काठमाडाैं- इजरायलले पुन: गाजापट्टीमा आक्रमण गरेको छ। गत महिना हमाससँग युद्धविरामको सम्झौता भएपछि इजरायलले दाेस्राे पटक गाजामा आक्रमण गरेकाे हाे।
गत महिना हमाससँग ११ दिनको युद्धपछि दुवै पक्षबीच युद्धविरामको सम्झौता भएको थियो। पहिलाेपटक इजरायलले मंगलबार गाजापट्टीमा रहेकाे हमासको अड्डामा हवाई आक्रमण गरेको थियाे।
इजरायको सुरक्षा बल (आईडीएफ)का अनुसार इजरायलमा हमासले आगो लगाउने बेलुनले आक्रमण गरेसँगै प्रतिशाेधस्वरुप यो आक्रमण गरिएको हो।
त्यसपछि बिहीबार पुन: इजरायली लडाकु विमानले गाजापट्टीमा श्रृङलाबद्ध आक्रमण गरेको हो। अन्तर्राष्ट्रिय सञ्चारमाध्यमहरुका अनुसार गाजा क्षेत्रमा हमासका लडाकुहरु रहेको क्षेत्रमा इजरायलको सेनाले मिसाइल आक्रमण गरेको हो।
हमासको स्वामित्वमा रहेको एक टेलिभिजनले गाजा पट्टीको पश्चिमी भागमा इजरायली ड्रोन झारिएको दाबी गरेको छ। केही सञ्चारमाध्यमले हमासले पनि इजरायलतर्फ आक्रमण गरेको बताएका छन्। तर, अहिलेसम्म यो आक्रमणमा मानवीय क्षति भएको वा नभएको स्पष्ट हुन जानकारी आएकाे छैन।
घटनापछि हमासले एक विज्ञप्ति जारी गर्दै आफ्ना मानिसहरु र आफ्नो पवित्र स्थल बचाउन इजरायली आक्रमणको प्रतिकार गर्ने बताएको छ।
इजरायलमा नयाँ सरकार बनेसँगै इजरायलको यो दाेस्राे हिंस्रक आक्रमण हो। गत मे महिनामा दुई पक्षबीचको ११ दिनसम्मको युद्धपछि युद्धविराम सम्झौता भएको थियो। जुन युद्धमा गाजामा रहेकाे घर, विद्यालय, अस्पताल र अन्य महत्वपूर्ण पूर्वाधारमा क्षति पुगेकाे थियाे।
उक्त द्वन्द्वमा ६६ बालबालिकासहित कम्तिमा २५४ प्यालेस्टिनको मृत्यु भएको गाजाका स्वास्थ्य अधिकारीहरूले बताएका छन्।
यता, हमासले गरेको रकेट हमलामा इजरायलमा दुई बालबालिकासहित १२ जना मारिएका थिए।
विश्व स्वास्थ्य संगठन (डब्ल्यूएचओ)ले याे युद्धमा गाजापट्टीका ७७ हजारभन्दा बढी नागरिक आन्तरिक रूपमा विस्थापित भएका थिए र ३० भन्दा बढी स्वास्थ्य संस्थाहरुमा क्षति पुगेको बताएकाे थियाे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791448938.png)
-1786602170.png)
-1791388337.png)
