काठमाडाैं- भारतमा आगामी अक्टोबरबाट कोरोनाको तेस्राे लहर आउनसक्ने विज्ञहरुले अनुमान गरेका छन्।
स्वास्थ्य विशेषज्ञ, वैज्ञानिक, संक्रामक रोग विशेषज्ञ, महामारीविद् र प्राध्यापक समाचार संस्था रोयटर्सले गरेको कुराकानीमा उनीहरुले तेस्रो लहर आउन सक्ने चेतावनी दिएका हुन्।
रोयटर्सले जुन ३ देखि १७ सम्ममा ४० स्वास्थ्य विशेषज्ञ, वैज्ञानिक, संक्रामक रोग विशेषज्ञ, महामारीविद् र प्राध्यापकसँग लिएकाे रायमा उनीहरुले अक्टोबरमा शुरु हुने तेस्रो लहर वर्षको अन्तिमसम्म रहने बताएका हुन्।
४० मध्ये ३० जनाले भारतको लागि कम्तीमा एक वर्ष कोरोना महामारी सार्वजनिक स्वास्थ्यको चुनौती बन्नसक्ने बताएका छन्।
सर्वेक्षणमा सहभागीमध्ये ८५ प्रतिशतले भारतमा कोरोनाको तेस्रो लहर अक्टोबर महिनामा आउनसक्ने बताएका थिए। त्यस्तै, ७० प्रतिशतभन्दा धेरैले यो लहर दोस्रो लहरको तुलनामा नियन्त्रित हुने अनुमान गरेका थिए।
‘यो निकै नियन्त्रित हुन सक्छ। आगामी दिनमा थप मानिसहरुले कोरोना खोप लगाउनेछन् र दोस्रो लहरपछि मानिसहरुमा विकास भएको प्राकृतिक प्रतिरोधी क्षमताले पनि काम गर्नसक्छ, ’अल इन्डिया इन्स्टिच्युट अफ मेडिकल साइन्सका निर्देशक डा रणदीप गुलेरियाले भने।
भारतमा यसअघि हरेक दिन ४ हजारकाे हाराहारीमा मृत्यु हुने गरेकाे थियाे। तर, पछिल्ला केही दिन काेराेना संक्रमितकाे हरेक दिन मृत्यु हुने दरमा केही कमी आएकाे छ।
केन्द्रीय स्वास्थ्य मन्त्रालयका अनुसार पछिल्लाे २४ घण्टामा १५ सय ८७ जना संक्रमितकाे मृत्यु भएकाे छ। ३ लाख ८३ हजार ४ सय ९० जनाले ज्यान गुमाएका छन्।
यस्तै, पछिल्लाे २० घण्टाकाे अवधिमा ८८ हजार ९ सय ७७ जना संक्रमणमुक्त भएका छन्। याेसँगै संक्रमणमुक्त हुनेकाे संख्या २ कराेड ८५ लाख ८० हजार ६ सय ४७ पुगेकाे छर
२४ घण्टामा नयाँ संक्रमित थपिनेकाे संख्या ६२ हजार ४ सय ८० छ।अहिलेसम्म भारतमा २ कराेड ९७ लाख ६२ हजार ७ सय ९३ जनामा संक्रमण पुष्टि भएकाे छ।
अहिले भारतमा ७ लाख ९८ हजार भन्दा धेरै सक्रिय संक्रमित रहेका छन्।अहिलेसम्म भारतमा खोपका लागि योग्य करिब ९५ करोडमध्ये पाँच प्रतिशतले मात्र पूरा डोज लिएका छन्। अझै पनि धेरै मानिसहरु कोरोना संक्रमणको उच्च जोखिममा देखिएका छन्।
तेस्रो लहरमा बालबालिका जोखिममा
रिपाेर्टका अनुसार खाेपबा टाढा राखिएकाे कारण यसकाे चपेटामा बालबालिका पर्नसक्ने छन्।
‘अहिलेसम्म बालबालिकालाई खोपको अनुमति दिइएको छैन। उनीहरु पूर्ण रुपबाट बञ्चित छन्। यो पनि एक कारण पनि बालबालिका यसकाे चपेटामा पर्नसक्छन्,’ नेशनल इन्ष्टिच्युट अफ मेन्टल हेल्थ एण्ड न्युरोसाइन्सको महामारीशास्त्र विभागका प्रमुख डा. प्रदीप बनान्दुरले भने।
यस्तै, कर्नाटक सरकारका हृदय रोग विशेषज्ञ डा देवीप्रसाद शेट्टीले अहिले नै तयारीमा जुट्न नसके धैर बालबालिका यसकाे चपेटामा पर्ने दाबी गर्छ।
‘पर्याप्त तयारी हुन सकेन भने धेरै बालबालिका कोरोना संक्रमित बन्छन्। अन्तिम समयमा केही पनि गर्न सकिँदैन’, उनले भने।
यद्यपि, १४ विज्ञले भने बालबालिका जाेखिममा नरहेकाे बताएका छन्।
उनीहरुले खाेपकाे विकासमा ध्यान दिन आग्रहसमेत गरेका छन्। ‘काेराेना महामारी खोपको माध्यमबाट सहजै समाधान गर्न सकिन्छ । दुई वर्षमा भारतमा खोप र कोरोनासँगको सम्पर्कको कारण हर्ड इम्युनिटीको विकास हुन सक्छ’, युनिभर्सिटी अफ मेरिल्याण्डको इन्ष्टिच्युट अफ ह्युमन भाइरोलोजीका निर्देशक रोबर्ट ग्यालोले भने।
३८ मध्ये २५विज्ञले कोरोना भाइरसकाे नयाँ भेरियन्ट्सले विद्यमान खोपलाई प्रभावकारी बनाउन नसक्ने बताएका छन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791448938.png)
-1786602170.png)
-1791388337.png)
