काठमाडौं- नेकपा एमाले र माओवादी केन्द्रबीच पार्टी एकता भएर बिहीबार 'नेपाल कम्युनिस्ट पार्टी' (अन्डरलाइनसहितको) गठन भएको छ।
राष्ट्रिय सभागृहमा आयोजित एकीकरण घोषणा कार्यक्रममा ६ बुँदे घोषणापत्र जारी गर्दै नयाँ पार्टी घोषणा गरिएको हो। एउटै शक्तिशाली कम्युनिस्ट पार्टी बनाउने उद्देश्यले दुई पार्टीबीच एकीकरण हुँदा यसबारे विभिन्न दलका नेताहरुले टीका-टिप्पणी गरेका छन् र यो क्रम जारी छ।
कतिपय नेताले सामाजिक सञ्जालमा गरेका टिप्पणी र केहीसँग कुराकानी गरेर हामीले विभिन्न दलका नेताको धारणा समेटेका छौं:
बाबुराम भट्टराई, संयोजक, नयाँ शक्ति नेपाल
विलयपश्चात् गठित पार्टीका नेतृत्वदायी कमरेडहरूले सामूहिक सपथ लिँदा एउटा थप सपथ आजै लिए कसो होला? त्यो हो- 'हामी पार्टीका कुनै पनि कार्यक्रम प्रम निवास बालुवाटारमा गर्नेछैनौं र कहिल्यै सरकारी साधन-स्रोतको दुरूपयोग गर्नेछैनौं!'
नेपाली राजनीतिका अगुवा व्यक्तित्व मदन भण्डारी र अथक अभियन्ता जीवराज आश्रितको २५औं स्मृतिदिवसमा हार्दिक श्रद्धासुमन! आजैका दिन एमाले-माके विलयको घोषणाको कुनै सांकेतिक अर्थ? प्रचण्डले जबजको विरूद्धमा जनयुद्ध गरेकोमा पश्चाताप गर्दै 'मदनपथ' अंगीकार गरेको स्वीकारोक्ति हो? प्रस्ट पारियोस्!
विश्वप्रकाश शर्मा, प्रवक्ता, नेपाली कांग्रेस
कम्युनिस्टहरुको एकता हुँदै गर्दा कांग्रेसले लोकतान्त्रिक पार्टीहरुको ध्रुवीकरणमा लाग्नुपर्छ भन्नेहरु पनि छन्। तर, उहाँहरुको एकताले कांग्रेसलाई अब धेरै फरक पार्दैन। उहाँहरुले एकता गरिहाल्नु भयो भनेर हामीले पनि आत्तिएर अरु दल भेला गर्ने कुरा हुँदैन। जे फरक पर्नुथियो, त्यो अस्तिको निर्वाचनमा परिसक्यो। त्यसको परिणामस्वरुप हामी रुपान्तरणको क्रममा छौं। उहाँहरु पनि नागरिक तहमा राख्नुभएका सपनाहरुको व्यावहारिक परीक्षणको चरणमा हुनुहुन्छ। हामी रुपान्तरित भएर प्रतिस्पर्धामा नवीन ढंगले आउने चरणमा छौं।
आज मदन भण्डारीकै निधनको दिन मदन भण्डारीले प्रस्तुत गरेको जबजलाई खोपाको भीमसेन बनाएर मार्क्सवादतर्फ अगाडि फर्किनु भनेको उहाँको सिर्जनशीलतामा ब्रेक लाग्ने अवस्था बन्छ। त्यो चाहिँ मदन भण्डारीको दोस्रो मृत्युको दिन हुन्छ भन्ने मलाई लाग्छ। त्यसैले जबजलाई परिमार्जित गर्ने, परिस्कृत गर्ने, आजको सन्दर्भ बमोजिमको बनाउने कुरामा यो एकताले उहाँहरुलाई योगदान गरोस्, गर्नुपर्छ। उहाँहरुको घरेलु मामिला हो, बाहिरका हामीले धेरै बोल्नु हुन्न, तर त्यो गर्न सक्दा चाहिँ नेपालको कम्युनिस्ट आन्दोलनको लोकतान्त्रीकरणलाई बल पुग्ने हुन्छ।
