काठमाडौं- अमेरिकाले आफ्ना गठबन्धनको सेना जुलाईको अन्तिम साता वा त्यसपछि अफगानिस्तानबाट फर्किने बताएको छ। यद्यपि, आधिकारिकरुपमा भने यसबारे अमेरिकाले कुनै जानकारी दिएको छैन।
पछिल्लो समय अमेरिकाले चीन र रुसबाट धेरै चुनौती उत्पन्न भएको भन्दै अन्य क्षेत्रमा आफ्नो सैन्य मिसन अन्त्य गर्ने निर्णय गरेको हो। अमेरिका र नेटाका सदस्य राष्ट्रहरुले आउँदो सेप्टेम्बर ११ सम्ममा अफगानिस्तानबाट सैनिक फिर्ता लैजाने तयारी गरेका छन् र त्यसमा उनीहरु प्रतिवद्ध रहेको बताउँदै आएका छन्।
यद्यपि, अफगानिस्तानमा आगामी सेप्टेम्बरपछि पनि ६५० अमेरिकी सैनिक बस्ने भएका छन्। समाचार एजेन्सी एपीका अनुसार कूटनीतिक अधिकारीको सुरक्षाको लागि उक्त संख्यामा अमेरिकी सैनिक अफगानिस्तानमा रहने भएका हुन्।
अमेरिकी अधिकारीका अनुसार टर्कीको सेनाको अपरेसन पूरा नहुँदासम्म केही सेनाले विमानस्थलमा टर्कीलाई सहयोग गर्नेछन्। विमानस्थलमा टर्कीसँगको सहकार्यमा अमेरिकाले विभिन्न प्रविधिको प्रयोग गरिरहेको छ। त्यसैले उक्त प्रविधिको रक्षाको लागि पनि केही अमेरिकी सैनिक अफगानिस्तानमा नै रहने भएका हुन्।
पछिल्लो केही समययता निरन्तर अमेरिकाको गठबन्धनमा आबद्ध मुलुकले अफगानिस्तानबाट आफ्ना सैनिक फिर्ता गरिरहेका छन्। यसैबीच अफगानिस्तानमा विद्रोही तालिबानले पनि आफ्नो कब्जा बढाउँदै लगेको छ।
तालिबानले मंगलबार मात्रै ताजकिस्तानसँगको प्रमुख सीमामा पनि नियन्त्रण कायम गरेको अधिकारीहरुले बताएका छन्। कुन्दुज प्रान्तको सो शिर खान बन्दरगाह कब्जा गरेकाे छ। तालिबानले बन्दरगाह, शहर र ताजिकिस्तानको सबै सीमा चौकी कब्जा गरेसँगै त्यहाँ कार्यरत सरकारी अधिकारी र सुरक्षाकर्मीहरु भागेको बताइएको छ।
‘एक घण्टा लडाइँ पछि दुर्भाग्यवस तालिबानले शिर खान बन्दरगाह, शहर र ताजिकिस्तानको सबै सीमा चौकी कब्जा गर्यो,’ कुन्जुद प्रान्तीय परिषदका सदस्य खालिद्दीन हकमीले भने।
तालिबान बिद्रोहीले राज्यको राजधानीबाहेक सबै क्षेत्रमा आफ्नो नियन्त्रण रहेको बताएका छन्। स्थानीय सञ्चारमाध्यमहरुले पनि तालिबानले आफ्नो पडक बिस्तार गर्दै लगेको उल्लेख गरेका छन्। यद्यपि, राष्ट्रसंघले अफगानिस्तानमा पुनः हिंसा र अस्थिरताको जोखिम बढेको भन्दै चिन्ता व्यक्त गरेको छ।
गएको मे यता अफगानिस्तानका ३७० जिल्ला मध्ये ५० जिल्लामा तालिबान बिद्रोहीले हिंसात्मक आक्रमण गरेको राष्ट्रसंघका विशेष दूत डेबरा लायन्सले सुरक्षा परिषद्लाई जानकारी दिएकी छिन्।
‘सैन्य गतिविधि बढाएर तालिबानले आफ्नो पकड बिस्तार गरेको छ। यसले आउँदा दिनमा अवस्था थप भयावह हुनसक्न छ। अफगानिस्तानमा हिंसा बढ्दै जानु भनेको छिमेक र पर रहेका देशहरुका लागि सुरक्षा चुनौति बढ्नु हो।यसबारे सोच्नुपर्ने स्थिति आएको छ,’ १५ सदस्यीय संयुक्त राष्ट्रसंघीय सुरक्षा परिषद्को बैठक उनले भनेकी छिन्।
तालिबानले हाल नियन्त्रण कायम गरेका जिल्लाहरु क्षेत्रीय राजधानी वरपरका रहेको र विदेशी सैनिक फिर्ता गए लगत्तै ती राजधानीहरुमा नियन्त्रण कायम गर्ने लक्ष्य तालिबानको हुन सक्ने उनको भनाइ छ।
यता, अमेरिकी रक्षा मन्त्रालयका प्रवक्ता जोन किर्बीले तालिबानका गतिविधिहरुले सैनिक फिर्ता बोलाउने अभियानमा कुनै प्रभाव नपर्ने बताएका छन्। तर, उनले वर्तमान अवस्थाबारे निगरानी भइरहेको जानकारी दिएका छन्।
शुक्रबार अफगानिस्तानका राष्ट्रपति असर्फ घानीले अमेरिकी राष्ट्रपति जो वाइडनसँग भेटवार्ता गर्दैछन्। यो भेटमा अफगानिस्तानको विषयमा महत्वपूर्ण निर्णय हुन सक्ने अपेक्षा गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
