ओलीका लागि ‘निर्णायक’ बन्न नसकेपछि महन्थ-राजेन्द्र पक्ष तटस्थ, पार्टीलाई फुटबाट जोगाउन खोजिएको दाबी

राजनीति

नेपाल लाइभ आइतबार, वैशाख २६, २०७८ १३:२४

फाइल तस्वीर।

काठमाडौं- जनता समाजवादी पार्टी (जसपा)का अध्यक्ष महन्थ ठाकुर र वरिष्ठ नेता राजेन्द्र महतोले नेपाली कांग्रेस सभापति शेरबहादुर देउवा र प्रधानमन्त्री केपी शर्मा ओलीलाई भेटेर पार्टी विभाजनबाट जोगाउन तटस्थ बस्ने ब्रिफ्रिङ गरेका छन्। आइतबार बिहान देउवालाई बूढानीलण्ठ र ओलीलाई बालुवाटारमा भेटेर यस्तो कुरा जानकारी गराएका हुन्।

यसअघि प्रधानमन्त्री ओलीका पक्षमा लागेको जसपाको महन्थ-राजेन्द्र पक्ष उनका लागि ‘निर्णायक’ बन्न नसकेपछि तटस्थ बस्ने मूडमा पुगेको हो। आइतबारको बालुवाटार भेटमा उनीहरूले यही कुरा राखे।

प्रधानमन्त्रीलाई विश्वासको मत दिन नसकिने बताएका उनीहरूले देउवासँगको भेटमा ओलीको विपक्षमा पनि मतदान नगर्ने बताए। देउवाले सोमबार ओलीले विश्वासको मत लिन लागेकाले त्यसको विपक्षमा मत हाल्न अनुरोध गरेका थिए।

जसपा सत्ता स्वार्थमा लाग्दा पार्टी विभाजन हुने स्थिति आएपछि तटस्थ बस्ने निर्णयमा पुगेको नेता राजेन्द्र महतोले बताए। ‘बिहान कांग्रेस सभापति देउवाजीलाई भेट्न म र ठाकुरजी गयौं। ओलीजीले भोलि विश्वासको मत लिने कुरा छ, त्यस सम्बन्धमा ओलीलाई मत दिनुहुन्न। हामी विपक्षमा छौं। पक्षमा मतदान गर्नुहुन्न भन्नुभयो’ महतोले नेपाल लाइभसँग भने, ‘हामीले उठाएका माग र मुद्दाका सम्बन्धमा सरकारसँग वार्ता गरिहेका थियौं। कतिपय माग मुद्दाहरू सम्बोधन भएपनि कतिपय अझै प्रक्रियामा छन्। त्यसैले सबै माग सम्बोधन भइनसकेकाले पार्टी जोगाउन पक्ष-विपक्ष कतै जाँदैनौं। तटस्थ बस्छौं।’

महन्थ-राजेन्द्रसँगको भेटमा देउवाले सत्ता समीकरणमा आफ्नो हिस्सेदारी के हुने भन्दै विपक्ष गठबन्धनमा जोडिन आग्रह गरेको महतोले बताए। ‘हामी कांग्रेस-माओवादीको सत्ता खिचातानीमा बस्दैनौं। त्यस्तो हुन गयो भने पार्टी विभाजन हुन्छ। सत्तामा कसलाई हटाउनु छ, कसलाई जोगाउनु छ त्यसमा तपाइँहरू (कांग्रेस-माओवादी) नै लाग्नुस्। हामी त्यसमा छैनौं’ भेटपछि महतोले भने, ‘हाम्रो पार्टी एकतालाई असर पर्नेगरी नगरिदिनुस्, पार्टी फुटाएर सत्ता स्वार्थमा लाग्ने काम नगर्नुस्।’

आफ्नो पार्टी वैकल्पिक शक्ति निर्माण गर्न लागेको बताउँदै महतोले सत्ताको लोभ देखाएर सांसद फकाउने काममा नलाग्न कांग्रेसलाई आग्रह गरेको बताए। महन्थ-राजेन्द्रको जवाफ सुनेपछि देउवाले जसपा फुटाएर सरकार र सत्ता निर्माणमा नलाग्ने बताउँदै सिंगै जसपालाई एक ठाउँमा ल्याउन खोजेको बताएका थिए। पार्टी फुटाएर सत्ता बनाउने अंगकणितमा कांग्रेस नलाग्ने देउवाले दुवै नेतालाई स्पष्ट पारेका थिए।

देउवालाई भेटेलगतै महन्थ-राजेन्द्र ओलीलाई भेट्न बालुवाटार पुगेका थिए। प्रधानमन्त्री ओलीलाई विश्वासको मत दिन नसकिने दुवै नेताले प्रष्टसँग राखेको महतोले बताए।

‘प्रधानमन्त्रीज्यूले विश्वासको मत दिनुपर्ने कुरा गर्नुभयो। हामीले विश्वासको मत दिन अप्ठ्यारो छ। तपाईंले सबै माग पूरा गर्नु भएको पनि छैन। अहिले पनि जेलमा भएका बन्दी रिहा भएका छैनन्। गम्भीर खालका मुद्दा फिर्ता भएका छैनन्। त्यसैले पक्षमा र विपक्ष दुवैमा मतदान गर्दैनाैं भन्ने कुरा जानकारी गरायौं’ महतोले भने।

सम्बन्धित समाचार

महन्थ-राजेन्द्रले ओलीलाई भेटेर भने- विश्वासको मत दिन सकिँदैन

जसपा तटस्थ बस्न मिल्छ? सर्वोच्चको फैसला भन्छ- जनताको प्रतिनिधि तटस्थ बस्न मिल्दैन

जसपामा नयाँ विकासक्रम : ओलीलाई मत नदिएर तटस्थ बस्ने महन्थ-राजेन्द्र पक्षको तयारी

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society. http://nepallive.com

लेखकबाट थप

भारतीय राजदूतले प्रधानमन्त्रीलाई भेटेर भने: आतंकवादीविरुद्धको समर्थनका लागी धन्यवाद

सुशासन कस्तो हुन्छ २०८४ पछि देखाउँछौं :रास्वपा

नीति तथा कार्यक्रमको पक्षमा मतदान गर्न सांसदलाई एमालेको ह्विप