राजकिशोर यादव, राजपा अध्यक्ष मण्डलका सदस्य
एकतालाई हामीले राम्रै भन्नुपर्छ र स्वागत पनि गर्नुपर्छ। यो मिलन देशको हितमा होस्, लोकतन्त्रको हितमा होस्, स्थायित्वका लागि होस्। यसमा हाम्रो शुभकामना छ। यी दुई दलले हिजोसम्म एक-अर्कालाई देखाएर संविधान संशोधन गरेका थिएनन्, अब त्यो अवसर पाउने छैनन्। लोकतन्त्र, स्थायित्व र समृद्धिका लागि संविधान संशोधन आवश्यक छ, एकीकृत दलले यो कुरो बुझोस्।
चित्रबहादुर केसी, अध्यक्ष, राष्ट्रिय जनमोर्चा
नेकपा एमाले र माओवादी दुवैले संसदीय प्रणालीमा सामेल भएकाहरु बेग्लाबेग्लै बस्नुभन्दा त पार्टी एकता गर्नु राम्रो कुरा हो। अर्कोतिर दुई पार्टीले चुनावी तालमेल गरेर जाँदा राम्रो परिणाम आयो। 
त्यसपछि पार्टी एकता गर्नुस् भनेर हामीले निरन्तर सुझाव दिँदै आएका थियौं। अहिले त उनीहरु मिले, हामी त्यसलाई समर्थन गर्छौं। भोलि नै हामी वक्तव्य निकालेर स्वागत गर्छौं।
उहाँहरुले हामीलाई पनि पार्टी एकतामा मिसिऔं भनिरहनुभएको थियो तर हामीले धेरै कुराहरु जस्तै सैद्धान्तिक, राजनीतिक, सांगठनिक भिन्नता भएकाले उहाँहरुसँग नमिल्ने बतायौं। उहाँहरु संसदीय व्यवस्थाबाट 8वाद ल्याउने भन्नुहुन्छ। त्यसो भन्दा हाम्रो र उहाँहरुको कुरामा 'आनको तान' फरक पर्छ। कार्यगत एकता भयो र हुनसक्छ। तर पार्टी एकता भने सम्भव छैन।
केशव झा, महासचिव, राजपा नेपाल
अहिले जसरी दुई वटा कम्युनिस्ट पार्टी एक भएको छ, त्यसलाई राजपाले सकारात्मक रुपमा लिएको छ। हाम्रो तर्फबाट उहाँहरुलाई शुभकामना पनि छ। यो नेपालको राजनीतिक इतिहासमा निकै ठूलो घटना हो। यसले नेपालमा स्थिरता आओस्, एकता लामो समयसम्म टिकोस् भन्ने हाम्रो चाहना छ। पार्टी जति कम भयो, मुलुक उति स्थिर हुँदै जान्छ भन्ने हाम्रो पनि बुझाइ रहेको छ।
अब सहजै संविधान संशोधन पनि हुनेछ भन्ने हाम्रो अपेक्षा छ। पहिले एमाले संविधान संशोधनको लागि तयार थिएन, अहिले तयार भएको छ। माओवादीले त संशोधनको प्रस्ताव नै दर्ता गराएको थियो। यी दुवै पार्टी एक भएपछि हाम्रो मुद्दालाई गम्भीरताका साथ उठाउनुहुन्छ र संशोधनले छिटै गति लिन्छ भन्ने हामीले विश्वास लिएका छौं।
कमल थापा, अध्यक्ष, राप्रपा
नेकपा एमाले र नेकपा माओवादीका बीचमा एकता भएकोमा खुसी लागेको छ। केपी ओली र पुष्पकमल दाहाल ‘प्रचण्ड’लाई बधाई तथा शुभकामना!
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790735823.webp)
-1786602170.png)
