालको वार्ता जुरेको थियो।
एमाले विवाद सुल्झाउन भनेर बनेको यो कार्यदल पहिले पनि सक्रिय थियो। तर, गत जेठ ७ गते मध्यरात ओलीले हठात् प्रतिनिधि सभा विघटन गरेपछि कार्यदल स्वतः भताभुंग भएको थियो। पछिल्लो समय एमालेका दुवै समूहलाई नेता र कार्यकर्ताको खेपिनसक्नु दबाब परेपछि ओली र नेपाल दुवैले कार्यदल सक्रिय तुल्याउने निर्णय गरेका थिए। त्यसकै परिणाम बुधबारको परिस्थिति खडा भएको थियो।
‘बुधबार भेट्नसाथै सबथोक टुंगिइहाल्छ, दुई नेताले हस्ताक्षरसहितको सहमति गरिहाल्नुहुन्छ भन्ने कसैले सोचेको भए आजको वार्ताबाट निराश हुने अवस्था बन्थ्यो होला’, कार्यदलमा रहेका एक एमाले नेताले भने, ‘आजको वार्ताको उद्देश्य नै दुई नेतालाई संवादमा प्रवेश गराउने थियो। त्यसकारण हामी आशावादी बनेका हौं।’
वान अन वान वार्तामा प्रवेश पाएको पावर सेयरिङ
ओली र नेपाल दुवैपक्षका नेताहरुले बुधबार अबेर राति दिएको जानकारीअनुसार उनीहरुबीचको वान अन वान वार्तामा धेरैजसो विषयमा कुरा भएनन्। समग्रमा पार्टीलाई एकतावद्ध राख्ने विषयमा दुवैको समान धारणा बनेको तर, त्यसका लागि गर्नुपर्ने कामका लागि विषयगत छलफल भने हुन बाँकी रहेको उनीहरुको भनाइ छ।
त्यसकै लागि भनेर बिहीबार बिहान ११ बजे कार्यदलको बैठक बस्दैछ। र, त्यसलगत्तै आवश्यक महसुस भएमा दुई नेताबी बिहीबार नै या चाँडै छलफल हुनसक्ने नेताहरुले बताएका छन्।
अन्य विषयमा कार्यदलस्तरमै सहमति खोज्ने मूडमा ओली र नेपाल दुवै भए पनि बुधबार साँझको वार्तामा ‘पावर सेयरिङ’ को विषय भने प्रवेश भएको छ। वार्ताबाट निस्केपछि ओली र नेपालले निकटस्थहरुलाई दिएको जानकारीअनुसार नेपालले अन्य विषयसँगै पार्टी हाँक्नका लागि अब ‘पावर सेयरिङ’को विषय पनि समाधान गर्नुपर्ने बताएका थिए।
यसबारे यसअघि कार्यदलदेखि अन्य अनौपचारिक बैठकमा समेत छलफल हुँदै आएका छन् भलै त्यसले कुनै ठोस आकार नपाएको किन नहोस्। नेपाल स्वयंले एमालेलाई एकताबद्ध पार्न अन्य थुप्रै अडानसँगै एक व्यक्ति एक पदको विषय सार्वजनिक रुपमासमेत उठाएका छन्। नेपाल मात्र होइन, ओलीपक्षकै कतिपय नेताहरुले यसमै टेकेर पार्टीलाई विग्रहबाट रोक्न ओलीले नेपाललाई प्रधानमन्त्री वा पार्टी अध्यक्ष बनाउनेसम्मको अग्रसरता देखाउनुपर्ने कुरा राख्दै आएका छन्।
ओली र नेपालबीच बुधबार साँझ भएको ‘पावर सेयरिङ’को विषय ठ्याक्कै के थियो भन्ने प्रष्ट भइसकेको छैन। नेताहरु अहिल्यै यसबारे मुख नखोल्ने रणनीतिमा छन्। तर, त्यसबारे ओली र नेपालबीच बुधबार साँझ खासै मतैक्य देखिएको बताइएको छ।
‘हो, मतैक्य नभएको साँचो हो। तर, बुझ्नुपर्ने के हो भने यो यति सजिलै मिलिहाल्ने विषय होइन’, नेपालपक्षमै एक नेताले भने, ‘यो अहिल्यै मिलिहाल्ने, केही समयमै परिणाम आइहाल्ने विषय नै होइन। यसमा लामो समय पनि लाग्न सक्छ। मुख्य कुरा छलफलको सही सुरुआत भएको छ, हामी त्यसकारण आशावादी छौं।’ तर, कार्यदलमा जुटेको वा अझ पनि जुट्ने सहमतिलाई दुवै शीर्षनेताले कसरी ग्रहण गर्छन्, अहिले भएको संवादको सुरुआतलाई कसरी अगाडि बढाउँछन् भन्ने कुरा भने अगाडिका दिनमा निर्भर हुने उनले बताए। ‘हामीले संकेत राम्रो पाएका छौं, बाँकी त उहाँहरु दुई जनामा निर्भर छ’, उनले ‘पावर सेयरिङ’को विषय नै प्रमुख बन्न सक्ने संकेत गर्दै भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
