काठमाडाैं- सयौं इजरायली अतिराष्ट्रवादीहरुले पूर्वी जेरुसेलममा अरब र प्यालेस्टिनीविरुद्ध चर्का नाराबाजी गर्दै मार्च पास गरेका छन्। आफ्नो राष्ट्रिय झण्डासहित उनीहरुले मंगलबार मार्च पास गरेका हुन्।
समाचार एजेन्सी रोयटर्सका अनुसार मार्चमा भाग लिने अधिकांश मानिसहरू दक्षिणपन्थी यहूदीहरू थिए। उनीहरू हातमा इजरायलको राष्ट्रिय झण्डा लिएर अघि बढिरहेका थिए।
इजरायली प्रहरी यो मार्चको बारेमा धेरै सतर्क थिए। प्रहरीले प्यालेस्टाइनहरूलाई जेरूसेलमको प्रसिद्ध दमास्कस फाटकको क्षेत्रबाट हटाएकाे थियाे।
इजरायलमा नयाँ गठबन्धन सरकार गठन भएको दुई दिन मात्र भएको छ। यसैबीच भएकाे याे घटनाले पुनः हिंसात्मक शृङ्खला शुरु हुने खतरा निम्त्याएको छ।
गत मे महिनामा दुई पक्षबीचको ११ दिनसम्मको युद्धपछि युद्धविराम सम्झौता भएको थियो। जुन युद्धमा घर, विद्यालय, अस्पताल र अन्य महत्वपूर्ण पूर्वाधारमा क्षति पुगेकाे छ।
उक्त द्वन्द्वमा ६६ बालबालिकासहित कम्तिमा २५४ प्यालेस्टिनको मृत्यु भएको गाजाका स्वास्थ्य अधिकारीहरूले बताएका छन्।
यता, हमासले गरेको रकेट हमलामा इजरायलमा दुई बालबालिकासहित १२ जना मारिएका थिए।
विश्व स्वास्थ्य संगठन (डब्ल्यूएचओ)ले याे युद्धमा गाजापट्टीका ७७ हजारभन्दा बढी नागरिक आन्तरिक रूपमा विस्थापित भएका थिए र ३० भन्दा बढी स्वास्थ्य संस्थाहरुमा क्षति पुगेको बताएकाे थियाे।
इजरायलले १९६७ को युद्धमा पूर्वी जेरूसेलम नियन्त्रण लिएका थिए। त्यसबेलादेखि यहाँ द्धन्द्ध चल्दै आएकाे छ। यद्यपि, यो भूमि इजरायलकै हाे भनेर अझै अन्तर्राष्ट्रिय मान्यता प्राप्त भएको छैन।
प्यालेस्टिनीले भने भविष्यमा प्यालेस्टाइन एक स्वतन्त्र र सार्वभौम राज्य बने पूर्वी जेरुसेलम आफ्नाे राजधानी हुनुपर्ने माग राख्दै आएका छन्। त्यहाँ पश्चिम बैंक र गाजासहितको भूभागलाई समेट्ने उनीहरुकाे याेजना रहेकाे छ।
गाजामा हमासले शासन गरेको छ। हमासले यामिना पार्टीबाट प्रधानमन्त्री बनेका नेफ्टाली बेनेट लाई जेरुसेलमा भएकाे मार्च पासबारे चेतावनी दिएको छ। हमासले भनेका छ- यस मार्च पासमा अरब मुर्दाबादको नारा पनि लगाइएको थियो। अशान्ति फेरि उत्पन्न हुनसक्छ।
येर लेपिड बेनेट सरकारका परराष्ट्रमन्त्री हुन्। बेनेट सन् २०२३ सम्म प्रधानमन्त्री बन्नेछन् भने मध्यमार्गी येश एटिड पार्टीका नेता लेपिड सन् २०२३ को अगस्टदेखि सरकारको नेतृत्वमा हुनेछन् ।
उनले यो मार्च पासमा अरब मुर्दाबादको नारा लगाइएकाे भन्दै निन्दा गरेका छन्। 'यहूदीहरू यस्तो छैनन्। एक इजरायलीको लागि पनि यो राम्रो हाेइन। निश्चित रूपमा हाम्रो राष्ट्रिय झण्डाले पनि यसलाई अनुमति दिँदैन,' उनले सामाजिक सञ्जालमा भनेका छन्।
उनले याे घटना माफी माग्न याेग्य नभएकाे समेत बताएका छन्। 'हामी इजरायली झण्डा हातमा लिएर घृणाको भाषा बोल्न सक्दैनौं। यो माफी माग्न योग्य छैन। यो कसरी हुन सक्छ? इजरायली झण्डा आफ्नो हातमा लिएका छन् र अरबहरूले मुर्दाबादको नारा लगाइरहेका छन्,' उनले लेखेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
